جىلىوي اۋدانىنداعى شوقپارتوعاي اۋىلىنىڭ تۇرعىندارى اراسىندا سۋىق سۋعا تۇسەتىندەر بار. بۇرىن بۇل ءىستى جارىلقاسىن بايجانوۆ باستاعان ەدى. ەندى ونىڭ جولىن ەراسىل قايىرباي جالعاستىرىپ كەلەدى.
ەراسىلدىڭ اتا-اناسى ومىرگە بەس بالا اكەلىپ, ءبارىن ادالدىق پەن قاراپايىمدىلىققا تاربيەلەدى. وتباسىنداعى ەكىنشى بالا مەكتەپتە وقىعان كەزىنەن كوركەمسوز وقۋعا اۋەس بولىپ, بىرنەشە بايقاۋدىڭ جۇلدەگەرى اتاندى. قازاقتىڭ قايتالانباس بىرنەشە اقىنىنىڭ, اسىرەسە مۇقاعالي ماقاتاەۆتىڭ ولەڭدەرىن جاتقا وقيدى. اكتەر بولۋدى ارمانداعانىمەن, اقتوبە قالاسىنداعى كوللەدجدە اسپاز ماماندىعىن مەڭگەردى.
العاشقى ماماندىعىمەن جاپون اسحاناسىندا جەتى جىل جۇمىس ىستەدى. الايدا ءتۇرلى تاعام دايىنداۋمەن شەكتەلمەي, ماركەتولوگ قىزمەتىنە قىزىعۋشىلىعىق تانىتتى. بۇگىنگى ترەندتەن قالماۋدى كوزدەپ, Instagram مەن TikTok-تا بەلسەندىلىگىمەن تانىلىپ ءجۇر.
«الەۋمەتتىك جەلىنى حايپ قۋ ءۇشىن قولدانبايمىن. دەگەنمەن تسيفرلىق داۋىردە ارتتا قالعىم دە كەلمەيدى. بۇل تۇرعىدا ۇنەمى ىزدەنۋ قاجەت. ۇستاناتىن باستى قاعيدام – ءبىلىم جەتىلدىرۋ, وقۋ, ۇيرەنۋ, العا ۇمتىلۋ», دەيدى ە.قايىرباي.
وسى ورايدا سالاماتتىلىق قاعيداسىمەن دەنساۋلىعىن شىنىقتىرۋعا مىقتاپ دەن قويدى. الدىمەن ايازدى كۇندەرى جەڭىل كيىممەن دالاعا شىقتى. سودان كەيىن سۋىق سۋعا ءتۇسۋدى باستادى.
«باستاپقىدا سۋىق سۋعا ءتۇسۋ وڭاي بولمادى. الدىمەن دەنەمدى قىزدىرىپ, جەڭىل كيىممەن 3-5 شاقىرىم جۇگىرەمىن. سودان سوڭ سۋىق سۋعا تۇسەمىن. سۋىق سۋ 1-1,5 مينۋتتا اعزاعا اسەر ەتە باستايدى. كۇش-قۋاتىڭ ارتادى. ءوزىڭدى جەڭىل سەزىنەسىڭ. دەگەنمەن, شەشەم بۇل قادامىمدى قۇپتاماي, قارسىلىق ءبىلدىردى, دەنساۋلىعىما الاڭدادى. بىراق قىسقى ماۋسىمدا سۋىق سۋعا شومىلۋدان باس تارتپادىم», دەيدى ول.
قازىر ەراسىل زايىبى سابينامەن بىرگە ەگىزى – اسىلحان مەن اسىلدى تاربيەلەپ وتىر. ۇلىن وزىمەن بىرگە وزەنگە اپارىپ, سۋىق سۋعا تۇسۋگە بەيىمدەپ ءجۇر. اۋىلداستارى ونى ء«بىزدىڭ ارامىزداعى «مورج» دەپ اتايدى.
اتىراۋ وبلىسى