«Astana Hub» – كەيىنگى جىلدارى ەلىمىزدەگى تالاي يدەياعا «قانات» ءبىتىرىپ, ستارتاپ دەگەن ۇعىمدى جۇرتشىلىققا جاقىنداتقان ورتا. جاس كاسىپكەر, ينۆەستور, تالىمگەر جانە ءىت ماماندارىنىڭ باسىن قوسىپ, تەحنولوگيانى جاي اڭگىمە ەمەس, ناقتى ونىمگە اينالدىراتىن وسى الاڭ ەندى 2026 جىلى دا قارقىنىن باسەڭدەتپەك ەمەس.
بيىل «Astana Hub» تەحنولوگيالىق كاسىپكەرلىكتى دامىتۋعا باعىتتالعان جۇيەلى جۇمىسىن جالعاستىرماق. باستى باسىمدىق ستارتاپ-ەكوجۇيەنى اۋقىمداپ, جاھاندىق نارىقتارعا باعىتتالعان, حالىقارالىق دەڭگەيدە باسەكەگە قابىلەتتى كومپانيالاردىڭ قالىپتاسۋىنا قولايلى جاعداي جاساۋعا بەرىلەدى. «Astana Hub»-قا قاتىسۋشى كومپانيالاردىڭ تابىسى, اسىرەسە ەكسپورتتان تۇسەتىن كىرىسى, الداعى ۋاقىتتا دا تۇراقتى وسەدى دەگەن بولجام بار. سونىمەن قاتار شەتەل نارىعىندا جۇمىس ىستەيتىن, جاساندى ينتەللەكتىگە نەگىزدەلگەن ستارتاپتاردىڭ سانىن كوبەيتۋ جوسپارلانىپ وتىر.
«Astana Hub Silkway Accelerator», «AI’preneurs», «Startup Garage», «AlchemistX», «Hero Training», «Silicon Valley Residency Program» جانە باسقا دا باعدارلامالاردى ىسكە اسىرۋدى ءارى قاراي دامىتادى. بۇل جوبالار ستارتاپتاردى يدەيا كەزىنەن باستاپ جەتىلدىرىپ, وندىرىسكە دايىندايدى.
ەكوجۇيەدە بولاشاعى زور كوماندالارعا ينۆەستيتسيا قۇياتىن «Astana Hub Ventures» قورى ماڭىزدى ءرول اتقارادى. قازىرگى تاڭدا قور «Grand Mobile», «ZYPL AI», «Uniblock», «Surfaice», «Axellero», «Rette» (Defect AI) جانە «Clarity» ستارتاپتارىنا ينۆەستيتسيا قۇيدى. تاعى ەكى مامىلە قول قويۋ ساتىسىندا. 2026 جىلى «GP/LP» فورماتىندا ەكىنشى قوردى ىسكە قوسۋ جوسپارلانىپ وتىر. قازىرگى ۋاقىتتا جەكە ينۆەستورلاردىڭ قاراجاتىن تارتۋ ءۇشىن ليتسەنزيا الۋ ۇدەرىسى ءجۇرىپ جاتىر. قوردىڭ جوسپارلى كولەمى كەمىندە 20 ملن دوللار قۇراماق. بۇل قولداۋ ستارتاپتاردىڭ وسۋىنە جانە ولاردىڭ الەمدىك نارىقتاردا اۋقىمدانۋىنا باعىتتالعان.
IT-ەكوجۇيەنى دامىتۋ – ۇكىمەت پەن جاساندى ينتەللەكت جانە تسيفرلىق دامۋ مينيسترلىگىنىڭ بىرلەسكەن جۇمىسىنىڭ ءبىر بولىگى. مەملەكەت باسشىسى تاراپىنان IT سالاسىنا كورسەتىلىپ وتىرعان باسىم قولداۋ, «Alem Ventures Fund» قورلار قورىنىڭ ىسكە قوسىلۋى, كرەمني القابىندا, شانحايدا جانە دۋبايدا حالىقارالىق يننوۆاتسيالىق حابتاردىڭ دامۋى, سونداي-اق سۋپەركومپيۋتەرلىك ينفراقۇرىلىمنىڭ قۇرىلۋى ۆەنچۋرلىق نارىقتىڭ وسۋىنە جانە ينۆەستيتسيالاردىڭ ورتاشا كولەمىنىڭ ۇلعايۋىنا بەرىك نەگىز قالايدى. مۇنىڭ ءبارى ستارتاپتارعا ءىرى ينۆەستيتسيا تارتۋعا جول اشىپ, بولاشاقتا باعالانۋى ميلليارد دوللارعا جەتەتىن, ياعني unicorn دەڭگەيىنە كوتەرىلە الاتىن كومپانيالاردىڭ كوبەيۋىنە مۇمكىندىك بەرەدى.
«Astana Hub» ستراتەگياسىنداعى اسا ماڭىزدى باعىت – ادام كاپيتالىن دامىتۋ جانە تەحنولوگيالىق تالانتتار قاۋىمداستىعىن قالىپتاستىرۋ. «Tomorrow School», TUMO جانە وزگە دە ءبىلىم بەرۋ باستامالارى ارقىلى «Astana Hub» جاڭا بۋىن كوشباسشىلارىن دايارلاۋعا باعىتتالعان جۇيەلى جۇمىستى جالعاستىرا بەرمەك.
بۇل باعىتتا «اlem.ai» حالىقارالىق جاساندى ينتەللەكت ورتالىعى ەرەكشە ءرول اتقارىپ, ەلىمىزدىڭ جي سالاسىنداعى الەۋەتىن ناقتى كورسەتىپ وتىر. ورتالىق ءبىلىم بەرۋ, اكسەلەراتسيا جانە زەرتتەۋ باعدارلامالارى ارقىلى مەكتەپ وقۋشىلارىن, ستۋدەنتتەردى, ستارتاپتاردى, «BigTech» كومپانيالارىن جانە مەملەكەتتىك سەكتوردى ءبىر الاڭعا جينايدى. نەگىزگى ماقساتى ەلىمىزدى جاساندى ينتەللەكتىگە سۇيەنگەن مەملەكەتكە اينالدىرۋ. «اlem.ai»-دى دامىتۋ اياسىندا جىل سايىن شامامەن 10 000 تالانتتى تارتۋ, جاساندى ينتەللەكت سالاسىندا كەمىندە 1000 مامان دايارلاۋ, 100-گە جۋىق جي-ستارتاپتى ىسكە قوسۋ جانە عىلىمي زەرتتەۋلەر جۇرگىزۋ جوسپارلانىپ وتىر.
ايتا كەتەرلىگى, بۇل قازىر جاريالانعان الدىن الا جوسپارلار عانا. 2026 جىلى «Astana Hub» ستارتاپتاردى قولداۋعا, ينۆەستيتسيا تارتۋعا جانە ءىت سالاسىنداعى تالانتتاردى دايارلاۋعا باعىتتالعان وزگە دە ماڭىزدى باعدارلامالارىن جالعاستىرا بەرمەك.