الماتى وبلىسى, جامبىل اۋدانىنىڭ سۇرانشى, جايسان اۋىلدارىندا مەملەكەت باسشىسىنىڭ تاپسىرماسىنا سايكەس جۇزەگە اسىرىلىپ جاتقان «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا زاماناۋي تالاپتارعا ساي دارىگەرلىك امبۋلاتوريالار ءوز جۇمىسىن باستادى.
جاڭا مەديتسينالىق نىسانداردىڭ اشىلۋ راسىمىنە وبلىس اكىمىنىڭ ءبىرىنشى ورىنباسارى قانات ەسبولاتوۆ قاتىستى. اۋىلدىق جەرلەردە ساپالى مەديتسينالىق قىزمەت كورسەتۋ وڭىرلىك, ۇلتتىق دەڭگەيدەگى باسىم مىندەتتەردىڭ ءبىرى ەكەنىن ايتا كەلە: «حالىق دەنساۋلىعى – مەملەكەتتىڭ باستى قۇندىلىعى. وسىعان وراي اۋىل تۇرعىندارىن ساپالى ءارى قولجەتىمدى مەديتسينالىق كومەكپەن قامتاماسىز ەتۋ ماقساتىندا وسىنداي نىسانداردى جۇيەلى تۇردە ىسكە قوسىپ كەلەمىز. اتقارىلىپ جاتقان جۇمىستاردىڭ بارلىعى اۋىل حالقىنىڭ ءومىر ءسۇرۋ ساپاسىن ارتتىرۋعا, دەنساۋلىق ساقتاۋ جۇيەسىن ودان ءارى دامىتۋعا باعىتتالعان مەملەكەتتىك ساياساتتىڭ ناقتى ناتيجەسى. جاڭا نىسان ەل يگىلىگىنە ۇزاق جىلدار بويى ادال قىزمەت ەتەدى دەپ سەنەمىز», – دەدى ق.ەسبولاتوۆ.
سۇرانشى اۋىلىنداعى دارىگەرلىك امبۋلاتوريا 1981 جىلى سالىنعان عيماراتتا ورنالاسقان. بۇرىن قاتتى وتىنمەن جىلىتىلعان نىسان 2007 جىلدان باستاپ تابيعي گازعا قوسىلعان. ۇلتتىق جوبا اياسىندا امبۋلاتوريا عيماراتى تولىقتاي جاڭعىرتىلىپ, زاماناۋي مەديتسينالىق تالاپتارعا سايكەستەندىرىلدى. بۇگىندە مۇندا فيزيوتەراپيا, ەمدىك دەنە شىنىقتىرۋ, دارىگەرگە دەيىنگى قابىلداۋ, اكۋشەرلىك قىزمەت, كۇندىزگى ستاتسيونار, وقشاۋلاعىش, اناليز جيناۋ كابينەتتەرى جۇمىس ىستەيدى. مەديتسينالىق مەكەمە اۋىل تۇرعىندارىنا العاشقى مەديتسينالىق-سانيتارلىق كومەكتى ساپالى ءارى ۋاقتىلى كورسەتۋگە مۇمكىندىك بەرەدى.
جايسان اۋىلىندا 1960 جىلى سالىنعان ەسكى عيماراتتىڭ ورنىنا جاڭا, زاماناۋي مەديتسينالىق نىسان بوي كوتەردى. 2 527 تۇرعىنعا قىزمەت كورسەتەتىن امبۋلاتوريا قاجەتتى مەديتسينالىق قۇرال-جابدىقتارمەن تولىق قامتاماسىز ەتىلگەن. جاڭا عيماراتتىڭ ىسكە قوسىلۋى اۋىل تۇرعىندارىنىڭ مەديتسينالىق كومەككە قولجەتىمدىلىگىن ەداۋىر ارتتىرىپ, ساپالى قىزمەت الۋعا جول اشتى.
جالپى, الماتى وبلىسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بارلىعى 38 دەنساۋلىق ساقتاۋ نىسانىنىڭ قۇرىلىسى قاراستىرىلعان. جوبانى جۇزەگە اسىرۋعا 8,3 ملرد تەڭگە بولىنگەن. ونىڭ ىشىندە جامبىل اۋدانىنىڭ 16 ەلدى مەكەنىندە 7 دارىگەرلىك امبۋلاتوريا, 3 فەلدشەرلىك-اكۋشەرلىك پۋنكت, 6 مەديتسينالىق پۋنكتتىڭ قۇرىلىسى جۇرگىزىلدى. بۇگىندە 16 مەديتسينالىق نىساننىڭ 7-ەۋى پايدالانۋعا بەرىلگەن, قالعان 9 نىساندى جاقىن مەرزىمدە تولىق اياقتاۋ جوسپارلانعان.
جاڭا مەديتسينالىق مەكەمەلەردىڭ پايدالانۋعا بەرىلۋى اۋىل تۇرعىندارىنىڭ ءومىر ءسۇرۋ ساپاسىن ارتتىرىپ قانا قويماي, پروفيلاكتيكالىق شارالاردى كۇشەيتۋگە, اۋرۋلاردى ەرتە انىقتاۋعا, مەديتسينالىق قىزمەتتەردىڭ ساپاسىن جاقسارتۋعا مۇمكىندىك بەرەدى. بۇل ءوز كەزەگىندە اۋىلدىق جەرلەردەگى حالىق دەنساۋلىعىن نىعايتىپ, ۇلتتىق دەنساۋلىق ساقتاۋ جۇيەسىن دامىتۋدىڭ ماڭىزدى قۇرامداس بولىگىنە اينالادى.
الماتى وبلىسى,
جامبىل اۋدانى