مۋزەي سالاسىن دامىتۋ جانە حالىقارالىق ستاندارت ەنگىزۋ اياسىندا الماتى قالاسى مۋزەيلەرى بىرلەستىگىنىڭ قىزمەتكەرلەرى كورەيانىڭ سەۋل جانە كيوندجۋ قالالارىنىڭ جەتەكشى مۋزەيلەرىندە كاسىبي بىلىكتىلىگىن ارتتىرىپ قايتتى, دەپ جازادى Egemen.kz.
الماتى قالاسى مادەنيەت باسقارماسىنىڭ دەرەگىنە سۇيەنسەك, بىلىكتىلىكتى ارتتىرۋ باعدارلاماسى سەۋل قالاسى مۋزەيلەرى بىرلەستىگى تاراپىنان ىسكە استى. ونىڭ بارىسىندا مادەنيەت پەن مۋزەي ءىسى سالاسىنداعى حالىقارالىق ىنتىماقتاستىقتى نىعايتۋ بارىسى قاراستىرىلدى. وقۋ باعدارلاماسى اياسىندا زاماناۋي مۋزەي قىزمەتىنىڭ نەگىزگى باعىتتارى, اتاپ ايتقاندا, ەكسپوناتتاردى ەسەپكە الۋ جانە ساقتالۋىن قامتاماسىز ەتۋ, ونىڭ ىشىندە قولايلى كليماتتىق جاعدايدى باقىلاپ, رەتتەۋ, رەستاۆراتسيا جانە كونسەرۆاتسيا جۇمىستارىن جۇرگىزۋ, تاسىمالداۋ كەزىندە قاۋىپسىزدىك تالاپتارىنىڭ ساقتالۋىن قاداعالاۋ بويىنشا تەوريالىق جانە تاجىريبەلىك ساباقتارى ءوتتى.
الماتى قالاسى مۋزەيلەر بىرلەستىگى مەن سەۋل قالاسى تاريحى مۋزەيى اراسىندا ىنتىماقتاستىق تۋرالى مەموراندۋم 2022 جىلى جاسالدى. كەلىسىم اياسىندا سەۋل قالاسى تاريحى مۋزەيىندە الماتى مۋزەيىنىڭ « ۇلى دالا جاۋھارلارى» كورمەسى, ال سەۋل قالاسى تاريحى مۋزەيىنىڭ «سەۋل عاجايىپتارى» كورمەسى الماتى قالاسىندا ۇيىمداستىرىلعان بولاتىن.
وسى كەلىسىمگە وراي ۇيىمداستىرىلعان تاعىلىمدامادا مۋزەي قىزمەتكەرلەرى سەۋل جانە كەندجۋ قالالارىنىڭ جەتەكشى مۋزەيلەرىنىڭ جۇمىس تاجىريبەسىمەن جان-جاقتى تانىستى. اتاپ ايتقاندا, بۇل تىزىمدە كورەيانىڭ ۇلتتىق مۋزەيى, كورەيا ۇلتتىق فولكلور مۋزەيى, سەۋل قالاسى تاريحى مۋزەيى, سەۋل قولونەر ونەر مۋزەيى, سەدجون پاتشا مۋزەيى, ادميرال لي سۋنسين مۋزەيى, كورەيانىڭ ۇلتتىق ساراي مۋزەيى, كەندجۋ ۇلتتىق مۋزەيى, كەندجۋ ۇلتتىق پاركى, كەنبوككۋن سارايى, چحونگەچحون مۋزەيى, حانياندوسون بەكىنىس-قامالى مۋزەيى بار. سونىمەن قاتار, يۋنەسكو-نىڭ الەمدىك مۇرالار تىزىمىنە ەنگەن اشىق اسپان استىنداعى كەندجۋ ارحەولوگيالىق كەشەنىنىڭ قىزمەتى, وزىق تاجىريبەسى زەردەلەندى.
الماتى