جاڭا جىلداعى العاشقى ۇلتتىق بىرىڭعاي تەستىلەۋ قاڭتار ايىندا وتەتىنى بەلگىلى. وسى تەستىلەۋگە قاتىسۋ ءۇشىن ءوتىنىم بەرۋ اياقتالدى. عىلىم جانە جوعارى ءبىلىم مينيسترلىگى تاراتقان اقپاراتقا سۇيەنسەك, رەسپۋبليكا بويىنشا قاڭتارداعى ۇبت-عا قاتىسۋعا نيەتتىلەردىڭ قاتارى بىلتىرعىدان كوپ.
ۇبت-نىڭ ءوزى 10 قاڭتار مەن 10 اقپان ارالىعىندا وتەدى. بيىلعى قاڭتار ايىندا وتەتىن ۇبت-عا قاتىسۋ ءۇشىن ءوتىنىم بەرگەن ۇمىتكەرلەردىڭ سانى وتكەن جىلمەن سالىستىرعاندا 20 مىڭعا ارتىپ وتىر.
ۇلتتىق تەستىلەۋ ورتالىعى حابارلاعانداي, 2026 جىلى ۇلتتىق بىرىڭعاي تەستىلەۋدىڭ فورماتى وزگەرىسسىز قالادى. تالاپكەرلەر ءۇش مىندەتتى ءپاندى جانە تاڭداۋى بويىنشا ەكى بەيىندى ءپاندى تاپسىرادى. ۇبت تاپسىرمالارىنىڭ جالپى سانى – 120. ونىڭ ىشىندە «قازاقستان تاريحى» ءپانى بويىنشا 20 تاپسىرما, «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن 10 تاپسىرمادان, سونداي-اق ەكى بەيىندى ءپاننىڭ ارقايسىنان 40 تاپسىرمادان بەرىلەدى. ۇبت بويىنشا ەڭ جوعارى بالل دا وزگەرمەيدى, 140 بالدى قۇرايدى.
تەستىلەۋ ۋاقىتى 4 ساعاتتان, ياعني 240 مينۋتتان تۇرادى. بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك. وسىعان قوسا تالاپكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن جانە پۋنكتىن وزدەرى تاڭدادى.
ۇبت تاپسىرۋ كەزىندە كالكۋلياتور, حيميالىق ەلەمەنتتەردىڭ پەريودتىق جۇيەسى (مەندەلەەۆ كەستەسى) جانە تۇزداردىڭ ەرىگىشتىك كەستەسىن تەستىلەۋ كومپيۋتەرىندە اشىق قولدانا الادى. وسى اتالعان كەستەلەر مەن ەسەپتەۋ قۇرالى الدىن الا جۇكتەلگەن.
ەسكەرۋگە ءتيىس ءبىر نارسە بار, تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرۋگە قۇقىلى. اپەللياتسياعا ءوتىنىش بەرگەن تەستىلەنۋشىلەردىڭ سەرتيفيكاتى اپپەلياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە شىعادى.
ۇمىتكەرلەردىڭ قۇقىن قورعاۋعا قوسا ولارعا قويىلاتىن تالاپ تا قاتاڭ. ماسەلەن, ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى. ءدال وسى تالاپقا بايلانىستى ۇتىپ العان گرانتىنان ايىرىلعان جاعدايلار دا كەزدەسكەن. سول سەبەپتى تەستىلەنۋشىلەرگە بۇل ەرەجەنى ەستەن شىعارماعان ابزال.
ەسكە سالا كەتسەك, قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعاندار, شىعارماشىلىق ببت-دان اقىلى نەگىزدە باسقا دايىندىق باعىتتارىنا, پەداگوگيكالىق باعىتقا اقىلى نەگىزدە اۋىسقىسى كەلەتىندەر, وتكەن جىلعى مەكتەپ جانە كوللەدج تۇلەكتەرى, ەلىمىزدىڭ ازاماتى ەمەس ۇلتى قازاق تۇلعالار, شەتەلدە ءبىلىم العان قازاقستان ازاماتتارى, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
ايتپاقشى, بىلتىرعى ناتيجەنى ەسكە تۇسىرسەك, 2025 جىلدىڭ قاڭتارىنداعى ۇبت-دا شەكتى بالدى 70,35%-عا جۋىق تالاپكەر جيناعان ەدى. ورتاشا بالل 65-ءتى, ەڭ جوعارى بالل 139-دى قۇراعان بولاتىن. سونىمەن قاتار ول كەزدە تالاپكەرلەر «وقۋ ساۋاتتىلىعى» ءپانىن جوعارى دەڭگەيدە تاپسىردى. ورتاشا ەسەپپەن سۇراقتاردىڭ 75,43%-ىنا دۇرىس جاۋاپ بەرىلگەن. ال «فيزيكانى» تاپسىرعان تالاپكەرلەردىڭ تەك 32,32% تاپسىرمانى دۇرىس ورىنداعان, ولار ءۇشىن «ەلەكتروماگنيتتىك يندۋكتسيا» تاقىرىبى قيىن بولعان. ال بيىلعى كورسەتكىشتەردىڭ قانداي بولاتىنىن ۋاقىت كورسەتەدى, ناقتىراق ايتساق, 10 اقپاننان كەيىن بەلگىلى بولادى.