قايرات ساتىبالدىنىڭ قوناقۇيى مەملەكەتكە قايتارىلدى

ۆەدومستۆونىڭ حابارلاۋىنشا, قوناقۇيدى مەملەكەت مەنشىگىنە وتكىزۋ قارجى مينيسترلىگىنە قاراستى مەملەكەتتىك م ۇلىك جانە جەكەشەلەندىرۋ كوميتەتىنىڭ بۇيرىعى نەگىزىندە راسىمدەلگەن. سىيعا تارتۋ تۋرالى كەلىسىمگە 2023 جىلعى 1 تامىزدا قول قويىلعان. قۇجاتقا سايكەس, الماتى قالاسىنىڭ بوستاندىق اۋدانىنداعى كوكتەم-3 شاعىناۋدانىندا ورنالاسقان, جالپى اۋماعى 9 461,6 شارشى مەتر بولاتىن جىلجىمايتىن م ۇلىك مەملەكەتكە بەرىلگەن.

«2023 جىلعى قىركۇيەكتە قوناقۇي عيماراتى رەسپۋبليكالىق مەنشىككە رەسمي بەكىتىلىپ, الماتى قالاسى بويىنشا سوت اكىمشىلىگى دەپارتامەنتىنىڭ بالانسىنا وتكىزىلدى»,  دەپ ناقتىلادى دەپارتامەنت وكىلدەرى.

قايرات ساتىبالدىنىڭ اتى قوعام نازارىندا 2022 جىلعى ناۋرىزدان بەرى ءجيى اتالىپ كەلەدى. ول سول كەزدە شەتەلگە ۇشپاق بولعان ساتىندە ۇستالعان. سول جىلدىڭ 26 قىركۇيەگىندە سوت ساتىبالدىنى ەكى كومپانياعا كەلتىرىلگەن م ۇلىكتىك زالال مەن قارجى جىمقىرۋ دەرەكتەرى بويىنشا 6 جىلعا باس بوستاندىعىنان ايىردى.

2023 جىلى وعان قاتىستى باسقا دا قىلمىستار بويىنشا تەرگەۋ جالعاستى. قىلمىستىق جولمەن الىنعان كىرىستەردى زاڭداستىرۋ دەرەگى بويىنشا ءىس سوتقا 2024 جىلعى 10 قاڭتاردا تۇسكەن. ال 1 ساۋىردە ساتىبالدى بۇل ايىپتى تولىق مويىندادى.

2024 جىلعى تامىزدا وسكەمەن قالاسىنىڭ № 2 سوتى سوتتالعاننىڭ ءوتىنىشىن قاراپ, جازانىڭ وتەلمەگەن بولىگىن جەڭىلدەتۋ جونىندە شەشىم قابىلدادى. سوت باس بوستاندىعىنان ايىرۋ جازاسىن 3 جىل 3 اي 7 كۇن مەرزىمگە بوستاندىقتى شەكتەۋ جازاسىنا اۋىستىردى. وسى كەزەڭدە قايرات ساتىبالدى مەملەكەتكە ءوز ەركىمەن 700 ملرد تەڭگەدەن اساتىن قاراجات پەن م ۇلىكتى قايتاردى.

انتيكور بۇعان دەيىن ساتىبالدىنىڭ وتەۋ رەتىندە مەملەكەتكە وتكىزگەن كوممەرتسيالىق نىساندارىنىڭ ءتىزىمىن دە جاريالاعان. ولاردىڭ قاتارىندا الماتىنىڭ ەسكى ورتالىعىنداعى Kaisar Plaza ساۋدا-كەڭسە ورتالىعى (33,5 ملرد تەڭگە), وعان قارسى ورنالاسقان Kaisar Towers بيزنەس-ورتالىعى (7,9 ملرد تەڭگە), DoubleTree by Hilton قوناقۇيى (6,49 ملرد تەڭگە), «ارسات» بيزنەس-ورتالىعى (8,9 ملرد تەڭگە), Maisat بيزنەس-ورتالىعى (5,2 ملرد تەڭگە), جاسىل بازارداعى «مەگاتاۋ» ساۋدا ءۇيى (8,9 ملرد تەڭگە), باراحولكاداعى «بايسات» بازارى (15,9 ملرد تەڭگە) جانە استاناداعى «وپتيمۋم» بيزنەس-ورتالىعى (3,2 ملرد تەڭگە) بار.

ەسەنتاي جاعاسىنداعى قوناقۇيدىڭ مەملەكەت مەنشىگىنە ءوتۋى قايرات ساتىبالدى ءىسى اياسىندا قايتارىلعان اكتيۆتەردىڭ ءالى دە جۇيەلى تۇردە راسىمدەلىپ جاتقانىن كورسەتەدى. بۇل پروتسەسس قوعام ءۇشىن سيمۆولدىق مانگە يە بولىپ وتىر.