ءماجىلىس دەپۋتاتتارىنىڭ وڭىرلەرگە جوسپارلانعان جۇمىس ساپارلارى ءالى جالعاسىن تاۋىپ كەلەدى. بۇل جولى دەپۋتاتتار اباي, قاراعاندى, باتىس قازاقستان, ۇلىتاۋ وبلىستارى مەن الماتى جانە شىمكەنت قالالارىندا بولىپ, جەرگىلىكتى جۇرتشىلىقپەن كەزدەستى.
ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى نۇرتاي سابيليانوۆ ءۇرجار اۋدانىنا جۇمىس ساپارى بارىسىندا الەۋمەتتىك جانە ينفراقۇرىلىمدىق جوبالاردىڭ ىسكە اسىرىلۋ بارىسىمەن تانىستى, شالعايداعى ەلدى مەكەندەردىڭ تۇرعىندارىمەن كەزدەستى.
دەپۋتات الدىمەن لايبۇلاق اۋىلىنداعى مەديتسينالىق پۋنكتكە بارىپ, ودان كەيىن 2 700-گە جۋىق ادام تۇراتىن تاسكەسكەن اۋىلىنداعى سپورت ءمودۋلىنىڭ جۇمىسىمەن تانىستى.
جۇمىس ساپارىنىڭ سوڭىندا دەپۋتات تاسكەسكەن, لايبۇلاق, التىنشوقى جانە جاڭاتىلەك اۋىلدارىنىڭ تۇرعىندارىمەن كەزدەسۋلەر وتكىزدى. ن.سابيليانوۆ كەزدەسۋدە اۋىلدىڭ دامۋى مەملەكەت باسشىسى بەلگىلەگەن نەگىزگى مىندەتتەردىڭ ءبىرى ەكەنىن اتاپ ءوتتى.
قاراعاندى وبلىسىنا بارعان ءماجىلىس دەپۋتاتتارى, «Amanat» پارتياسى فراكتسياسىنىڭ مۇشەلەرى باۋىرجان سماعۇلوۆ, اسحات ايماعامبەتوۆ, تىلەكتەس ادامبەكوۆ, قۇدايبەرگەن بەكسۇلتانوۆ, ارمان قالىقوۆ, ءۇنزيلا شاپاق جانە نيكيتا شاتالوۆ ساران قالاسىنىڭ يندۋستريالدى ايماعىندا بولات ءتۇزۋ تىگىستى قۇبىرلار شىعاراتىن TEMPO Kazakhstan زاۋىتىنىڭ ىسكە قوسىلۋ بارىسىمەن تانىستى. كاسىپورىن تۇرعىن ءۇي-كوممۋنالدىق شارۋاشىلىققا, قۇرىلىسقا جانە جىلۋ جەلىلەرىنە ارنالعان قۇبىر تۇرلەرىن شىعارۋدى كوزدەپتى. قازىردىڭ وزىندە قوسۋ جۇمىستارى جۇرگىزىلىپ, ءتيىستى كەلىسىمشارتقا سايكەس قۇبىر تۇرلەرى وندىرىلە باستاعان. ال تولىق ءوندىرىس تسيكلىنىڭ العاشقى كەزەڭىن الداعى مامىر ايىندا ىسكە قوسۋ جوسپارلانعان. ارتىنشا ءونىم جەلىسى كەزەڭ-كەزەڭىمەن كەڭەيە بەرمەك. ءماجىلىس دەپۋتاتى باۋىرجان سماعۇلوۆ اتاپ وتكەندەي, مۇنداي ءوندىرىستى ىسكە قوسۋ تەك ءوڭىر ءۇشىن عانا ەمەس, بۇكىل ەل ءۇشىن ستراتەگيالىق ماڭىزعا يە.
باتىس قازاقستان وبلىسىندا بولعان ءماجىلىس دەپۋتاتى, «Amanat» فراكتسياسىنىڭ مۇشەسى سنەجاننا يماشەۆا ورال قالاسىندا Batys Hub يننوۆاتسيالىق ورتالىعىنىڭ ۇجىمىمەن كەزدەسىپ, تسيفرلاندىرۋدىڭ ءوڭىردىڭ دامۋىنا تيگىزەر ىقپالىن تالقىلادى. كەزدەسۋ بارىسىندا دەپۋتات ورتالىقتىڭ قىزمەتىمەن جان-جاقتى تانىسىپ, تسيفرلاندىرۋدىڭ ءوڭىر دامۋىنا تيگىزەر ىقپالىنا ەرەكشە توقتالدى. ول Batys Hub بازاسىندا جۇزەگە اسىرىلىپ جاتقان جوبالاردىڭ ايماق ەكونوميكاسىن ارتاراپتاندىرۋعا, جاستاردىڭ زاماناۋي تسيفرلىق داعدىلاردى مەڭگەرۋىنە جانە يننوۆاتسيالىق باستامالاردىڭ كەڭىنەن قولداۋ تابۋىنا ىقپال ەتەتىنىن اتاپ ءوتتى.
