ايىرقالپاقتى اعايىندارمەن قوڭسى ورنالاسقان قورداي اۋدانىنا قاراستى بەتقاينار اۋىلىندا اشىلعان جاڭا ۇيىرمەدە بالالار روبوتتەحنيكانىڭ قىر-سىرىنا قانىعىپ ءجۇر. اۋىل وقۋشىلارىنىڭ عىلىمي-تەحنيكالىق تانىمىن دامىتۋعا جانە جاڭا تەحنولوگياعا دەگەن قىزىعۋشىلىعىن ارتتىرۋعا باعىتتالعان جوبا ءوز جەمىسىن بەرىپ وتىر. ال ۇيىرمەگە كەلۋشىلەر سانى ۋاقىت وتكەن سايىن ارتا تۇسكەن.
ۇيىرمە تىزگىنىن ۇستاعان نۇرتورە مالىك ۇلى – جانارىندا وت ويناعان جالىندى, قارىمدى جاستىڭ ءبىرى. 22 جاسار ينجەنەر-ەنەرگەتيك ۋاقىت وتە كەلە فيزيكا ءپانىنىڭ مۇعالىمى بولىپ ەڭبەك ەتۋگە بەل بۋعان ەكەن. بەلسەندى جاس روبوتتەحنيكا ۇيىرمەسىن اشۋ تۋرالى ۇسىنىستى دا ءوزى ايتىپ, باستاماشىل بولىپتى. ىزدەنىس ىزىنە تۇسكەن نۇرتورەنىڭ ىلكىمدى يدەياسى, تىڭ باستاماسى جەرگىلىكتى بيلىك تاراپىنان قولداۋ تاپقانى راسىندا دا كوڭىل قۋانتادى.
–ۇيىرمەمىزگە كەلگەن بالالاردىڭ تالپىنىسىنا ءوز باسىم قاتتى ريزامىن. ولاردىڭ IT سالاسىنا, روبوت قۇراستىرۋ مەن ارنايى باعدارلاماعا دەگەن قىزىعۋشىلىعى زور ەكەنىن كوز كورىپ وتىر. ءبىلىم بەرۋ مەكەمەلەرىندە مۇنداي ۇيىرمەنىڭ اشىلۋى – ۋاقىت سۇرانىسى. قالاي بولعان كۇندە دە ءبىز زامان كوشىنەن قالماۋعا بارىنشا ىنتالى بولۋىمىز كەرەك.
ء«بىزدىڭ ماقساتىمىز – اۋىل بالالارىنىڭ قالاداعى قاتارلاستارىمەن تەڭ دارەجەدە ءبىلىم الۋىنا قولدان كەلگەنشە كومەك كورسەتۋ. سول ارقىلى ولاردىڭ ۋاقىت تىنىسىنان قالىس قالماي, جاڭاشىل باستامالارعا ۇيىتقى بولۋىنا كومەكتەسۋ», دەيدى ۇيىرمە جەتەكشىسى ءوز ويىمەن ءبولىسىپ.
ن. مالىك ۇلىنىڭ ايتۋىنشا, روبوتتەحنيكا ۇيىرمەسى بىلتىر قاڭتار ايىنان باستاپ ىسكە كىرىسكەن. قازىرگى كەزدە جاس ماماننان ءتالىم الىپ جۇرگەن تالاپتى بالالاردىڭ سانى ەلۋگە جەتكەن كورىنەدى. بىلىكتى ۇستاز ساباقتى ەكى باعىتتا جۇرگىزەتىنىن ايتىپ وتىر. «LEGO» جيناقتارىمەن روبوت قۇراستىرۋ ىسىنە 1–4-سىنىپ وقۋشىلارى قۇلشىنىس بىلدىرسە, «Arduino» نەگىزىندەگى اۆتوماتتاندىرىلعان جۇيەلەردى قۇراستىرۋ جۇمىسىن 5–7-سىنىپ وقۋشىلارى قولعا العان. ارينە, ولار باستاپقىدا جاڭا باعىتتى تۇسىنبەسە دە, ۋاقىت وتە كەلە, روبوتتەحنيكانىڭ قىر-سىرىن مەڭگەرە تۇسكەن. وسىلايشا, ۇستاز ءۇمىتى اقتالعان.
