«Turkistan» گازەتىندە پرەزيدەنت قاسىم-جومارت توقاەۆتىڭ باسىلىمنىڭ باس رەداكتورى باۋىرجان باباجان ۇلىنا بەرگەن كەڭ كولەمدى سۇحباتى جارىق كوردى, دەپ جازادى Egemen.kz.
سۇحبات بارىسىندا قاسىم-جومارت توقاەۆ بۇرىنعى پرەزيدەنت نۇرسۇلتان نازارباەۆتىڭ جاڭا جىل قارساڭىندا كرەملدە رەسەي باسشىسىمەن تاعى دا كەزدەسۋىنە قاتىستى پىكىر ءبىلدىردى.
باۋىرجان باباجان ۇلى ساۋالىندا كەزدەسۋ تۋرالى كوپتەگەن پىكىر ايتىلىپ, وسەك-اياڭ وربىگەنىنە نازار اۋداردى. سونداي-اق قاسىم-جومارت توقاەۆ بىلتىرعى سۇحباتىندا تۇڭعىش پرەزيدەنت پارتيانىڭ ءىرى قايراتكەرى رەتىندە كوپ ۋاقىتىن وتكىزگەن ماسكەۋدى ساعىناتىن بولار, سوندىقتان ول جاققا ءجيى بارادى دەپ تۇسىندىرگەنىن ەسكە سالدى. دەسە دە «Turkistan» گازەتىنىڭ باس رەداكتورى كوپتەگەن ازامات مەملەكەت باسشىسى توقاەۆتىڭ وسىنداي «سامميتتەرگە» شىنايى كوزقاراسىن بىلگىسى كەلەتىنىن ايتتى.
«تۇراقتى تۇردە وتكىزىلىپ جۇرگەن كەزدەسۋلەر بەيرەسمي سيپاتقا يە. مۇنى رەسەي پرەزيدەنتىنىڭ ءوزى دە اتاپ وتەدى. تاياۋدا وتكەن سانكت-پەتەربۋرگتەگى باسقوسۋدا ۆلاديمير پۋتين ماعان نۇرسۇلتان نازارباەۆتى ونىڭ ءوتىنىپ سۇراۋى بويىنشا قابىلدايتىنىن ايتقان ەدى.
رەسەي پرەزيدەنتىنىڭ ەرەكشەلىگى: ول دوستارىمەن جانە ارىپتەستەرىمەن جىلى قارىم-قاتىناس قۇرا بىلەدى. جۇمىسى وتە قاربالاس بولسا دا, سەنبى كۇنى قازاقستاننىڭ تۇڭعىش پرەزيدەنتىمەن اسىقپاي اڭگىمەلەسۋگە ۋاقىتىن ءبولدى. ول نۇرسۇلتان نازارباەۆتى ەۋرازياداعى ىقپالداستىق ۇدەرىسىنىڭ باستاۋىندا تۇرعان تاجىريبەلى ساياساتكەر رەتىندە باعالايدى. رەسەي بۇل ۇدەرىستە جەتەكشى ءرول اتقارىپ وتىر. كرەملدەگى كەزدەسۋ ۆلاديمير ءپۋتيننىڭ ادامگەرشىلىگى جوعارى ەكەنىن كورسەتەدى.
ونداي اڭگىمەلەر بارىسىندا نە ايتىلعانى ماعان قىزىق ەمەس, بۇل تۋرالى ەشقاشان سۇراق قويمايمىن.
ال, نۇرسۇلتان نازارباەۆتىڭ جەكە باسىنا كەلەر بولساق, مەن ونى قازىرگى قازاق مەملەكەتتىگىنىڭ نەگىزىن قالاعان تۇلعا دەپ سانايتىنىمدى بىرنەشە رەت ايتتىم. ونىڭ مەملەكەتتىك ينستيتۋتتاردى جانە ەكونوميكانىڭ نارىقتىق تەتىكتەرىن قۇرۋ, جاڭا استانامىزدى سالۋ جولىنداعى ەڭبەگىن ءبارى بىلەدى. وزىڭىزگە ءمالىم, ءبىز قازاقستاندى ادىلدىك, زاڭ جانە ءتارتىپ ورناعان ەل ەتكىمىز كەلەدى. سوندىقتان, ەشكىمدى الالاماي, ءار ازاماتتىڭ ەڭبەگىن ءادىل باعالاۋ كەرەك. بۇل ەلىمىزدىڭ تۇڭعىش پرەزيدەنتى نۇرسۇلتان نازارباەۆقا دا قاتىستى», دەدى پرەزيدەنت.