پارلامەنت سەناتىنىڭ جانىنداعى تالداۋ مەكتەبىنىڭ بەسىنشى لەگى قابىلدانىپ, دارىستەر باستالدى. بيىل بۇل جوباعا 1000-نان استام ۇمىتكەردەن ءوتىنىم كەلىپ تۇسكەن. كونكۋرستىق ىرىكتەۋدەن 71 قاتىسۋشى ءوتتى, ياعني ءبىر ورىنعا 14 ادام ۇمىتكەر بولدى. سەنات توراعاسى ماۋلەن اشىمباەۆ جاڭا كەزەڭنىڭ العاشقى دارىسىندە تسيفرلىق تەحونولوگيالار داۋىرىندەگى تالداۋ جۇمىسىنىڭ تۇجىرىمدامالىق قىرلارى تۋرالى ايتتى.
پالاتا سپيكەرى قاتىسۋشىلارعا ءىلتيپات ءبىلدىرىپ, ەل ومىرىندەگى ۇدەرىستەردى تەرەڭ تالداپ, مەملەكەتتىڭ دامۋىنا ەلەۋلى ۇلەس قوسۋدى كوزدەيتىن قوعامداستىقتىڭ قالىپتاسۋى سەناتتىڭ بەس جىل بويى ءتۇرلى سالاداعى ساراپشىلارمەن جۇيەلى ءوزارا ءىس-قيمىلىنىڭ ناتيجەسى ەكەنىن اتاپ ءوتتى. ولار زاڭ شىعارۋ باعىتىندا بىرلەسىپ جۇمىس ىستەۋ, وڭىرلىك جوبالاردى ازىرلەپ, ىسكە اسىرۋعا سەپتىگىن تيگىزگەن.
سونىمەن قاتار م.اشىمباەۆ سەنات جانىنداعى تالداۋ مەكتەبى مەن ساراپشىلار كلۋبى جاس مامانداردىڭ اناليتيكالىق قابىلەتى مەن تسيفرلىق مۇمكىندىگىن كەشەندى تۇردە جەتىلدىرۋگە, ولاردىڭ بويىنا جاسامپاز قۇندىلىقتاردى سىڭىرۋگە ىقپال ەتەتىنىن ايتتى. مۇنداي قادام مەملەكەتتىك باسقارۋدى وزگەرتۋگە, ونى ودان ءارى يكەمدى, زاماناۋي, يننوۆاتسيالىق ەتۋگە مۇمكىندىك بەرەدى.
– پرەزيدەنت قاسىم-جومارت توقاەۆ اناليتيكالىق قابىلەتتەرى جوعارى, تىڭ تاسىلدەردى مەڭگەرگەن مامانداردىڭ جاڭا تولقىنىن دايارلاۋدىڭ ماڭىزدى ەكەنىن ۇنەمى ايتىپ كەلەدى. قازىر كەز كەلگەن شەشىم كوپتەگەن فاكتوردى ەسكەرۋدى تالاپ ەتەدى. ال اناليتيكا باسقارۋ جۇيەسىندەگى ستراتەگيالىق ماڭىزدى تەتىككە اينالىپ وتىر. بۇل رەتتە تالداۋ قابىلەتى مەن زاماناۋي تسيفرلىق مۇمكىندىكتىڭ ۇيلەسىمى دە اسا ماڭىزدى. تالداۋ مەكتەبى – وسى باعىتتاعى ماقسات-مىندەتتەردى ىسكە اسىرۋعا قوسقان ءبىزدىڭ ناقتى ۇلەسىمىز, – دەدى م.اشىمباەۆ.
سەنات توراعاسى «جي داۋىرىندەگى مەملەكەتتىك باسقارۋ جانە تالداۋ» تاقىرىبىنداعى ءدارىسى كەزىندە كاسىبي كەيستەرگە توقتالىپ, كەڭەستەرىن ءبولىستى. سونداي-اق اناليتيكتەردىڭ وتاندىق, سونداي-اق الەمدىك تاجىريبەسىندە قولدانىلاتىن ترەندتەر مەن پايدالى تەتىكتەرگە, ۇلكەن دەرەكتەرمەن جۇمىس ىستەۋ ادىستەرىنە توقتالدى. پالاتا سپيكەرى الەمدە بولىپ جاتقان ۇدەرىستەردىڭ ءوزارا بايلانىسىنا, ولاردىڭ زەرتتەۋ كەزىندە ەسكەرىلۋگە ءتيىس ەكەنىنە دە ەرەكشە ءمان بەردى.
