ەلوردانىڭ ونەرسۇيەر جۇرتى اپتا سوڭىن اسىعا كۇتىپ وتىر. «استانا وپەرا» ساحناسىندا تەاتردىڭ عاجايىپ قويىلىمدارىنىڭ ءبىرى – پ.چايكوۆسكيدىڭ «اققۋ كولى» بالەتى ۇسىنىلادى. بالەت ترۋپپاسىنىڭ كوركەمدىك جەتەكشىسى – التىناي اسىلمۇراتوۆا, دەپ جازادى Egemen.kz.
وسى جولعى «اققۋ كولى» تىڭ شىعارماشىلىق قادامدارعا تولى بولماق. باستى اققۋ پارتيالارىن ورىندايتىن بالەت ارتىستەرى تورعىن لەبەن (ودەتتا) مەن كاميلا شاحمانوۆا (وديليا) دەبيۋتتىك ونەر كورسەتەدى.
«ودەتتانىڭ پارتياسىن التىناي اسىلمۇراتوۆانىڭ جەتەكشىلىگىمەن دايىنداۋ – مەن ءۇشىن زور مارتەبە ءارى جاۋاپكەرشىلىك. دايىندىق جۇمىستارى تىياناقتى ءجۇرىپ جاتىر. كوركەمدىك جەتەكشىمىز ءاربىر قيمىل مەن دەتالگە نازار اۋدارىپ, تەحنيكامەن عانا ەمەس, بەينەمەن ءارى قيمىل فورماسىمەن دە جۇمىس ىستەيدى. كەز كەلگەن قيمىل, كوزقاراس نەمەسە دەم نە ءۇشىن پايدا بولاتىنىن تۇسىندىرەدى. ءرولىمدى جاقسىراق ءتۇسىنىپ, ونى تەرەڭنەن سەزىنۋگە كومەكتەسەدى», دەيدى تورعىن لەبەن.
سونداي-اق ول ودەتتانىڭ پارتياسىندا قول پلاستيكاسىمەن جۇمىس ىستەۋ – كۇندەلىكتى ەڭبەك ەكەنىن ايتتى.
«ارينە, قولدى اق ۇلپاداي نازىك قىلۋ ءاردايىم ءساتتى شىقپايدى. بىراق قازىر سونىمەن جۇمىس ىستەپ جاتىرمىن. قيمىلدار بىرقالىپتى ءارى اۋىسپالى شىعۋى ءۇشىن يىق, شىنتاق پەن بىلەكتىڭ ۇيلەسىمىنە نازار اۋدارامىن. سونىمەن قاتار سىزىقتار ادەمى ءارى ءتۇزۋ قالپىندا قالۋى ءۇشىن كلاسسيكالىق فورمانى ساقتاۋ ماڭىزدى», دەيدى بالەرينا.
تورعىن لەبەن اق اققۋدىڭ بەينەسى وزىنە كوپ جاعدايدا جاقىن ەكەنىن دە اتاپ ءوتتى.
«ودەتتانىڭ ءتۇرلى ورىنداۋلارىنىڭ بەينەجازبالارىن قاراپ ءجۇرمىن. ونى سول ورىنداۋشىلاردى قايتالاۋ ءۇشىن ەمەس, ءبىر بەينەنىڭ قانشالىقتى ءارتۇرلى ءۇن قاتاتىنىن ءتۇسىنۋ ءۇشىن كورەمىن. ءوز دارالىعىمدى ساقتاپ, وسى پارتيانى ونە بويىمنان وتكىزە وتىرىپ, وسى بەينەدە ءوز ىرعاعىمدى تاپقىم كەلەدى», دەدى بالەت ءارتىسى.
ال كاميلا شاحمانوۆاعا قارا اققۋدىڭ ز ۇلىمدىعى مەن جارقىلىن كورسەتۋ مىندەتى قويىلدى. ورىنداۋشى ءۇشىن بۇل وسى ماۋسىمداعى ب.اسافەۆتىڭ «باقشاساراي بۇرقاعى» بالەتىندەگى ماريانىڭ رولىندەگى تابىستى دەبيۋتىنەن كەيىنگى كەزەكتى ماڭىزدى كەزەڭ بولماق.
«وديليانىڭ بەينەسى ءوزىنىڭ مانەرلىلىگىمەن باۋراپ الادى. ونىڭ مىنەزىن ءتۇسىنۋ ءۇشىن پ.چايكوۆسكيدىڭ مۋزىكاسىنا تەرەڭنەن بويلاۋ كەرەك. سەبەبى وكتەمدىك, ايلاكەرلىك پەن سالتانات – ءبارى سوندا كورسەتىلگەن. مەن ونىڭ حانزادانى وزىنە قاراتىپ الاتىن ەلىكتىرەرلىك قۋاتىن كورسەتۋىم كەرەك. دايىندىق بارىسى قىزىپ جاتىر», دەدى كاميلا شاحمانوۆا.
دارىندى دەبيۋتانتتاردان بولەك, كەيىپكەرلەردىڭ بەينەلەرىندە تەاتردىڭ جەتەكشى سوليستەرى ساحناعا شىعادى. اتاپ ايتساق, ودەتتا-وديليانىڭ پارتياسىن قازاقستاننىڭ ەڭبەك سىڭىرگەن قايراتكەرى ايگەرىم بەكەتاەۆا مەن سوفيا ءادىلحانوۆا تانىستىرادى, ال بەكزات حانزادا زيگفريدتىڭ رولىندە قازاقستاننىڭ ەڭبەك سىڭىرگەن قايراتكەرى ەركىن راحماتۋللاەۆ پەن دياس قۇرمانعازى ونەر كورسەتەدى. «استانا وپەرا» سيمفونيالىق وركەسترىن قويۋشى ديريجەر ارمان ورازعاليەۆ باسقارادى. اعىمداعى تەاتر ماۋسىمى ايگەرىم بەكەتاەۆا ءۇشىن شىعارماشىلىق قىزمەتىنىڭ 15 جىلدىعىمەن تۇسپا-تۇس كەلگەنىن اتاپ وتسەك بولادى. جەتەكشى ءسوليستىڭ ءوزى ايتقانداي, ءبىر كەزدەرى وسى «اققۋ كولىندەگى» باستى پارتياسى ونىڭ تاڭداعان جولىنىڭ دۇرىستىعىنا تۇبەگەيلى كوزىن جەتكىزگەن.
«ششەلكۋنچيك» بالەتى 40 مىڭ كورەرمەن جينادى
جىل باسىندا پ.چايكوۆسكيدىڭ كەزەكتى جاۋھارىن كورسەتۋ تەاتر ءۇشىن يگى داستۇرگە اينالدى. ايتا كەتەتىن ءبىر جايت, رەپەرتۋاردا ۇسىنىلعان ساحنالىق رەداكتسيانىڭ پرەمەراسى 2017 جىلى ومانعا گاسترول كەزىندە وتكەن ەدى. رەسەيدىڭ حالىق ءارتىسى التىناي اسىلمۇراتوۆا تۋىندىنىڭ تاريحي ۇلىلىعىن ساقتاي وتىرىپ, كلاسسيكاعا دەگەن تەرەڭ كوزقاراسىن قوستى. ەۋروپاعا تۋرنە كەزىندە يسپانيا مەن يتالياداعى كورەرمەن دە وسىناۋ بالەتتى تاڭدانىسپەن قارسى العان ەدى.
«استانا بالەت» تەاترى جىلدى جەتىستىكپەن اياقتادى