وڭىرگە دەم بەرگەن ءوندىرىس: تۇركىستان قالاي تۇلەپ جاتىر؟

الدىمەن دەپۋتاتتار بادام اۋىلدىق وكرۋگىندەگى يندۋستريالدى ايماقتا ورنالاسقان Central Asia Aluminium Company سەرىكتەستىگىنىڭ جۇمىسىمەن تانىستى. بۇل كاسىپورىن اليۋميني پروفيلدەرىن وندىرەدى. مۇندا 200 ادام تۇراقتى ەڭبەك ەتىپ ءجۇر. جوبانىڭ العاشقى كەزەڭىندە 4 ملرد 400 ملن تەڭگە ينۆەستيتسيا سالىنعان. زاۋىتتا شىعارىلاتىن ءونىمنىڭ باسىم بولىگى ەكسپورتقا جونەلتىلەدى.

دەپۋتاتتار بۇل ءوندىرىستى مەملەكەت باسشىسى قاسىم جومارت توقاەۆتىڭ وڭدەۋ ونەركاسىبىن دامىتۋ, وتاندىق ءونىم كولەمىن ارتتىرۋ جانە ەكسپورتقا باعىتتالعان كاسىپورىنداردى قولداۋ جونىندەگى تاپسىرمالارىنىڭ ناقتى كورىنىسى دەپ باعالادى. ءوندىرىستىڭ ءوڭىر ەكونوميكاسىنا سەرپىن بەرىپ وتىرعانى ايتىلدى.

ساپار بارىسىندا اگرارلىق سالانىڭ مۇمكىندىكتەرى دە نازاردان تىس قالعان جوق. اۋىل شارۋاشىلىعى مەن وڭدەۋ ونەركاسىبىن قاتار دامىتۋ, اگرارلىق ءونىمدى تەرەڭ وڭدەپ, ىشكى جانە سىرتقى نارىققا شىعارۋ ماسەلەلەرى ءسوز بولدى. بۇل باعىت پرەزيدەنت بەلگىلەگەن نەگىزگى باسىمدىقتاردىڭ ءبىرى ەكەنى اتاپ ءوتىلدى. وسى ماقساتتاعى زاڭنامالىق جانە ينستيتۋتسيونالدىق شارالار «AMANAT» پارتياسىنىڭ سايلاۋالدى باعدارلاماسىندا دا قامتىلعان.

ءماجىلىس دەپۋتاتى تەمىر قىرىقباەۆ ءوندىرىس پەن اۋىل شارۋاشىلىعى جوبالارىنىڭ ەل ءۇشىن ماڭىزىن اتاپ ءوتتى. 

«وڭىرلەردە ءىرى ءوندىرىس ورىندارىنىڭ اشىلۋى ەكونوميكانى ءارتاراپتاندىرۋ ساياساتىنىڭ ناقتى ناتيجەسىن كورسەتىپ وتىر. ءوندىرىس پەن اۋىل شارۋاشىلىعىن بىرگە دامىتۋ وتە ماڭىزدى. پارلامەنت ينۆەستورلار ءۇشىن قولايلى زاڭنامالىق ورتا قالىپتاستىرۋعا جانە وتاندىق كاسىپورىنداردىڭ باسەكەگە قابىلەتىن ارتتىرۋعا باعىتتالعان جۇمىستى جالعاستىرا بەرەدى», دەدى ول.

دەپۋتاتتار شۇبارسۋ اۋىلىندا جۋىردا پايدالانۋعا بەرىلگەن 600 ورىندىق پاراسات جالپى ءبىلىم بەرۋ مەكتەبىنە دە باردى. بۇل نىسان «AMANAT» پارتياسىنىڭ سايلاۋالدى باعدارلاماسى اياسىندا جانە پرەزيدەنتتىڭ ءبىلىم بەرۋ ينفراقۇرىلىمىن دامىتۋ جونىندەگى تاپسىرمالارىنا سايكەس جۇزەگە اسىرىلعان.

وتكەن جىلدىڭ جەلتوقسان ايىندا اشىلعان ءۇش قاباتتى مەكتەپتە اسحانا, كىتاپحانا, وقۋ زالى, سپورت جانە اكت زالدارى, مەديتسينالىق پۋنكت جانە زاماناۋي پاندىك كابينەتتەر بار. مۇندا 70 جۋىق ادام تۇراقتى جۇمىسپەن قامتىلعان.

شۇبارسۋ اۋىلى تۇرعىندارى ەڭ كوپ شوعىرلانعان ەلدى مەكەندەردىڭ ءبىرى سانالادى. اۋىلدا 50000 استام ادام تۇرادى. قازىرگى تاڭدا 15 مەكتەپتە 12000 استام بالا ءبىلىم الىپ ءجۇر. جاڭا مەكتەپ وسى جۇكتەمەنى ازايتىپ, ءبىلىم ساپاسىن ارتتىرۋعا ىقپال ەتىپ وتىر.

ءماجىلىس دەپۋتاتى قايرات بالابيەۆ بۇل جوبانىڭ ستراتەگيالىق مانىنە توقتالدى. 

ء«بىلىم بەرۋ ينفراقۇرىلىمىن دامىتۋ ەلدىڭ بولاشاعىنا سالىنعان ينۆەستيتسيا. مەملەكەت باسشىسىنىڭ باستاماسىمەن ىسكە اسىپ جاتقان بۇل جوبالار اۋىل مەن قالا اراسىنداعى ءبىلىم الشاقتىعىن ازايتۋعا باعىتتالعان. بۇل پارتيانىڭ سايلاۋالدى باعدارلاماسىنداعى نەگىزگى باسىمدىقتاردىڭ ءبىرى», دەدى ق. بالابيەۆ.

جالپى وتكەن جىلى تۇركىستان وبلىسىندا 20 جۋىق جاڭا مەكتەپ پايدالانۋعا بەرىلگەن. سونىڭ بەسەۋى ورداباسى اۋدانىندا ورنالاسقان. بۇل وڭىردە الەۋمەتتىك ينفراقۇرىلىمعا ەرەكشە كوڭىل ءبولىنىپ وتىرعانىن كورسەتەدى.

جۇمىس ساپارىنىڭ سوڭىندا دەپۋتاتتار جەرگىلىكتى كاسىپكەرلەرمەن, اگرارلىق سالا وكىلدەرىمەن جانە ءبىلىم بەرۋ ۇيىمدارىنىڭ باسشىلارىمەن پىكىر الماستى. ينۆەستيتسيالىق احۋالدى جاقسارتۋ, اۋىل شارۋاشىلىعى مەن ءوندىرىس كەشەندەرىن دامىتۋ جانە وڭىرلەرگە جۇيەلى قولداۋ كورسەتۋ ماسەلەلەرى تالقىلاندى. ايتىلعان ۇسىنىستار الداعى ۋاقىتتا ءماجىلىس قابىرعاسىندا جان جاقتى قارالاتىن بولدى.