مەكتەپتىڭ بيىلعى دارىستەر باعدارلاماسى «Smart Governance: ءتيىمدى باسقارۋ قاجەتتى دەرەكتەر, اناليتيكا جانە جاساندى ينتەللەكت» تاقىرىبى اياسىندا ازىرلەنگەن. ونىڭ بارىسىندا «ۋربانيستيكا, بولاشاق قالالار جانە وڭىرلىك دامۋ», «ەنەرگەتيكا جانە ورنىقتى ينفراقۇرىلىم», «ەكولوگيا جانە كليماتتىق ساياسات», «اگروونەركاسىپ جانە اۋىلدىق جەرلەردىڭ ورنىقتى دامۋى», «ينكليۋزيۆتىلىك جانە الەۋمەتتىك ساياسات», ء«بىلىم جانە ادام كاپيتالى», «پرواكتيۆتى مەملەكەتتىك باسقارۋ» سەكىلدى 7 نەگىزگى باعىت بويىنشا باياندامالار دايىندالادى. ءاربىر توپ كوماندامەن جۇمىس تاسىلدەرىن دامىتا وتىرىپ, اناليتيكالىق جوبالارمەن جۇمىس ىستەيدى. سونداي-اق اناليتيكالىق ماتەريالدار ازىرلەۋ مەن شەشىم قابىلداۋ داعدىلارىن جەتىلدىرەدى.
سونىمەن قاتار تالىمگەرلەرمەن كوماندالىق جۇمىس تالداۋشىلار ءۇشىن كاسىبي نەتۆوركينگ باعىتىندا بولماق. مەنتورلاردىڭ قاتارىندا ءوز سالالارىنداعى جەتەكشى ماماندار – مەملەكەتتىك قۇرىلىمداردىڭ, عىلىمي, حالىقارالىق ۇيىمداردىڭ وكىلدەرى, وتاندىق, شەتەلدىك ساراپشىلار, سونداي-اق, وقىتۋ مودۋلدەرىنىڭ ءار باعىتى بويىنشا ءتيىستى ورتالىق مەملەكەتتىك ورگانداردىڭ باسشىلارى بار. ولاردىڭ ءبارى تالىمگەرلىككە ۆولونتەرلىك نەگىزدە تارتىلادى.
سوعان سايكەس العاشقى كۇندە عىلىم جانە جوعارى ءبىلىم ءمينيسترى ساياسات نۇربەك, مىنەز-ق ۇلىق عىلىمدارى جانە دەرەكتەردى تالداۋ سالاسىنىڭ مامانى, Smart-جۇيەلەردى تسيفرلاندىرۋ مەن دامىتۋ باعىتىندا الەم مويىنداعان ساراپشى, سينگاپۋردان كەلگەن دوكتور رۋبەن ەنگ, سونداي-اق, ستراتەگيالىق جانە داعدارىستىق كوممۋنيكاتسيالار جونىندەگى ساراپشى, مودەراتور, كوماندالىق ءبىلىم بەرۋ جانە باعداردى ءتۇسىنۋ جونىندە ستراتەگيالىق سەسسيا وتكىزگەن ەربول يسمايلوۆ ءدارىس وقىدى.
بەسىنشى كەزەڭدەگى وقىتۋ باعدارلاماسى سەگىز اپتاعا جالعاسادى. سونىڭ قورىتىندىسى بويىنشا اناليتيكالىق ماتەريالدار جيناعى جارىق كورەدى. ۇسىنىمدار جيناقتالعان بۇل قورىتىندى قۇجات پارلامەنت دەپۋتاتتارىنا, سونداي-اق ءتيىستى مەملەكەتتىك ورگاندارعا الداعى قىزمەتتە نازارعا الۋ ءۇشىن جولدانادى.
ساراپشىلاردىڭ بۇعان دەيىنگى كەزەڭدەر مەن جاڭا بەسىنشى لەك كەزىندەگى بەينە دارىستەرىن تالداۋ مەكتەبىنىڭ رەسمي YouTube ارناسىنان كورۋگە بولادى.