اتىراۋداعى ماڭىزدى ينۆەستيتسيالىق جوبانىڭ ءبىرى – كوكونىس ونىمدەرىن ساقتايتىن ءىرى لوگيستيكالىق ورتالىق. بۇل زاماناۋي اگرولوگيستيكالىق ينفراقۇرىلىمدى دامىتۋعا باعىتتالعان ماڭىزدى جوبا رەتىندە ەرەكشەلەنىپ وتىر.
كوكونىس ساقتاۋ قويماسىنىڭ جالپى اۋماعى 8 200 شارشى مەتردى قۇرايدى. مۇندا 28 ساقتاۋ كامەراسى بار. كامەرالارداعى تەمپەراتۋرالىق رەجىم – 25 °C-تان +25 °C-قا دەيىن رەتتەلەدى. ورتالىقتا تەمپەراتۋرا مەن ىلعالدىلىق اۆتوماتتى تۇردە باقىلانادى. «ورتالىقتا ەڭ وزىق ۇلگىدەگى توڭازىتقىش قوندىرعىلارى, جەلدەتۋ جانە ميكروكليماتتى باسقارۋ جۇيەلەرى ورناتىلدى. ەنەرگيانى ۇنەمدەيتىن ينجەنەرلىك شەشىمدەر نىساننىڭ ۇزدىكسىز ءارى ۇنەمدى جۇمىس ىستەۋىن قامتاماسىز ەتەدى», دەيدى وبلىس اكىمىنىڭ ورىنباسارى مارات مۋرزيەۆ.
ورتالىق باسشىسى باۋىرجان جولمۇحانوۆتىڭ دەرەگىنە قاراعاندا, لوگيستيكالىق ورتالىق كۇندەلىكتى تۇتىنۋعا قاجەتتى ازىق-تۇلىك ونىمدەرىنىڭ باعاسىن تومەندەتۋگە باعىتتالىپ وتىر. ەكى جىل بۇرىن ورتالىق قۇرىلىسىنا 30 گەكتار جەر تەلىمى بولىنگەن. نىساندا 5 تەمىرجول تارماعى, كونتەينەرلىك الاڭ مەن اۆتوپارك بار.
ال «ا» ساناتىنداعى قويمالاردىڭ اۋماعى – 5 400 شارشى مەتر. قويمالاردا 15,5 مىڭ توننا كوكونىس ونىمدەرىن ساقتاۋعا بولادى.
«بۇل ورتالىقتىڭ ءبىر ەرەكشەلىگى, باتىس قازاقستانداعى بىرەگەي باناننىڭ ءپىسىپ-جەتىلۋىن قامتاماسىز ەتەتىن كامەرا ىسكە قوسىلدى. تۇتىنۋشىلاردان تۇسكەن سۇرانىسقا قاراي باناندى كەزەڭ-كەزەڭىمەن نارىققا شىعارۋ مۇمكىندىگى بار», دەدى ب.جولمۇحانوۆ.
اۋىل شارۋاشىلىعى سالاسىندا 2025–2027 جىلدارى 12 ينۆەستيتسيالىق جوبانى ىسكە اسىرۋ كوزدەلگەن. بۇل جوبالار ارقىلى 460 جاڭا جۇمىس ورنى قۇرىلادى.
جالپى, وبلىس بىلتىر جاقسى وسىممەن جىلدى اياقتادى. وتكەن جىلعى قاڭتار-قازان ايلارىندا اۋىل, ورمان جانە بالىق شارۋاشىلىعى ونىمدەرىنىڭ ءونىمى 116,8 ملرد تەڭگەنى قۇرادى. ونىڭ ىشىندە وسىمدىك شارۋاشىلىعىنداعى ءونىم كولەمى 52,7 ملرد تەڭگە بولسا, مال شارۋاشىلىعى 61,7 ملرد تەڭگەگە جەتتى.
وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى امانگەلدى سالاماتتىڭ دەرەگىنە قاراعاندا, مۇنايلى وڭىردە مال سانى دا كوبەيىپ وتىر. قازىر 238 مىڭ ءمۇيىزدى ءىرى قارا, 590 مىڭ قوي-ەشكى, 150 مىڭعا جۋىق جىلقى, 43 مىڭ تۇيە تىركەلىپتى. مۇنىڭ سىرتىندا 243,8 مىڭ قۇس بار. اتالعان كەزەڭدە 40 مىڭ توننا ەت, 27,6 مىڭ توننا ءسۇت, 43 ملن دانا جۇمىرتقا الىندى.
بىلتىر ەگىستىك القاپتان 144,3 مىڭ توننا ءونىم جينالعان. ونىڭ ىشىندە 68,7 مىڭ توننا كوكونىس, 39,6 مىڭ توننا باقشا ءونىمى, 7,3 مىڭ توننا كارتوپ, 28,6 مىڭ توننا مال ازىقتىق داقىل بار. ماسەلەن, ماحامبەت اۋدانىندا ەگىستىك القاپتىڭ كولەمى ەكى ەسەگە ارتقانى بايقالىپ وتىر. بۇل اۋدانداعى 71 شارۋاشىلىق پەن جەكە سەكتورداعى 5 مىڭ گەكتار القاپقا اۋىل شارۋاشىلىعى داقىلدارى ەگىلدى.
اتىراۋ وبلىسى