وتكەن جىلى ەلىمىزدىڭ مادەني ومىرىندەگى ەڭ ايشىقتى وقيعالاردىڭ ءبىرى – مەگاپوليستىڭ قىمبات تاستارمەن كومكەرىلگەن القاسى ىسپەتتى Almaty Museum of Arts ورداسىنىڭ الماتىلىقتارعا سىيعا تارتىلۋى ەدى. ويتكەنى سوڭعى وتىز جىلدا شاھاردا وزىق تەحنولوگيالار, زاماناۋي ينجەنەرلىك, ارحيتەكتۋرالىق شەشىمدەرى توعىسقان ۇلكەن مۋزەيلەر سالىنباعاندىقتان, كورگەن دە ارماندا, كورمەگەن دە ارماندا دەيتىن حالىقارالىق كورمەلەر مەن بەدەلدى بيەننالەلەر الماتىنى اينالىپ ءوتىپ جاتتى, دەپ جازادى Egemen.kz.
ءدال وسى جىلداردا تانىمال كاسىپكەر, مەتسەنات نۇرلان سماعۇلوۆ تا بۇكىلالەمدىك بەينەلەۋ ونەرىنىڭ جاۋھارلارىن, قازاقتىڭ ايتۋلى قىلقالام شەبەرلەرىنىڭ تۋىندىلارىن جيناۋمەن بولعان. ۋاقىت وتە كەلە وتاندىق بيزنەستەگى بەلگىلى تۇلعا بالاماسى جوق وسى بايلىقتى ءوزىنىڭ تۋعان شاھارىنا سىيعا تارتىپ, مۇراعا قالدىرۋعا شەشىم قابىلداعانىن بىلەمىز. ءبىر سوزبەن ايتقاندا, مەگاپوليستەگى Almaty Museum of Arts وسىلاي دۇنيەگە كەلگەن.
اقيقاتىندا Almaty Museum of Arts قازاقستانداعى ەڭ ماڭىزدى مادەني جوبالاردىڭ ءبىرى ەكەنىن جوققا شىعارۋعا بولمايدى. بىراق ول قالاي جۇزەگە استى دەسەك, تاياۋ كۇندەرى ونىڭ عاجايىپ تاريحىن تاماشا باياندايتىن «قيىلىستاعى مۇراجاي» دەرەكتى ءفيلمىنىڭ تۇساۋى كەسىلدى.
2026 جىلى قانداي تاقىرىپتاردا كينو تۇسىرۋگە بولادى؟
ءتورت جىل بويى تۇسىرىلگەن فيلم وراسان ءىرى يدەيانى جۇزەگە اسىرۋعا قول جەتكىزگەن مەتسەنات ءارى كوللەكتسيونەر نۇرلان سماعۇلوۆ پەن جۇبايى ءمادينا سماعۇلوۆانىڭ ىشكى تولعانىسىنان باستالىپ, الەمدىك مادەني كارتادا ويىپ تۇرىپ ورىن العان كەڭىستىكتىڭ ومىرگە كەلۋىنە دەيىنگى ۇدەرىستى كورسەتەدى. كورەرمەن ءبىر دەممەن حح عاسىرداعى قازاق ونەرىنە تيەسىلى جەكە كوللەكتسيانىڭ قالايشا مۇراجايدىڭ وزەگىنە اينالعانىنا, بۇگىندە ونىڭ مىڭداعان قوناق قابىلدايتىن ورتا رەتىندە قالىپتاسقانىنا كۋاگەر بولادى.
«قيىلىستاعى مۇراجاي» كارتيناسىن دەرەكتى فيلمدەرىمەن تانىمال بولعان جۋرناليست ءارى پروديۋسەر اندرەي لوشاك ىرگەتاسى قالانعاننان باستاپ, 2025 جىلعى 12 قىركۇيەكتەگى اشىلۋىنا دەيىنگى كەزەڭدى ىشتەن باقىلاپ, تاسپاعا ءتۇسىرىپ وتىرعان.
«بۇل مۇراجاي جىلدار بويعى ارمانىمنىڭ عانا ەمەس, قوعام مەن ەل الدىنداعى بەلگىلى ءبىر بورىشىمنىڭ وتەۋى ىسپەتتى. الەم ارالاپ, ءىرى مۇراجايلاردى كورگەن سايىن الماتى ءدال وسىنداي كەڭىستىككە, ياعني, ونەر قولجەتىمدى بولاتىن, ادامدار باس قوسىپ, مادەنيەت تۋرالى جاڭا اڭگىمە قۇراتىن ورىنعا لايىق دەپ ويلايتىنمىن», دەيدى Almaty Museum of Arts نەگىزىن قالاۋشى نۇرلان سماعۇلوۆ.
كينو الەمىندەگى جەتىستىكتەر
فيلم تەك ارحيتەكتۋرالىق شەشىمدەر مەن نازارباەۆ پەن ءال-فارابي داڭعىلدارىنىڭ قيىلىسىنداعى عيمارات قۇرىلىسى تۋرالى عانا ەمەس, يدەيانىڭ تۋى, ىزدەنىستەردەن باستاپ, كوپساتىلى لوگيستيكا مەن شەبەر كۋراتورلىق شەشىمدەرگە دەيىنگى ۇدەرىستى, ياعني, ونەر تۋىندىلارىنىڭ كۇردەلى ءارى كوبىنە كوزگە كورىنبەيتىن جولىنان حاباردار ەتەدى. كادردا يايوي كۋساما, بيلل ۆيولا, ريچارد سەررا, انسەلم كيفەر, جاۋمە پلەنسا, ينكا شونيبارە مەن اليسيا كۆادە سىندى ەسىمى كۇللى الەمگە ءماشھۇر شەبەرلەر ەڭبەكتەرىنىڭ قازاقستاندىق ونەرمەن ديالوگى كورسەتىلەدى.ايتقانداي, دەرەكتى ءفيلمدى الداعى ەكى بويى مۇراجايعا كىرۋ بيلەتى بار بارلار قازاق, اعىلشىن تىلىندەگى سۋبتيترلەرمەن تەگىن تاماشالاي الادى.
وسى كۇندەرى تۇساۋى كەسىلگەن «قيىلىستاعى مۇراجاي» – مۇراجاي مەن ونىڭ جاۋھار تۋىندىلارى تۋرالى قوس دەرەكتى ءفيلمنىڭ العاشقىسى. الداعى كوكتەمدە 60-شى جىلدارداعى وتاندىق قىلقالام شەبەرلەرىنىڭ تۋىندىلارىنا اسپەتتەيتىن ەكىنشى ءفيلمنىڭ پرەمەراسى وتپەك. ەكىنشى ءبولىمى – كەڭەس زامانىندا قازاق ونەرىنىڭ قايتالانباس ءستيلىن قالىپتاستىرعان تالانتتى بۋىن وكىلدەرىنە ارنالماق.
ۇلتتىق كينونىڭ ۇستىنى: 2025 جىلعى جەتىستىكتەر مەن جاڭا مۇمكىندىكتەر