اسا دارىندى قازاق شاحماتشىسى ءبيبىسارا اساۋباەۆا قاتاردىڭ باس شاھارى دوحادا راپيد پەن بليتستەن ءوتىپ جاتقان الەم چەمپيوناتىندا تاعى ءبىر بەلەستى باعىندىردى.
ءبليتستىڭ ءبيبىسارانىڭ وڭ جامباسىنا كەلەتىنىن تالاي بايراقتى باسەكەلەر بارىسىندا بايقاعانبىز. بۇعان دەيىن ول شاحماتتىڭ ءدال وسى تۇرىنەن 2021, 2022 جىلدارى الەم چەمپيونى اتانعان ەدى. سونىمەن قاتار جەرلەسىمىز وسىنداي دەڭگەيگە جەتكەن ەڭ جاس ويىنشى رەتىندە ءوز ەسىمىن تاريحتا قالدىردى. راپيدتەن اتالعان جارىستىڭ كۇمىسى مەن ازيانىڭ التىنىن موينىندا جارقىراتقانى تاعى بار. كلاسسيكالىق شاحماتتان دا ناتيجەلەرى وتە جاقسى. بۇگىندە اساۋباەۆانىڭ فيدە رەيتينگىندە ۇزدىك وندىقتى تۇيىندەپ تۇرعانى جوعارىدا ايتىلعان ءسوزىمىزدىڭ ايقىن دالەلى.
دوحاداعى دودانىڭ بليتس سايىسىندا جەر جاھاننىڭ ءار قيىرىنان جينالعان 141 ويىنشى باق سىنادى. ولار شۆەيتساريالىق جۇيەمەن 15 تۋر وينادى. باستاپقى باسەكەلەردە 11 ۇپاي جيعان اساۋباەۆا جارتىلاي فينالعا جولداما الدى. بۇل مەجەدە قازاق قىزى الەم چەمپيوناتىنىڭ قولا جۇلدەگەرى, قىتايلىق چجۋ تسزينەردى 3:0 ەسەبىمەن ويسىراتا ۇتتى. ال فينالدىق باسەكەدە ەكى دۇركىن الەم چەمپيونى, ۋكراينالىق اننا مۋزىچۋكتان باسىم ءتۇستى. ەسەپ – 2,5:1,5. ءسويتىپ, ءبيبىسارا اساۋباەۆا ءۇش دۇركىن الەم چەمپيونى اتاندى.