وتكەن جىلان جىلى دا تاريح جىلناماسىنا قاتتالدى. بيىلعى جىلقى جىلىندا دا تارتىسقا تولى سايىستاردىڭ ءدۇبىرى ءجيى ەستىلەتىنى انىق. سپورتشىلارىمىز-دىڭ سىنالار ءساتى تاياپ كەلەدى. اقپاننىڭ العاشقى اپتاسىندا قىسقى وليمپيادا دوداسى باستالادى. ودان كەيىن جازعى ازيا ويىندارىنىڭ دا جاڭعىرىعى جاقىنداي تۇسەدى.
قىسقى وليمپيادا جۇلدەسىنەن ءۇمىتتىمىز...
بيىلعى جىلدىڭ باستى الامانى – يتاليا ەلى ۇيىمداستىراتىن قىسقى وليمپيادا. 6-22 اقپان ارالىعىن دۇبىرگە بولەيتىن ءتورت جىلدىقتىڭ باستى دوداسى ميلان مەن كورتينا-د’امپەتستسو قالالارىندا وتەدى. تۋريزم جانە سپورت مينيسترلىگى ۇلتتىق كوماندانى ححV قىسقى وليمپياداعا دايىنداۋدىڭ كەشەندى جوسپارىن ازىرلەپ, كەزەڭ-كەزەڭىمەن جۇزەگە اسىرىپ كەلەدى.
بولجامعا سۇيەنىپ باعامداساق, وليمپياداعا ەلىمىزدەن شامامەن 35 سپورتشى بارادى. وتاندىق اتلەتتەر قىسقى وليمپيادانىڭ 10 تۇرىندە باق سىناۋدى جوسپارلاپ وتىر. اتاپ ايتقاندا, بياتلون, كونكيمەن جۇگىرۋ سپورتى, مانەرلەپ سىرعاناۋ, شورت-ترەك, شاڭعى جارىسى, شاڭعىمەن ترامپليننەن سەكىرۋ, شاڭعى قوسسايىسى, تاۋ شاڭعىسى سپورتى, فريستايل-موگۋل جانە فريستايل-اكروباتيكا بار.
قانجىعامىزعا بوكتەرگەن ليتسەنزيا سانى ازىرگە ازداۋ. سوفيا سامودەلكينا مەن ميحايل شايدوروۆ مانەرلەپ سىرعاناۋدان 2 جەكە رەسمي ليتسەنزيانى بىلتىر الەم چەمپيوناتىندا ەنشىلەدى. سونىمەن قاتار سپورتشىلارىمىز شورت-ترەكتەن 9, كونكيمەن جۇگىرۋدەن 12 ليتسەنزيا جەڭىپ الدى. كوماندانىڭ تۇپكىلىكتى قۇرامى سپورتشىلاردىڭ حالىقارالىق جارىستارداعى ناتيجەلەرىنە قاراي ايقىندالادى. وليمپيادا كۆوتالارىنىڭ ناقتى سانى بيىلعى قاڭتار ايىنىڭ سوڭىنا قاراي بەلگىلى بولادى. كەشەندى جوسپاردى ىسكە اسىرۋ اياسىندا مينيسترلىك رەسپۋبليكالىق سپورت فەدەراتسيالارىمەن, وڭىردەگى اكىمدىكتەرىمەن بىرلەسىپ جاتتىعۋ ۇدەرىسىن قامتاماسىز ەتۋدى كۇشەيتىپ, جۇيەلى جۇمىس جۇرگىزدى. اتاپ ايتقاندا, قىسقى سپورت تۇرلەرىنەن ۇلتتىق قۇرامالار 178 وقۋ-جاتتىعۋ جيىنىن وتكىزىپ, 125 حالىقارالىق جارىسقا قاتىستى.
جاتتىقتىرۋشىلار قۇرامىنا الەم چەمپيوناتتارى مەن وليمپيادادا تاجىريبەسى بار جوعارى دەڭگەيدەگى ماماندار تارتىلعان. ولاردىڭ گەرمانيا, نيدەرلاند, يسپانيا, سلوۆەنيا, پولشا, رەسەي, بەلارۋس ەلدەرىنەن مانەرلەپ سىرعاناۋ, كونكيمەن جۇگىرۋ, شاڭعى جارىسى, شورت-ترەك, بياتلون سايىسىنان بىلىكتى 13 شەتەلدىك جاتتىقتىرۋشى-كەڭەسشى سپورتشىلارىمىزدىڭ ساپالى دايىندىعىنا تارتىلدى.
