بۇل – اتاۋلى كىتاپ. ءتىپتى اتويلاپ تانىستىرۋعا دا تۇرارلىق. اۆتورى ارمان المەنبەت بىلتىر جاس اقىن-جازۋشىلارعا بەرىلەتىن پرەزيدەنتتىك ارناۋلى ادەبي سىيلىقتى وسى شىعارماسىمەن جەڭىپ الدى. «پروزا» اتالىمى بويىنشا.
سول جەڭىمپاز شىعارما, «تەرگەۋشى» اتتى رومان, 398 بەتتىك كىتاپ بولىپ شىققانى كەشە عانا. شىعارما قاتارداعى تۋىندى ەمەس, دۇنيەگە كەلە سالا قاتارىنان قارا ۇزگەنى, ىلە كىتاپ رەتىندە جارىق كورگەنى. ءوزى اۆتور ءارى باسپاگەر بولعاندىقتان ديزاينى, قاتتالۋى وتە تاماشا. كىتاپ قالىڭ بولسا دا, سالماعى جەپ-جەڭىل. مۇقاباسى قاتتى. ازىرگە مىڭ دانامەن نارىققا شىعىپتى. ال اۆتورعا كەلسەك, بۇعان دەيىن ءبىر رومان ۇسىنىپ, پروزالىق جيناعى شىعىپ ۇلگەرگەن جازۋشى, باسپاگەر. كىتاپ ىسىمەن اينالىسىپ جۇرگەن ارمان المەنبەت رۋحانيات دەسە جانىپ تۇرعان قازاق. بۇرىن كىتاپ دۇكەندەرىندە بىرەن-ساران عانا قىلتيىپ تۇراتىن قازاق كىتاپتارى قازىر «مەلومان», «مارۆين» دۇكەندەرىندە سىقاپ تۇرماسا دا, ءبىر بۇرىشىن قامپايتۋعا جەتەعابىل. اتسالىسقان وسىنداي جىگىتتەردىڭ ارقاسى. جازۋشى, سونداي-اق كەيىنگى جىلدارى شىققان «سوزتۇزەر», «كوممەنتاتور سوزدىگى» كىتاپتارى اۆتورلارىنىڭ ءبىرى. ءوزى قاتتاپ شىعارعان مىنا «تەرگەۋشى» كىتابىن ءۇش جىل جازعانىن ايتادى.
«الىستاعى مالدى اۋىلداردا جاسالاتىن ءىرىلى-ۇساق قىلمىستىڭ قاي-قايسىسى بولسا دا تىركەلگەن جاعدايدا تەرگەۋشىنىڭ الدىنا كەلەدى. ەلەۋسىز ادامداردىڭ تاعدىرىنا تەرگەۋشى كۋا. ولار تاپ بولعان اۋىرتپالىق پەن كەنەلگەن قۋانىش جۇمىستى جانىن سالىپ ىستەيتىن تەرگەۋشىنىڭ كوز الدىندا. ءار ءىس وزىنشە مايدان. سول مايداندا تەرگەۋشى جەڭە مە, قىلمىسكەر جەڭە مە؟» دەلىنگەن كىتاپتىڭ قىسقاشا تۇسىنىگىندە.