قازاقستان مالىمەتتەردى جاسىرىپ, حەشتەۋدى, سونداي-اق اقپارات تاراتۋمەن كۇرەسۋ ءۇشىن بازادان اقپاراتتى جاپپاي پايدالانۋعا تىيىم سالۋدى جوسپارلاپ وتىر. بۇل تۋرالى پرەمەر-ءمينيستردىڭ ورىنباسارى - جاساندى ينتەللەكت ءمينيسترى جاسۇلان ماديەۆ دەپۋتاتتىق ساۋالعا جاۋاپ بەرۋ بارىسىندا ايتتى. ول قازاقستاندا تەكسەرىس جۇرگىزىپ, دەربەس دەرەكتەر سالاسىنداعى بۇزۋشىلىقتار ءۇشىن اكىمشىلىك جاۋاپكەرشىلىككە تارتۋ مۇمكىندىگى قاراستىرىلاتىنىن ءمالىم قىلدى, دەپ حابارلايدى Egemen.kz.
ايىپپۇل
بۇزۋشىلىقتار ءۇشىن 30-دان 2000 اەك-كە دەيىن (130 مىڭنان 8,6 ميلليون تەڭگەگە دەيىن) ايىپپۇل سالۋ كوزدەلگەن.
«بۇدان باسقا, قۇزىرەتتى مينيسترلىك جەكە جانە زاڭدى تۇلعالاردىڭ دەربەس دەرەكتەر جانە ولاردى قورعاۋ ماسەلەلەرى بويىنشا وتىنىشتەرىن, قر اقبتك-ءنىڭ 79-بابىندا كوزدەلگەن اكىمشىلىك قۇقىق بۇزۋشىلىقتار تۋرالى ىستەردى قاراۋعا, سونداي-اق جوسپاردان تىس تەكسەرۋلەر جۇرگىزۋگە ۋاكىلەتتى» دەپ جازىلعان جاۋاپتا.
بيومەتريالىق سايكەستەندىرۋ
ول سونداي-اق قازاقستاندا بيومەتريا جانە بەتبەينە ارقىلى تانۋ جۇيەلەرىن رەتكە كەلتىرۋ جوسپارلانىپ وتىرعانىن حابارلادى. بۇل ساندىق كودەكس جوباسىندا قاراستىرىلعان.
قۇجاتقا سايكەس بيومەتريالىق سايكەستەندىرۋ تەك ۇلتتىق بيومەتريالىق سايكەستەندىرۋ جۇيەسى ارقىلى جۇرگىزىلەدى. ول ءۇشىن جەكە ەرەجەلەر ازىرلەنەدى, وندا بيومەتريكالىق دەرەكتەر قالاي جينالاتىنى, ساقتالاتىنى جانە جويىلاتىنى جازىلادى.
دەربەس دەرەكتەر ەلدە ورنالاسقان سەرۆەرلەردە ساقتالۋى ءتيىس
جاسۇلان ماديەۆ اۆتوكولىكتەر ارقىلى دەربەس دەرەكتەردىڭ تارالىپ كەتۋ قاۋپىنە تۇسىنىكتەمە بەرە وتىرىپ, ازاماتتاردىڭ دەرەكتەرىن ءۇشىنشى تۇلعالارعا نەمەسە شەتەلگە بەرۋ تەك يەسىنىڭ كەلىسىمىمەن عانا مۇمكىن بولاتىنىن ءتۇسىندىردى.
زاڭ بويىنشا دەربەس دەرەكتەر ەلدە ورنالاسقان سەرۆەرلەردە ساقتالۋى ءتيىس. دەرەكتەردى ەلدەن تىس جەرلەردە بەرۋگە جانە ساقتاۋعا ادامنىڭ كەلىسىمى بولعاندا جانە وسىنداي دەرەكتەر بازاسى قازاقستان اۋماعىندا دا بولعان جاعدايدا عانا جول بەرىلەدى.
«بۇگىنگى كۇنى دەربەس دەرەكتەرگە رۇقساتسىز قول جەتكىزۋدى بولدىرماۋ ماقساتىندا دەرەكتەردى جاسىرۋ جانە حەشتەۋ, سونداي-اق دەربەس دەرەكتەرى بار بازالاردان جاپپاي قولدانۋعا زاڭنامالىق تىيىم سالۋدى ەنگىزۋ تۋرالى ماسەلە پىسىقتالۋدا, بۇل ازاماتتاردىڭ دەرەكتەرىن ءۇشىنشى تۇلعالارعا جانە شەتەلگە بەرۋ مۇمكىندىگىن بولدىرماۋعا ىقپال ەتەدى», دەدى ج.ماديەۆ.
جەكە دەرەك باسقانىڭ ولجاسىنا اينالماسىن دەسەك...