ءماجىلىس دەپۋتاتى, قازاقستان حالىق پارتياسى فراكتسياسىنىڭ مۇشەسى يسلام سۇڭقار وڭىرلەرگە جۇمىس ساپارى اياسىندا شىمكەنت قالاسىنا ات باسىن بۇرىپ, م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىنە باردى. ۋنيۆەرسيتەتتىڭ پروفەسسور-وقىتۋشىلار قۇرامىمەن جانە ستۋدەنتتەرىمەن اشىق فورماتتا وتكەن كەزدەسۋدە جوعارى ءبىلىم بەرۋ مەن عىلىم سالاسىنداعى وزەكتى ماسەلەلەر جان-جاقتى تالقىلاندى. ۋنيۆەرسيتەت ۇجىمى مەن ءبىلىم الۋشىلار ءماجىلىس دەپۋتاتىنا وزدەرىن تولعاندىرعان سۇراقتارىن قويىپ, جوعارى ءبىلىم بەرۋ جۇيەسىن جەتىلدىرۋگە باعىتتالعان ناقتى ۇسىنىستارىن ورتاعا سالدى.
ءماجىلىس دەپۋتاتتارىنىڭ جەزقازعان تۇرعىندارىمەن كەزدەسۋىندە بالالار سپورتىن قولداۋ ماسەلەلەرى ءسوز بولدى. «Amanat» پارتياسى فراكتسياسىنىڭ مۇشەلەرى ەربولات ساتىبالدى مەن امانجول ءالتاي جەزقازعان قالاسىنداعى زاماناۋي CK-NAMYS سپورت اكادەمياسىنا بارىپ, جاس سپورتشىلاردى دايارلاۋ بارىسىمەن تانىستى. «CK-NAMYS» سپورت اكادەمياسى «Amanat» پارتياسىنىڭ سايلاۋالدى باعدارلاماسى اياسىندا سالىنعانىن اتاپ وتكەن ءجون. جوباعا شامامەن 4 ملرد تەڭگە ينۆەستيتسيا سالىندى. 10–16 جاس ارالىعىنداعى 200-گە جۋىق بالانى دايارلاۋعا ارنالعان اكادەميادا قازىرگى تاڭدا 152 جاس سپورتشى ءبىلىم الىپ جاتىر.
ءماجىلىس دەپۋتاتتارى, «Amanat» پارتياسى فراكتسياسىنىڭ مۇشەلەرى ايگۇل قۇسپان, سەرگەي پونومارەۆ جانە ايدوس سارىم الماتى قالاسىنىڭ تۇرعىندارىمەن كەزدەسىپ, مەگاپوليستەگى بىرقاتار ۇيىمدار مەن مەكەمەلەردى, ونىڭ ىشىندە الەۋمەتتىك ينفراقۇرىلىم جانە مادەنيەت نىساندارىن ارالادى. ازاماتتاردى جەكە قابىلداۋ بارىسىندا ءماجىلىس دەپۋتاتى ايدوس سارىم تۇرعىنداردىڭ ءوتىنىش-تىلەكتەرىن تىڭداپ, بىرقاتار ماسەلەلەر بويىنشا قولدانىستاعى زاڭناما اياسىندا تۇسىندىرمەلەر بەردى. ال كەيبىر وتىنىشتەر قوسىمشا زەردەلەۋ ءۇشىن جۇمىسقا الىندى.
ءماجىلىس دەپۋتاتى سەرگەي پونومارەۆ الماتىداعى مۇحتار اۋەزوۆ اتىنداعى مەملەكەتتىك اكادەميالىق دراما تەاترىنىڭ عيماراتىنا, ال ايگۇل قۇسپان الماتى وبلىسىندا ورنالاسقان ۇلتتىق قاۋىپسىزدىك كوميتەتى شەكارا قىزمەتىنىڭ تەحنيكالىق جانە كاسىپتىك ءبىلىم بەرۋ بولىمشەسىنە باردى.
سونىمەن قاتار دەپۋتاتتار ناۋرىزباي اۋدانىنداعى شۇعىلا شاعىن اۋدانىندا سالىنىپ جاتقان II ءتيپتى ءورت ءسوندىرۋ دەپوسىنىڭ قۇرىلىسىمەن تانىستى. بۇل نىسان «Amanat» پارتياسىنىڭ سايلاۋالدى باعدارلاماسى اياسىندا جۇزەگە اسىرىلىپ جاتىر.