ەكىنشى دۇنيەجۇزىلىك سوعىسىنىڭ ارداگەرى پاۆەل ۆاسيلەۆيچ داتسەنكو 7 قاڭتاردا 101 جاسقا تولدى. قوستاناي وبلىسىنىڭ قورعانىس ىستەرى جونىندەگى دەپارتامەنتىنىڭ اسكەري قىزمەتشىلەرى مايدانگەردىڭ ۇيىنە ارنايى بارىپ, تۋعان كۇنى جانە روجدەستۆو مەرەكەسىمەن قۇتتىقتادى, دەپ حابارلايدى Egemen.kz.
دەپارتامەنت وكىلدەرى قورعانىس ءمينيسترىنىڭ اتىنان جولدانعان قۇتتىقتاۋ حاتىن ارداگەرگە تابىستاپ, وعان مىقتى دەنساۋلىق, ۇزاق عۇمىر تىلەدى.
ء«سىز ۇلى جەڭىسكە ولشەۋسىز ۇلەس قوسقان, باتىرلىق پەن تاباندىلىقتى تۋ ەتكەن قاھارمان ۇرپاقتىڭ وكىلىسىز. ءسىزدىڭ ءومىر جولىڭىز ءبىز ءۇشىن وتانسۇيگىشتىك پەن حالقىنا ادال قىزمەت ەتۋدىڭ جارقىن ۇلگىسى», دەدى ارداگەرلەرمەن جۇمىس جونىندەگى قىزمەت باسشىسى لەيتەنانت اديا نۇرپەيىسوۆا.
قورعانىس مينيسترلىگىنىڭ مالىمەتىنشە, پاۆەل داتسەنكو 1925 جىلى قوستاناي وبلىسىنىڭ ۆلاديميروۆكا اۋىلىندا دۇنيەگە كەلگەن. 1942 جىلدىڭ جەلتوقسانىندا مايدانعا اتتانىپ, ەكىنشى ۋكراينا مايدانىنىڭ قۇرامىندا شايقاسقان. ول كۋرسكتەگى ۇرىستارعا, كورسۋن-شەۆچەنكو جانە ياسسى-كيشينەۆ شابۋىل وپەراتسيالارىنا قاتىسىپ, رۋمىنيا, ۆەنگريا, چەحوسلوۆاكيا جەرلەرىن ازات ەتۋگە اتسالىستى. جەڭىستى ۆەنا قالاسىنىڭ ماڭىندا قارسى العان. سوعىس جىلدارىندا بىرنەشە رەت جاراقات الدى. بەيبىت ومىردە ۇلتتىق قاۋىپسىزدىك كوميتەتى ورگاندارىندا قىزمەت ەتتى.
مايدانگەردىڭ ەرلىگى II دارەجەلى وتان سوعىسى وردەنىمەن, «گەرمانيانى جەڭگەنى ءۇشىن», «ەرلىگى ءۇشىن», «كەڭەس وداعىنىڭ مارشالى جۋكوۆ» مەدالدارىمەن باعالاندى. سونداي-اق پرەزيدەنت جارلىعىمەن «ەرەن ەڭبەگى ءۇشىن» مەدالىمەن ماراپاتتالعان.