سونىمەن قاتار كونكيمەن جۇگىرۋدەن قىسقى وليمپياداعا قاتىساتىن ۇلتتىق قۇرامانىڭ ءتىزىمى بەكىتىلدى. سپورتشىلار بىلتىر 14 قاراشا مەن 14 جەلتوقسان ارالىعىندا اقش, كانادا, نيدەرلاند, نورۆەگيادا وتكەن الەم كۋبوگى كەزەڭدەرىنىڭ قورىتىندىسىندا 12 ليتسەنزيا ولجالاعان ەدى. ۇلتتىق قۇرامانىڭ جاتتىقتىرۋشىلار شتابىنىڭ شەشىمىمەن يتالياداعى اق وليمپيادا كونكيمەن جۇگىرۋدەن ەۆگەني كوشكين, كريستينا سيلاەۆا, ەليزاۆەتا گولۋبەۆا, نادەجدا موروزوۆا, ارينا يلياششەنكو دوداعا تۇسەدى.
وتاندىق شورت-ترەكشىلەر ەل قورجىنىنا 9 جولداما سالدى. باپكەرلەر قۇرامىنىڭ شەشىمىمەن ميلاندا دەنيس نيكيشا, ابزال اجىعاليەۆ, ولگا تيحونوۆا, يانا حان باق سىنايدى.
ۇلتتىق قۇرامانىڭ كاپيتانى دەنيس نيكيشا – ەلدەگى ەڭ تانىمال سپورتشىنىڭ ءبىرى. 15 جىلدان بەرى شورت-ترەك سپورتىمەن كاسىبي شۇعىلدانادى. بۇعان دەيىن ول 2014 جىلى سوچي (رەسەي), 2018 جىلى پحيونچحان (وڭتۇستىك كورەيا), 2022 جىلى بەيجىڭ (قىتاي) قالالارىندا وتكەن قىسقى وليمپيا ويىندارىنا قاتىسقان. قازاق سپورتىنىڭ تاريحىندا شورت-ترەكتەن الەم چەمپيوناتىندا جۇلدە العان تۇڭعىش سپورتشى. قىسقى ازيا ويىندارىنىڭ چەمپيونى. سونداي-اق الەم كۋبوگى كەزەڭدەرىندە بىرنەشە رەت توپ جاردى, كۇمىس, قولا جۇلدەسىن دە يەلەندى. شورت-ترەكتەن قازاقستاننىڭ قۇرمەتتى سپورت شەبەرى اتاعىن العان العاشقى سپورتشى.
ابزال اجىعاليەۆ تە حالىقارالىق دارەجەدەگى سپورت شەبەرى, ۇلتتىق قۇرامانىڭ سپرينتتىك سايىستارداعى كوشباسشىلاردىڭ ءبىرى. 23 جىلدان بەرى شورت-ترەكپەن شۇعىلدانادى. بۇعان دەيىن ءۇش رەت قىسقى وليمپياداعا قاتىستى. 2022 جىلى بەيجىڭ قىسقى وليمپياداسىندا جۇلدەگە سىنىق سۇيەم جەتپەي, 4-ورىن الدى. الەم كۋبوگى كەزەڭدەرىندە بىرنەشە رەت جەڭىسكە جەتتى.
ولگا تيحونوۆا – حالىقارالىق دەڭگەيدەگى سپورت شەبەرى, بەيجىڭ وليمپياداسىنا قاتىسىپ, ارالاس كوماندالىق ەستافەتادا 5-ورىن العان. شورت-ترەكتە 15 جىلدان استام تاجىريبەسى بار. بىلتىر حاربيندەگى قىسقى ازيا ويىندارىندا 2 كۇمىس مەدال ولجالادى. 2024 جىلى بەيجىڭدەگى الەم كۋبوگىنىڭ ەستافەتالىق سايىسىندا (3000 م), سونداي-اق كانادانىڭ لاۆال قالاسىندا وتكەن ءتورت قۇرلىق چەمپيوناتىندا قولا جۇلدە ەنشىلەدى.
يانا حان دا حالىقارالىق دەڭگەيدەگى سپورت شەبەرى, بەيجىڭ وليمپياداسىنىڭ قاتىسۋشىسى, ارالاس كوماندالىق ەستافەتادا 5-ورىن العان. شورت-ترەكتە 13 جىلدان استام تاجىريبەسى بار. بىلتىر حاربيندەگى قىسقى ازيا ويىندارىنان 2 كۇمىس جۇلدەمەن ورالدى. 2024 جىلى بەيجىڭدەگى الەم كۋبوگىنىڭ قولا جۇلدەگەرى.
