مەملەكەت باسشىسى قازاقستانداعى ورىس, سلاۆيان جانە كازاك ۇيىمدارى قاۋىمداستىعىنىڭ توراعاسى, پارلامەنت ءماجىلىسىنىڭ دەپۋتاتى سەرگەي پونومارەۆتى قابىلدادى, دەپ جازادى Egemen.kz.
پرەزيدەنت – قازاقستان حالقى اسسامبلەياسىنىڭ توراعاسى قاسىم-جومارت توقاەۆقا جالپىۇلتتىق بىرەگەيلىكتى ودان ءارى ارتتىرۋ, ەل بىرلىگىن نىعايتۋ, وسكەلەڭ ۇرپاقتى وتانشىلدىق رۋحىندا تاربيەلەۋ باعىتىندا قاۋىمداستىقتىڭ اتقارعان قىزمەتى تۋرالى مالىمەت بەرىلدى.
سەرگەي پونومارەۆ ۇلتتى ۇيىستىراتىن فاكتور رەتىندە مەملەكەتتىك ءتىلدى ناسيحاتتاۋداعى سلاۆيان ۇيىمدارىنىڭ جۇمىسى تۋرالى باياندادى.
سونىمەن قاتار قازاقستان حالقى اسسامبلەياسىن دامىتۋدىڭ 2030 جىلعا دەيىنگى «بىرلىگىمىز – ارالۋاندىقتا» تۇجىرىمداماسىن ىسكە اسىرۋ اياسىنداعى قاۋىمداستىقتىڭ بيىلعا ارنالعان جوسپارىن تانىستىردى.
قاسىم-جومارت توقاەۆ ەتنوسارالىق كەلىسىم مەن بىرلىك مەملەكەتتىك ساياساتتىڭ باستى باعىتتارىنىڭ ءبىرى سانالاتىنىن اتاپ ءوتتى. پرەزيدەنتتىڭ پىكىرىنشە, ادىلدىك پەن بارشاعا تەڭ مۇمكىندىك جاساۋ – ادىلەتتى قازاقستاننىڭ نەگىزگى قاعيداتى.
وسى ورايدا قازاقستان حالقى اسسامبلەياسى مەن ونىڭ قۇرامىنا كىرەتىن ۇيىمدار بارلىق ەتنوس وكىلدەرىنىڭ اراسىندا ورتاق قۇندىلىقتاردى قازاقستاندىق پاتريوتيزم نەگىزىندە ناسيحاتتاۋعا جان-جاقتى ىقپال ەتۋگە دەن قويادى.