وتباسى بانك استاناداعى جاڭا دەرەكتەر ورتالىعىنا كوشتى

بانك مالىمەتىنشە, 2025 جىلدىڭ 31 جەلتوقسانى مەن 2026 جىلدىڭ 2 قاڭتارى ارالىعىندا قارجى جىلىن جابۋ راسىمدەرى جۇرگىزىلگەن. ال 3 قاڭتار كۇنى ساعات 03:00-دە نەگىزگى دەرەكتەردى وڭدەۋ ورتالىعىنىڭ ەسەپتەۋ قۋاتتارىن كوشىرۋ بويىنشا جوسپارلى تەحنيكالىق جۇمىستار باستالعان. مۇنداي جۇمىستار سەرۆيستەردىڭ توقتاپ قالۋىن بارىنشا ازايتۋ ءۇشىن دەمالىس كۇندەرىنە ادەيى جوسپارلانعان.

كوشىرۋ اياسىندا 40 سەرۆەر, 10 دەرەكتەردى ساقتاۋ جۇيەسى, 6 جەلىلىك قۇرىلعى جانە 10 تەحنولوگيالىق جابدىق سورەسى استاناعا جەتكىزىلگەن. جابدىقتاردى تاسىمالداۋ جۇمىستارىن بانك قىزمەتكەرلەرى ءوز كۇشىمەن اتقارعان. مەردىگەر كومپانيالار تارتىلماعان, بۇل شىعىنداردى وڭتايلاندىرۋ جانە قاراجاتتى ۇنەمدەۋ ماقساتىندا جاسالعان.

سۋىق مەزگىلدە جەتكىزىلگەن سەرۆەرلىك جانە ديسكىلىك جابدىقتار الدىمەن ارنايى ورىندارعا ورنالاستىرىلىپ, نورماتيۆتىك تەمپەراتۋرالىق رەجيمگە جەتكەننەن كەيىن عانا مونتاجداۋ جۇمىستارى باستالعان. ىسكە قوسۋ كەزەڭ-كەزەڭىمەن جۇرگىزىلىپ, ءاربىر جۇيە بويىنشا قوسىلىمنىڭ دۇرىستىعى, جۇمىس تۇراقتىلىعى جانە دەرەكتەردىڭ تۇتاستىعى مۇقيات تەكسەرىلگەن.

باستاپقى جوسپار بويىنشا بارلىق جۇيە 5 قاڭتار كۇنى ساعات 09:00-گە دەيىن تولىق ىسكە قوسىلۋى ءتيىس بولعان. الايدا قوسىمشا باپتاۋ مەن تەكسەرۋ قاجەتتىلىگىنە بايلانىستى بۇل پروتسەسس ۇزارتىلعان. 5 قاڭتار ساعات 15:00-دەگى جاعداي بويىنشا Colvir اۆتوماتتاندىرىلعان بانكتىك اقپاراتتىق جۇيەسى, تولەم جۇيەلەرى, BPM, BPM 2.0, CRM, 300 ءنومىرى ارقىلى كىرىس قوڭىراۋلارىن وڭدەۋ جۇيەسى جانە بىرقاتار نەگىزگى ىشكى اقپاراتتىق جۇيە قايتا ىسكە قوسىلعان.

قازىرگى ۋاقىتتا تسيفرلىق قىزمەت كورسەتۋ ارنالارى كەزەڭ-كەزەڭىمەن قالپىنا كەلتىرىلىپ جاتىر. بانك بارلىق ماڭىزدى اقپاراتتىق جۇيەنى تولىق ىسكە قوسىپ, قالىپتى جۇمىس رەجيمىنە كوشۋ جوسپارىن جالعاستىرۋدا. جۇيەلەردىڭ جۇمىس قابىلەتى تۇراقتى باقىلاۋدا, دەرەكتەردىڭ جوعالۋى نەمەسە اقپاراتتىق قاۋىپسىزدىككە قاتىستى ەلەۋلى تاۋەكەلدەر تىركەلمەگەن.

سونىمەن قاتار بانك كليەنتتەرىنە قاتىستى جەڭىلدىك شارالارىن دا قاراستىرعان. 2026 جىلدىڭ 1–6 قاڭتارى ارالىعىنا جوسپارلانعان كرەديتتىك تولەمدەردى 7 قاڭتار ساعات 20:00-گە دەيىن تولەۋگە مۇمكىندىك بەرىلگەن. بۇل تولەمدەر مەرزىمى وتكەن بەرەشەك رەتىندە ەسەپتەلمەيدى, ءوسىمپۇل سالىنبايدى جانە اقپارات كرەديتتىك بيۋرولارعا جىبەرىلمەيدى.