مامان كەلتىرگەن دەرەككە سەنسەك, بۇل باعىتتار بويىنشا جۇمىستى بالالاردىڭ جاس ەرەكشەلىگى مەن تاپسىرمانىڭ كۇردەلى بولۋىنا قاراي جىكتەپتى. باستاۋىش سىنىپ وقۋشىلارى قاراپايىم مەحانيزمدەر مەن قوزعالىس ەلەمەنتتەرىن مەڭگەرۋگە نازار اۋدارسا, جوعارى سىنىپ وقۋشىلارى باعدارلامالاۋ نەگىزدەرىن ۇيرەنىپ, كۇردەلى جوبالاردى ازىرلەۋگە دەن قويعان.
جاڭاشىل ۇستازدىڭ قولعا العان ءىسى بالالاردى باۋراپ العانىنا ەشكىمنىڭ تالاسى جوق. تالاپتىڭ تۇلپارىن مىنگەن وقۋشىلاردىڭ قول موتوريكاسى, ينجەنەرلىك ويلاۋ قابىلەتى, لوگيكالىق پايىمى مەن شىعارماشىلىق داعدىسى جىل ىشىندە ايتارلىقتاي دەڭگەيگە جەتىپ وتىر.
ۇيىرمەگە كەلىپ, روبوتتەحنيكانىڭ قىر-سىرىنا قانىققان وقۋشىلاردىڭ ۇستازدىڭ ىزدەنىسىنە دەگەن ءىلتيپاتى ەرەكشە ەكەنىن اڭعاردىق. جاڭا الەمنىڭ ەسىگىنەن اتتاعان ولار ىزدەنىس ىزىنە ءتۇسۋ ارقىلى جاڭا بيىكتەردى باعىندىرۋدى كوكسەيدى. كوزدەرىندە وت ويناعان وقۋشىلاردىڭ تالاي بيىكتى باعىندىراتىنىنا ەش كۇمان جوق.
– بۇل ۇيىرمە ماعان راسىمەن دە قاتتى ۇنايدى. ءوز قولىممەن ءتۇرلى روبوت قۇراستىرىپ, باعدارلاماۋ تەتىكتەرىن مەڭگەرىپ جاتقانىما بەك قۋانىشتىمىن. باستاپقىدا مۇنى ءتۇسىنۋ ايتارلىقتاي قيىندىق تۋدىرعانى راس. ايتسە دە, ۇستاز وتكەن ساباقتار مەنىڭ ماتەماتيكا جانە فيزيكا پاندەرىنە دەگەن قىزىعۋشىلىعىمدى ارتتىرىپ, ءتۇرلى تاسىلدەردى تەرەڭىرەك تۇسىنۋىمە كوپ كومەكتەستى. وسى ۇيىرمەگە كەلۋ ارقىلى ويلاۋ قابىلەتىم ارتا تۇسكەنىن ايتپاي كەتۋگە بولماس. مەنىڭ زامانداستارىم دا روبوتتەحنيكاعا قاتتى قىزىعۋشىلىق ءبىلدىرىپ جاتقانىنا قۋانىشتىمىن, – دەيدى ءبىلىم الۋشىنىڭ ءبىرى ايتورە ورازعالي ءوز ويىن ءبىلدىرىپ.
ءوز جۇمىسىنا اسا جاۋاپكەرشىلىكپەن قارايتىن نۇرتورە مالىك ۇلىنىڭ ايتۋىنشا, ۇيىرمە – جاي عانا قوسىمشا ساباق بەرۋ ءتاسىلى ەمەس. ول بالالاردى جاڭاشىلدىققا باۋلۋ ارقىلى اۋىل جەتكىنشەكتەرىن ينجەنەر جانە IT سالاسىنا دەگەن قىزىعۋشىلىعىن ارتتىرۋدى كوزدەگەن.
جامبىل وبلىسى,
قورداي اۋدانى