بۇل كۇندەرى اۋستراليانىڭ بريسبەن قالاسىندا جۇلدە قورى 1 691 602 دوللاردى قۇرايتىن WTA 500 ءتۋرنيرى ءوتىپ جاتىر. اتالعان دوداعا الەمنىڭ بىرقاتار مىقتى تەننيسشىلەرى قاتىسۋدا.
دۇنيەجۇزىلىك رەيتينگتە بەسىنشى ورىندا تۇرعان ەلىمىزدىڭ ءبىرىنشى راكەتكاسى ەلەنا رىباكينا 2024 جىلى ءدال وسى جارىستىڭ جەڭىمپازى اتانعان بولاتىن. فينالدا ول ارينا سوبولەنكوعا سان سوقتىرعان ەدى. وسى قوس ويىنشى WTA-نىڭ بىلتىرعى جىلعى قورىتىندى تۋرنيرىندە دە باس جۇلدەنى ءوزارا ساراپقا سالدى. بۇل باسەكەدە دە جەرلەسىمىز جەڭىسكە جەتتى. رەيتينگتە جوعارى ورىنداردىڭ ءبىرىن يەلەنگەندىكتەن, ەلەنا ءبىرىنشى اينالىمدا بوس بولدى. ەكىنشى كەزەڭدە قىتايلىق چجان شۋايعا 6:3, 7:5 ەسەبىمەن شاڭ قاپتىرعان ول ءۇشىنشى اينالىمدا يسپانيالىق پاۋلا بادوسامەن شەبەرلىك بايقاستى. كەزىندە الەمنىڭ ەكىنشى راكەتكاسى بولعان پيرەنەي تۇبەگىنىڭ وكىلى جەرلەسىمىزگە جارىتىپ قارسىلىق كورسەتە المادى. ەسەپ – 6:3, 6:2. شيرەك فينالدا رىباكينا WTA رەيتينگىندە 20-ورىندا تۇرعان چەحيالىق كارلوينا مۋحوۆادان ويدا-جوقتا ۇتىلىپ قالدى – 2:6, 6:2, 4:6. وسى مەجەگە جەتكەنى ءۇشىن وتانداسىمىز 195 رەيتينگتىك ۇپاي الىپ, 37 640 دوللاردى ءاميانىنا سالدى.
ەلىمىزدىڭ ەكىنشى راكەتكاسى يۋليا پۋتينتسەۆا دا بريسبەندە بوي كورسەتتى. تۇساۋكەسەر كەزدەسۋىندە اقش ويىنشىسى حەيلي ءباپتيستى قاپى قالدىرعان ول كەلەسى كۇنى ۋكراينالىق مارتا كوستيۋكپەن كەزدەسىپ, وعان 6:7, 1:6 ەسەبىمەن ەسە جىبەردى.
جاسىل قۇرلىقتا WTA-مەن قوسا اتر ءتۋرنيرى دە قاتار ءوتىپ جاتىر. بۇل جارىستا الەكساندر شەۆچەنكو ىرىكتەۋدىڭ العاشقى اينالىمىندا ءسۇرىندى. ول بەلگيالىق رافاەل كوللينونگە جول بەردى – 5:7, 4:6.
جۇپتىق سايىستا اننا دانيلينا ءبىرشاما جاقسى ونەر كورسەتتى. سەربيالىق الەكساندرا كرۋنيچپەن بىرگە ول امەريكالىق دەزيرا كراۆچيك پەن سوفيا كەنيندى, رەسەيلىك ەكاتەرينا الەكساندروۆا مەن ميررا اندرەەۆا جۇبىن ۇتىپ, جارتىلاي فينالعا دەيىن جەتتى. الايدا بۇل مەجەدە ولاردى يسپانيا مەن اۋستراليا وكىلدەرى كريستينا بۋكشا مەن ەللەن پەرەس توقتاتتى.