2025 جىل ەل ەكونوميكاسىنىڭ ايتارلىقتاي وسكەنىمەن جانە اۋقىمدى رەفورمالاردىڭ ناقتى ىسكە اسا باستاۋىمەن ەستە قالدى. بۇل جونىندە مەملەكەت باسشىسى «تۇركىستان» گازەتىنە بەرگەن سۇحباتىندا ايتىپ بەردى, دەپ حابارلايدى Egemen.kz.
«شىنىمەن دە, ايتۋلى وقيعالار از بولعان جوق. كوزدى اشىپ-جۇمعانشا ءبىر جىل وتە شىقتى. مىسالى, ەكونوميكامىز 6 پايىزدان استام ءوستى. ىشكى جالپى ءونىم 300 ميلليارد دوللار مەجەسىنە جەتىپ, جان باسىنا شاققاندا 15 مىڭ دوللاردان استى. بۇل – ەلىمىزبەن قاتار, بۇكىل ءوڭىر ءۇشىن رەكوردتىق كورسەتكىش. جالپى, ويداعىداي جۇمىس ىستەلدى دەۋگە بولادى. بىراق, مەن بارلىق مەملەكەتتىك قىزمەتشىلەرگە توقمەيىلسىپ, ماسايراپ وتىرۋعا مۇلدە بولمايتىنىن ۇنەمى ايتامىن. شىعىس حالىقتارى «تەگىس جولدىڭ وزىندە توسقاۋىل بار» دەيدى. ءبىز تىنىمسىز ەڭبەكتەنىپ, تەك العا ۇمتىلۋىمىز كەرەك. ونىڭ ۇستىنە, ءتۇيىنى تارقاتىلماعان تۇيتكىلدەر از ەمەس.
بۇل – ەڭ الدىمەن, ينفلياتسيا دەڭگەيىنىڭ جوعارى بولۋى. سونىڭ سالدارىنان ازاماتتارىمىزدىڭ ءال-اۋقاتىن ارتتىرۋعا ارنالعان ەڭبەكتىڭ ءبارى تەككە كەتىپ جاتىر. بيىل ۇكىمەت پەن اكىمدەر مەملەكەتىمىزدىڭ الەۋمەتتىك-ەكونوميكالىق تۇعىرىن نىعايتۋ ءۇشىن كوپ جۇمىس ىستەۋى كەرەك», دەدى مەملەكەت باسشىسى.
پرەزيدەنتتىڭ ايتۋىنشا, ەلىمىزدىڭ رەفورمالاردى جۇزەگە اسىرۋعا ءبىرجولا بەت بۇرعانىن وتكەن جىلدىڭ باستى قورىتىندىسى دەۋگە بولادى.
«قازاقستان جاڭعىرۋ جولىندا قارىشتى قادام باسىپ, بارىنشا وركەنيەتتى ەل بولا باستادى. قوعامدا وسكەلەڭ ۇرپاقتىڭ جارقىن بولاشاعى ءۇشىن تۇبەگەيلى وزگەرىس جاساۋ اسا ماڭىزدى ەكەنى تۋرالى ناقتى تۇسىنىك قالىپتاستى.
اقش پرەزيدەنتى ترامپتىڭ «اقىلعا سىيىمدى وي» ستراتەگياسىنىڭ ىقپالىمەن جاھاندانۋ ۇدەرىسى كەيىنگە ىسىرىلا باستادى. ءبىز دە قازاقستاندا ادىلدىك, زاڭ مەن ءتارتىپ, ەڭبەكقورلىق سياقتى مەملەكەتىمىزدىڭ بولاشاعى ءۇشىن ايرىقشا ماڭىزدى قاعيداتتارعا نەگىزدەلگەن قوعام قۇرىپ جاتىرمىز. ۇزاق مەرزىمگە ارنالعان ناتيجەگە جەتۋ ءۇشىن بۇل جۇمىس جاڭا جىلدا ەكى ەسە تىڭ قارقىنمەن جالعاسىن تابادى», دەيدى ق.توقاەۆ.