«Turkistan» گازەتىندە پرەزيدەنت قاسىم-جومارت توقاەۆتىڭ باسىلىمنىڭ باس رەداكتورى باۋىرجان باباجان ۇلىنا بەرگەن كەڭ كولەمدى سۇحباتى جارىق كوردى, دەپ حابارلايدى Egemen.kz.
«Turkistan» گازەتى 30 جىلدان بەرى تۇراقتى شىعىپ كەلەدى. بۇل – قازاقستانداعى ەڭ ىقپالدى باسىلىمنىڭ ءبىرى. گازەتتىڭ اتاۋىندا دا وتە ۇلكەن ءمان-ماعىنا بار. باسىلىم تىلشىلەرى ەل ىشىندەگى وزەكتى ماسەلەلەرمەن قاتار, تۇتاس تۇركى جۇرتىنا ورتاق تاقىرىپتاردى دا كوتەرىپ جۇرەدى. بۇل وتە جاقسى ءداستۇر دەپ سانايمىن», دەدى قاسىم-جومارت توقاەۆ.
قاسىم-جومارت توقاەۆ قازىرگى تاڭدا گازەت-جۋرنالداردىڭ قايتا ورلەۋ ءداۋىرى باستالىپ جاتقانىن العا تارتتى. پرەزيدەنت الەۋمەتتىك جەلىلەردىڭ ادامنىڭ تانىمدىق قابىلەتىنە تيگىزەر كەرى اسەرىن اشىق ايتتى: «شەتەلدە جۇمىس ىستەپ, ءتۇرلى سالادا تابىسقا جەتكەن قازاقتار تۋرالى ماقالالاردى قىزىعۋشىلىقپەن وقيمىن. قازاقستان مەن وزدەرى تۇرىپ جاتقان ەلدەر اراسىنداعى ىنتىماقتاستىقتى دامىتۋعا ۇلەس قوسىپ جۇرگەن وسىنداي ءۇش ازاماتتى ارنايى ماراپاتتادىم.گازەت-جۋرنالدار قايتا ورلەۋ ءداۋىرىنىڭ باستاۋىندا تۇر. سەبەبى, الەۋمەتتىك جەلى ادامنىڭ ويلاۋ (تانىمدىق) قابىلەتىنە زور زيان كەلتىرىپ جاتىر. جاسى قىرىققا جەتسە دە, ءبىلىمى مەن وي-ءورىسى ون بەس جاستاعى جاسوسپىرىمدەر دەڭگەيىندە قالىپ قويعان ازاماتتاردى قازىردىڭ وزىندە كەزدەستىرۋگە بولادى», دەدى مەملەكەت باسشىسى.
پرەزيدەنت ءوزىنىڭ دە مەرزىمدى ءباسپاسوزدى ۇزبەي وقيتىنىن, ساپالى ساراپتاما مەن تەرەڭ اقپاراتتى ءداستۇرلى باسىلىمداردان الاتىنىن جەتكىزدى. ونىڭ پىكىرىنشە, TikTok نەمەسە Instagram سياقتى جەلىلەر ەڭبەك ادامدارىنىڭ شىنايى تىنىس-تىرشىلىگىن تولىق كورسەتە المايدى. ء«وز باسىم مەرزىمدى ءباسپاسوزدى جاس كەزىمنەن ۇزبەي وقيتىنىم راس. ءالى كۇنگە دەيىن وسى ادەتىمنەن جاڭىلعان ەمەسپىن. قازىرگى تاڭدا ءباسپاسوز زامان تالابىنا بەيىمدەلىپ, اقپارات ايدىنىنان ءوز ورنىن تاۋىپ وتىر. گازەت تىلشىلەرى جان-جاقتى شولۋلار مەن تەرەڭ ساراپتامالار جاساۋعا باسا ءمان بەرەدى, اعارتۋشىلىقپەن اينالىسادى. كاسىبي ءارى ءوز ىسىنە ادال جۋرناليستەر ساپالى ماتەريالدار ازىرلەپ, ءداستۇرلى قۇندىلىقتاردى ساقتاۋعا ەلەۋلى ۇلەس قوسىپ كەلەدى. مەن سۇيىكتى وتانىمىزدىڭ يگىلىگى ءۇشىن بارلىق سالادا تابىستى ەڭبەك ەتىپ جۇرگەن مىقتى ازاماتتار تۋرالى مالىمەتتەردى كوبىنەسە گازەتتەردەن الامىن. ەل ىشىنە كەڭ تارالعان TikTok, Instagram نەمەسە Telegram ارنالارى ەڭبەك ادامدارىنىڭ شىنايى تىنىس-تىرشىلىگىنەن الىس ەكەنىن ءوزىڭىز دە جاقسى بىلەتىن شىعارسىز», دەدى قاسىم-جومارت توقاەۆ. پرەزيدەنت جاستاردىڭ ناعىز ءبىلىم-عىلىم جولىنا تۇسۋگە تالپىنىپ جاتقانىنا سەنىم ءبىلدىردى.«قوعامىمىز ەلەڭ ەتەرلىك جاڭالىق وقىپ, بەينەجازبا كورۋمەن شەكتەلمەي, ءمان-ماعىناسى تەرەڭ اقپاراتتىڭ دا قادىرىن بىلگەنى دۇرىس دەپ سانايمىن. كوپتەگەن جاستارىمىزدىڭ دا ءدال سولاي ويلايتىنىنا قۋانامىن. سەبەبى, ولار ادامدى تىعىرىققا تىرەيتىن ەلەس-قيال الەمىندە ءومىر ءسۇرۋدى ەمەس, ناعىز ءبىلىم-عىلىم جولىنا ءتۇسۋدى ماقسات تۇتادى. وقۋ مادەنيەتى جوعارى ەلدەر ءاردايىم جاھاندىق دامۋدىڭ العى شەبىندە بولا بەرەتىنى ءسوزسىز. بۇعان ەش كۇمانىم جوق», دەدى پرەزيدەنت.