ەلوردادا اباتتاندىرۋ, كوگالداندىرۋ جانە جول جوندەۋ ماسەلەلەرى بويىنشا ءوتىنىم جولداۋىنا ارنالعان «تازا قازاقستان» ونلاين-پلاتفورماسىنىڭ جۇمىسى ناتيجەلى تۇردە جالعاسىپ كەلەدى. قالا تۇرعىندارى اراسىندا بۇل قىزمەتكە سۇرانىس جوعارى, دەپ حابارلايدى استانا قالاسى اكىمدىگىنىڭ رەسمي سايتى.
«تازا قازاقستان» پلاتفورماسى ارقىلى ءاربىر قالا تۇرعىنى اباتتاندىرۋعا قاتىستى وزەكتى ماسەلەلەردى كوتەرە الادى.
پلاتفورما ىسكە قوسىلعاننان بەرى مۇندا بارلىعى 3 669 ءوتىنىم كەلىپ تۇسكەن. ونىڭ 3 305-ءى تولىق ورىندالعان, تاعى 3 ءوتىنىم ورىندالۋ ۇستىندە, قالعانى – قارالۋ ساتىسىندا.
وتىنىمدەردىڭ باسىم بولىگى اۋماقتاردى اباتتاندىرۋ, كوشەلەردى جارىقتاندىرۋ, جول جوندەۋ, كوگالداندىرۋ, سونداي-اق رۇقساتسىز قوقىس ۇيىندىلەرىن جويۋ ماسەلەلەرىنە قاتىستى.
بارلىق ەسكەرتۋ مەن ۇسىنىس ۋاقتىلى قارالىپ, تۇرعىندارعا كەلتىرىلەتىن قولايسىزدىقتاردى بارىنشا ازايتۋعا مۇمكىندىك بەرىپ وتىر.
«تازا قازاقستان» قىزمەتىنىڭ باستى ارتىقشىلىعى – تۇرعىندارمەن جەدەل ءارى اشىق بايلانىستىڭ قامتاماسىز ەتىلۋى.