بەيجىڭدە باق سىنايدى

ء«تورت قۇرلىق چەمپيوناتى» سپورتتىڭ وسى تۇرىندەگى وليمپيا ويىندارى مەن الەم چەمپيوناتتارىنان كەيىنگى ەڭ ماڭىزدى, مارتەبەسى جوعارى جارىس سانالادى. سول سەبەپتى دە وعان تورتكۇل دۇنيەنىڭ بارلىق مىقتى سىرعاناۋشىلارى قاتىسۋعا ەرەكشە قۇشتارلىق تانىتىپ وتىر. ءتۋرنيردىڭ 28 جىلدىق تاريحى بار. تۇساۋكەسەر دودا 1999 جىلى كانادانىڭ گاليفاكس قالاسىندا ۇيىمداستىرىلدى. سول كەزدەن بەرى باسەكەلەر بىردە ەۋروپادا, بىردە امەريكادا, ەندى بىردە ازيادا ۇزدىكسىز ءوتىپ كەلەدى.

جارىستىڭ ەرلەر سايىسىندا كانادانىڭ ءدۇلدۇلدى پاتريك چاننىڭ (2009, 2012, 2016) ءۇش مارتە مەرەيى ۇستەم بولسا, جاپونيالىق تاكاسي حوندا (1999, 2003) مەن دايسۋكە تاكاحاسي (2008, 2011), ۇيەڭ­كى جاپىراقتار ەلىنىڭ تاعى ءبىر مىقتىسى دجەففري باتلل (2002, 2004), امەريكالىق ەۆان لايساچەك (2005, 2007) ەكى رەتتەن تەڭدەسسىز دەپ تانىلدى. ايەلدەر باسەكەسىندە جاپون قىزدارىنىڭ باق جۇلدىزى جانىپ تۇر. ماسەلەن, ماو اسادا (2008, 2010, 2011, 2013) ءتورت مارتە الدىنا جان سالماسا, فۋميە سۋگۋري (2001, 2003, 2005) ءۇش رەت التىننان القا تاقتى. ريكا كيحارا (2019, 2020) مەن ماي ميحارا (2017, 2022) ەكى رەت توپ جاردى.

وزگە قۇرلىق وكىلدەرىنە قارا­عاندا ء«تورت قۇرلىق چەمپيوناتىندا» ازيالىقتاردىڭ تابىسى الدەقايدا قوماقتى ەكەنى داۋسىز. ماسەلەن, 2016 جىلدان بەرى وسى جارىستىڭ جالاۋى توعىز مارتە جەلبىرەسە, سونىڭ توعىزىندا ازيانىڭ ارۋلارى الدىنا جان سالمادى. ونىڭ جەتەۋى – جاپوندار, ەكەۋى – وڭتۇستىككورەيالىقتار. جىگىتتەردىڭ سوڭعى جەتى جارىسى سارى قۇرلىق وكىلدەرىنىڭ جارقىن جەڭىسىمەن اياقتالدى.

ەلىمىزدىڭ سپورتشىلارى دا بۇل جارىستا ءبىر ەمەس, بىرنەشە رەت جەڭىس تۇعىرىنا كوتەرىلدى. وتانداستارىمىزدىڭ اراسىنان العاشقى جۇلدەنى دەنيس تەن يەلەندى. قاپيادا قاراقشىلار قولىنان قازا تاپقان قىران 2015 جىلى سەۋلدە (وڭتۇستىك كورەيا) ەشكىمگە دەس بەرمەي, باس جۇلدەنى ولجالادى. شەشۋشى سىندا ول امەريكالىق دجوشۋا فارريس پەن قىتايلىق يان ءحاندى قاپى قالدىردى. 2019 جىلى اناحايمدا (اقش) ەليزابەت تۇرسىنباەۆا كۇمىسپەن كۇپتەلدى. قازاق قىزى تەك جاپونيانىڭ جۇلدىزى ريكا كيحارادان وزا المادى. 2025 جىلى ميحايل شايدوروۆ شاشاسىنا شاڭ جۇقتىرمادى. باس جۇلدە جو­لىنداعى تارتىستا وڭتۇستىك كورەيانىڭ وعىلانى چحا دجۋنحۆان مەن اقش-تىڭ ارلانى دجيممي ما قاتتى قارسىلىق كورسەتكەنىنە قاراماستان, قازىلار جەرلەسىمىزدىڭ مىقتىلىعىن ءبىر­اۋىزدان مويىندادى.

جالپى, ء«تورت قۇرلىق چەم­پيوناتىندا» نەبارى سەگىز مەم­لەكەتتىڭ وكىلدەرىنە جۇلدە الۋ باقىتى بۇيىردى. ولار – اقش (28 التىن+30 كۇمىس+44 قولا), كانادا (23+30+24), جاپو­نيا (28+24+19), وڭتۇستىك كورەيا (4+5+2), قازاقستان (2+1+0), وز­بەكستان (1+0+0), سولتۇستىك كورەيا (0+0+1). سپورتشىلار اراسىنان ەڭ كوپ ولجاعا كەنەلگەن جۇپتىق باسەكەلەردە باق سىناعان قىتايلىق پان تسين مەن تۋن تسزيان. ولار 9 رەت (5+3+1) جەڭىس تۇعىرىنان قول بۇلعادى. سپورتتىق بيدە ءوز جۇبىن بىرنەشە رەت الماستىرعان ەۆان بەيتيستىڭ باعى جاندى. اقش-تىڭ سىرعاناۋشىسى دا 9 مارتە (3+3+3) مىقتىلار ساناتىنا قوسىلدى. ال باس جۇلدەنى ەڭ كوپ ولجالاعاندار سۋي ۆەنزين مەن حان تسزيان جۇبى. ولار التى التىنعا قول جەتكىزدى. مىنە, جارىستىڭ قىس­قاشا تاريحى وسىنداي.