2025 جىلى قۇزىرلى ورگاندار بايلانىس وپەراتورلارىمەن بىرلەسىپ, 19 ميلليوننان استام جالعان قوڭىراۋدى بۇعاتتاپ, 85 ميلليوننان استام الاياقتىق قوڭىراۋدىڭ جولىن كەستى, دەپ جازادى Egemen.kz.
الاياقتىققا قاتىستى قىلمىستىق توپتاردى قۇرۋ جانە باسقارۋ فاكتىلەرى بويىنشا 6 قىلمىستىق ءىس قوزعالسا, ولاردىڭ بىرەۋى ترانسۇلتتىق سيپاتقا يە. سونىمەن قاتار قابىلدانعان تەحنيكالىق شارالاردىڭ ناتيجەسىندە قىلمىسكەرلەر پايدالانعان 100 مىڭنان استام SIM-كارتا جانە 88 SIM-box قۇرىلعىسى تاركىلەندى.
بىلتىر قازاقستاننان تىس جەرلەردە ورنالاسقان 7 call-ورتالىقتىڭ زاڭسىز قىزمەتى توقتاتىلدى.
بۇدان بولەك, ەل اۋماعىندا تاعى وسىنداي 6 ورتالىقتىڭ قىزمەتى جويىلدى.
ىشكى ىستەر مينيسترلىگى كيبەرقىلمىسقا قارسى كۇرەس باعىتىنداعى جۇمىستاردى جالعاستىرادى.
ازاماتتاردى تسيفرلىق كەڭىستىكتە قورعاۋ ماقساتىندا پوليتسيا كەشەندى جۇمىستار جۇرگىزىپ جاتىر.
«ينتەرنەتتىڭ دامۋىنا بايلانىستى ء«داستۇرلى» قىلمىس تۇرلەرى ونلاين-كەڭىستىككە اۋىسىپ, ولاردىڭ جاڭا فورمالارى پايدا بولدى. بۇگىندە ۇرلىق ينتەرنەت جەلىسى ارقىلى جاسالىپ, قىلمىسكەرلەر ازاماتتاردىڭ قاراجاتىن جىمقىرۋ ءۇشىن زاماناۋي تەحنولوگيالاردى قولدانىپ جاتىر. مۇنداي قىلمىستارمەن كۇرەس ءۇش نەگىزگى باعىتتا جۇرگىزىلۋى ءتيىس: زاڭنامالىق, تەحنيكالىق جانە پروفيلاكتيكالىق ءىس-شارالار. تەك كەشەندى ءتاسىل عانا كيبەرقىلمىسقا ءوز دەڭگەيىندە قارسى تۇرۋعا مۇمكىندىك بەرەدى», دەلىنگەن مينيسترلىك حابارلاماسىندا.