قايرات ءساتجانوۆ جاڭا قىزمەتكە تاعايىندالدى

«قازاقستان بوكس فەدەراتسياسى پرەزيدەنتىنىڭ بۇيرىعىمەن قايرات ءساتجانوۆ قبف جاتتىقتىرۋشىلارمەن جۇمىس جونىندەگى ۆيتسە-پرەزيدەنتى قىزمەتىنە تاعايىندالدى», دەلىنگەن فەدەراتسيا تاراتقان حابارلامادا. 

ايتا كەتەيىك, قايرات ءساتجانوۆتىڭ ورنىنا قازاقستان ەرلەر قۇراماسىنىڭ باس جاتتىقتىرۋشىسى قىزمەتىنە نۇرجان ناسانوۆ تاعايىندالدى.

سالادا 35 جىلدان اسا تاجىريبەسى بار قايرات ءساتجانوۆ باس باپكەر رەتىندەگى قىزمەتىن قورىتىندىلادى.

«1,5 جىل باس جاتتىقتىرۋشى قىزمەتىندە قولدان كەلگەندى ايانىپ قالمادىق, بىلىكتىلىگىمىزدى, كوپ جىلدىق تاجىريبەمىزدى سالىپ جۇمىس اتقاردىق. وسى ۋاقىت ارالىعىندا ۇلكەن جەتىستىكتەرگە جەتتىك دەپ ويلايمىن. بىلتىر قاڭتاردا يسپانيادا وتكەن, اقپان ايىندا بولگاريادا وتكەن «ستراندجا» تۋرنيرىندە كوماندالىق ەسەپتە 1-ءشى ورىن الدىق. اتالعان تۋرنيردە ەلىمىز ەگەمەندىك العالى ەكى التىن العان ەكەن. ءبىز وسى سىندا 5 التىن جۇلدە يەلەندىك. ودان بولەك سەربيادا, نيدەرلاندىدا وتكەن جارىستاردا كوماندالىق ەسەپتە العا شىقتىق. قازاقستاندا وتكەن الەم كۋبوگى كەزەڭىندە دە وسى ناتيجەنى قايتالادىق. ليۆەرپۋلدە وتكەن الەم چەمپيوناتىندا تاريحقا ەنىپ, ۇلدار, قىزدار قۇراماسى بىرىگىپ 7 التىن مەدال يەلەنىپ, جالپى ەسەپتە توپ جاردىق. IBA ۇيىمداستىرعان الەم بىرىنشىلىگىندە 3 التىن جۇلدەمەن رەسەيدەن كەيىن 2-ءشى ورىنعا تۇراقتادىق», دەدى قايرات ءساتجانوۆ.

بۇگىن قازاقستان بوكس فەدەراتسياسى قايرات ساتجانوۆقا قۇرمەت كورسەتىپ, Toyota Land Cruiser 300 اۆتوكولىگىن جانە استانا قالاسىنان 3 بولمەلى پاتەر كىلتىن تابىستادى.