سەنبى كۇنى دانيا استاناسى كوپەنگاگەندە جانە ەلدىڭ وزگە قالالارىندا مىڭداعان ادام كوشەگە شىعىپ, گرەنلانديانىڭ ەگەمەندىگىن قولداۋعا ارنالعان جاپپاي شەرۋ وتكىزدى. بۇل تۋرالى Euronews ءمالىم ەتتى, دەپ حابارلايدى Egemen.kz.
نارازىلىق اقش پرەزيدەنتى دونالد ترامپتىڭ جۇما كۇنى جاساعان مالىمدەمەسىنەن كەيىن ۇيىمداستىرىلدى. ترامپ اقش-تىڭ گرەنلانديانى باقىلاۋعا الۋ جوسپارىنا قارسى شىعاتىن ەلدەر «تاۋارلارىنا باج سالىعىن ەنگىزۋى مۇمكىن» ەكەنىن ەسكەرتكەن.
اقش گرەنلانديانى باسىپ الۋعا نيەتتى مە؟
ايتا كەتەيىك, بۇل جاپپاي اكتسيا اقش كونگرەسىنىڭ ەكى پارتيادان قۇرالعان دەلەگاتسياسىنىڭ كوپەنگاگەنگە ساپارىمەن تۇسپا-تۇس كەلدى. دەلەگاتسيا وكىلدەرى ترامپ اكىمشىلىگىنىڭ گرەنلاندياعا قاتىستى قاتاڭ مالىمدەمەلەرىمەن كوپتەگەن امەريكالىقتار كەلىسپەيتىنىن جەتكىزگەن.
ەۋروپا ترامپتىڭ گرەنلانديا تۋرالى سوزىنە قارسى شىقتى
كوپەنگاگەندەگى شەرۋدە نارازىلىق بىلدىرۋشىلەر دانيا مەن گرەنلانديانىڭ جالاۋلارىن جەلبىرەتىپ, اكىمدىك عيماراتى الدىندا قىزىل-اق تۇستەن قۇرالعان «تەڭىز» قالىپتاستىردى. ولار ينۋيت تىلىندەگى ارال اتاۋىن ايتىپ, «كالاالليت نۋناات!» دەپ ۇرانداتقان.
«ماقسات – گرەنلانديا دەموكراتياسىنا جانە نەگىزگى ادام قۇقىقتارىنا قۇرمەت كورسەتۋدى تالاپ ەتەتىن انىق ءارى ءبىرتۇتاس سيگنال جىبەرۋ», دەلىنگەن دانياداعى گرەنلانديالىقتاردىڭ Uagut قاۋىمداستىعىنىڭ سايتىندا.
ۇيىمداستىرۋشىلاردىڭ مالىمەتىنشە, ءدال وسىنداي دەمونستراتسيا گرەنلانديا استاناسى نۋكتا دا جوسپارلانعان. ول اقش-تىڭ «گرەنلانديانى باقىلاۋعا الۋ جونىندەگى زاڭسىز جوسپارىنا» قارسىلىق رەتىندە وتپەك.
ناتو-عا مۇشە ءۇش ەل گرەنلاندياعا اسكەر جىبەرەدى