2026 جىلى Qazaq Digital Mektebi جانە پەداگوگ ماماندارعا ارنالعان جي-مەن قامتىلعان ۇلتتىق ءبىلىم بەرۋ پلاتفورماسى ىسكە قوسىلماق. بۇل تۋرالى وقۋ-اعارتۋ ۆيتسە-ءمينيسترى اسىلبەك احمەتجانوۆ مالىمدەدى, دەپ جازادى Egemen.kz.
پرەزيدەنت قاسىم-جومارت توقاەۆتىڭ بارلىق سالانى, ونىڭ ىشىندە ءبىلىم بەرۋدى تسيفرلاندىرۋ جونىندەگى تاپسىرماسىنا سايكەس, وقۋ-اعارتۋ مينيسترلىگى ۇكىمەت ارقىلى مۇعالىمدەردىڭ جۇكتەمەسىن ازايتۋعا, وقۋشىلاردىڭ جي ساۋاتتىلىعىن ارتتىرۋعا جانە ۇلتتىق ءبىلىم بەرۋ پلاتفورماسىن قۇرۋعا باعىتتالعان جاساندى ينتەللەكت ەنگىزۋ جونىندەگى شارالار كەشەنىن جۇزەگە اسىرىپ جاتىر.
«وقۋ-اعارتۋ مينيسترلىگى تسيفرلىق پروفيلدەردىڭ ۇلتتىق جۇيەسىن جانە ۇلتتىق ءبىلىم بەرۋ پلاتفورماسىن قۇرۋعا كىرىستى. بۇعان قول جەتكىزۋ ءۇشىن ۇلتتىق ءبىلىم بەرۋ دەرەكقورى جاڭعىرتىلىپ, ول بارلىق LMS, ياعني ەلەكتروندىق كۇندەلىكتەر مەن جۋرنالداردىڭ بىرىڭعاي دەرەكتەر قويماسىنا اينالادى. بۇل بارلىق دەرەكتى QazTech مەملەكەتتىك بۇلتتى پلاتفورمادا شوعىرلاندىرۋعا مۇمكىندىك بەرەدى», دەدى ول.
بۇل مۇعالىمدەردىڭ كۇندەلىكتى جۇكتەمەسىن ازايتادى, ويتكەنى جي اگەنتتەرى, مىسالى, پەداگوگيكالىق كەڭەستەرگە دايىندىق كەزىندە كومەكتەسە الادى.
«2026-2027 وقۋ جىلىنان باستاپ شاعىن جيناقتى مەكتەپتەر ءۇشىن پيلوتتىق وڭىرلەردە Qazaq Digital mektebi جوباسى ىسكە قوسىلادى, وندا جي رەپەتيتورلارى قولدانىلادى. 2026 جىلعا قاراي 200 مىڭنان استام پەداگوگ تاجىريبەلىك جي داعدىلارىن مەڭگەرەدى», دەپ تولىقتىردى ۆيتسە-مينيستر.
وقۋشىلار اراسىندا جي ساۋاتتىلىعىن ارتتىرۋعا ەرەكشە كوڭىل بولىنبەك. سونىمەن قاتار 2026 جىلدىڭ ءبىرىنشى جارتىسىندا مينيسترلىك جانىنداعى جۇمىس توبى زاڭنامالىق وزگەرىستەر بويىنشا ۇسىنىمدار ازىرلەپ, ءبىلىم بەرۋ سالاسىندا جاساندى ينتەللەكت قولدانۋ بويىنشا پيلوتتىق جوبالاردىڭ تيىمدىلىگىن باعالايدى.
«وسىلايشا, ۇكىمەت جي اگەنتتەرى كومەگىمەن پەداگوگتەر جۇكتەمەسىن ازايتۋعا, سونداي-اق ازاماتتارىمىز ءۇشىن مەملەكەتتىك قىزمەتتەر الۋدى جەڭىلدەتۋگە مۇمكىندىك بەرەتىن تسيفرلىق نەگىز قالىپتاستىرادى», دەپ قورىتىندىلادى ءسوزىن اسىلبەك احمەتجانوۆ.