جەلتوقسان ايىندا ەل ازاماتتارى زەينەتاقى جيناعىن بۇرىن-سوڭدى بولماعان قارقىنمەن پايدالاندى. ءبىر ايدىڭ ىشىندە تۇرعىن ۇيگە باعىتتالعان قارجى كولەمى جۇزدەگەن ميلليارد تەڭگەگە جەتىپ, نارىقتا ايقىن قوزعالىس تۋعىزدى, دەپ جازادى Egemen.kz.
ساراپتامالىق دەرەكتەرگە قاراعاندا, ءبىر ايدىڭ ىشىندە 339 مىڭنان استام ءوتىنىش قاناعاتتاندىرىلىپ, ازاماتتار باسپانا ماسەلەسىنە 221 ملرد تەڭگەدەن استام قاراجات جۇمساعان. بۇل قاراشا ايىنداعى كورسەتكىشتەن بىرنەشە ەسە جوعارى.
ەڭ كوپ قاراجات تۇرعىن ءۇي قۇرىلىس جيناق جۇيەسىندەگى سالىمدى تولىقتىرۋعا باعىتتالدى. جەلتوقساندا وسى ماقساتتا 182 مىڭ ادام زەينەتاقى جيناعىن پايدالانعان. بۇل الدىڭعى ايمەن سالىستىرعاندا ءتورت ەسەگە جۋىق ءوسىم. اتالعان باعىتتاعى قارجى كولەمى دە 118 ملرد تەڭگەدەن اسىپ, جالپى كورسەتكىشتىڭ نەگىزگى بولىگىن قۇرادى.
زەينەتاقى قورىنان ءتىس ەمدەۋگە 200 ملرد تەڭگە زاڭسىز شىعارىلعان
ماماندار مۇنداي بەلسەندىلىكتى جىلدىڭ سوڭىنا ءتان بىرنەشە فاكتورلارمەن بايلانىستىرادى. سونىڭ ءبىرى – تۇرعىن ءۇي قۇرىلىس جيناق جۇيەسىندە مەملەكەت بەرەتىن سىيلىقاقىنىڭ جىل اياعىنا دەيىن سالىنعان قاراجاتتى قامتيتىنى. وسى مۇمكىندىكتى پايدالانۋ ءۇشىن كوپتەگەن ازامات ءدال جەلتوقساندا شەشىم قابىلداعان.
سونىمەن قاتار يپوتەكالىق قارىزدى ءىشىنارا وتەۋ سەكىلدى باسقا دا ماقساتتار بويىنشا وتىنىشتەر سانى ارتقان. بۇل زەينەتاقى جيناعىن تەك جاڭا باسپانا الۋ ەمەس, بۇرىنعى مىندەتتەمەلەردى جەڭىلدەتۋ قۇرالى رەتىندە دە قولدانۋ ءۇردىسىنىڭ كۇشەيگەنىن اڭعارتادى.
ەلىمىزدە زەينەتاقى مەن جاردەماقى مولشەرى كوبەيدى
جەلتوقسان ايىنداعى قاربالاسقا تاعى ءبىر جايت اسەر ەتتى. 2026 جىلعا ارنالعان ەڭ تومەنگى جەتكىلىكتىلىك شەكتەرىنىڭ وسەتىنى الدىن الا جاريالاندى. ورتا ەسەپپەن 10 پايىزعا ۇلعايعان جاڭا تالاپتار كەلەسى جىلدان باستاپ كۇشىنە ەنەدى. وسىعان بايلانىستى كوپتەگەن سالىمشى بۇرىنعى شارتتارمەن ۇلگەرىپ قالۋعا تىرىسقان.
ساراپشىلاردىڭ پىكىرىنشە, جىل سوڭىنداعى بۇل سەرپىن زەينەتاقى جۇيەسىنە عانا ەمەس, تۇرعىن ءۇي نارىعىنا دا ايتارلىقتاي ىقپال ەتتى. ال الداعى كەزەڭدە ازاماتتاردىڭ مۇنداي مۇمكىندىكتى قالاي پايدالاناتىنى جاڭا تالاپتار اياسىندا ايقىندالا تۇسپەك.
زەينەتاقى تولەمدەرى سالىقتان بوساتىلىپ, كوپبالالى وتباسىلارعا شەگەرىمدەر ەنگىزىلدى