ازىرگە ەل قۇراماسىنىڭ قورجىنىندا سپورتتىڭ ءۇش تۇرىنەن 23 ليتسەنزيا بار. يتاليا ەلى وتكىزەتىن قىسقى وليمپيادا دوداسىنا الەمنىڭ 93 ەلىنەن 3 500-دەن استام سپورتشى قاتىسادى.
قازاق سپورتىنىڭ جىلناماسىندا قىسقى وليمپيادانىڭ تۇڭعىش جۇلدەسىن ءارى العاشقى التىن مەدالىن شاڭعى جارىسىنان 1994 جىلى ۆلاديمير سميرنوۆ ولجالادى. نورۆەگيانىڭ ليللەحاممەر قالاسىندا وتكەن وليمپيادادا ول ءۇش بىردەي مەدال يەلەندى. الدىمەن 15, 10 شاقىرىمدىق قاشىقتىقتا سايىسقا ءتۇسىپ, ەكى كۇمىس مەدال ولجالادى. سودان سوڭ 50 شاقىرىمعا جۇيتكۋدە قارسىلاستارىن شاڭ قاپتىرىپ, وليمپيادا چەمپيونى اتاندى. 1998 جىلى قىسقى وليمپيادانى جاپونيا ەلى ناگانو قالاسىندا وتكىزدى. شاڭعى جارىسىنان ۆلاديمير سميرنوۆ قولا جۇلدەنى قاناعات تۇتتى. ليۋدميلا پروكاشەۆا دا كونكيمەن جۇگىرۋدە 5 مىڭ مەتردەن قولا مەدالدى ەنشىلەدى.
وكىنىشكە قاراي, 2022 جىلى سولت-لەيك-سيتيدە (اقش), 2006 جىلى تۋريندە (يتاليا) وتكەن قىسقى وليمپيادادا سپورتشىلارىمىز جۇلدەگە ماڭايلاي الماي قۇرالاقان قايتتى. 2010 جىلى كانادانىڭ ۆانكۋۆەر قالاسىندا جالاۋى جەلبىرەگەن قىسقى وليمپيادا الامانىندا ەلەنا حرۋستالەۆا بياتلوننان كۇمىس مەدال يەلەندى. 2014 جىلى سوچيدە (رەسەي) دەنيس تەن مانەرلەپ سىرعاناۋدان قولا مەدال ولجالادى. 2018 جىلى پحيونچحان يۋليا گالىشەۆاعا فريستايل-موگۋلدان قولا مەدال بۇيىردى. 2022 جىلى بەيجىڭدەگى قىسقى وليمپيادا دوداسىنان سپورتشىلارىمىز جۇلدەسىز قايتتى.
تۋريزم جانە سپورت ءمينيسترى ەربول مىرزابوسىنوۆ يتاليادا وتەتىن قىسقى وليمپيادا دوداسىنان كەمىندە ءبىر مەدال ەنشىلەۋدى مەجەلەپ وتىرعانىن جەتكىزدى. قىسقى سپورتتى ورىستەتىپ وركەندەتۋگە ەلىمىزدىڭ تابيعاتى وتە قولايلى. جۇمىستىڭ قانشالىقتى جۇيەلى جۇرگىزىلگەنى الداعى الاماندا ايقىندالادى.
جازعى ازيا ويىندارىنا ازىرلىكتى كۇشەيتۋ قاجەت
جىلقى جىلىنىڭ كۇزى دە ءدۇبىرلى الاماندارعا تولى بولماقشى. ۇلتتىق سپورت تۇرلەرىنەن قىرعىزستاندا دۇنيەجۇزىلىك كوشپەلىلەر ويىندارى وتەدى. قىرعىزستاندا ەتنو سپورت سايىسى 31 تامىز – 6 قىركۇيەك ارالىعىندا ۇيىمداستىرىلادى.
ودان كەيىن جاپونيادا جازعى ازيا ويىندارىنىڭ تۇڭلىگىن تۇرەدى. 19 قىركۇيەكتە بايگەسى باستالاتىن ازيا قۇرلىعىنىڭ تورتجىلدىق سايىسى ايتي, ناگويا قالالارىندا وتەدى. جازعى ازيا ويىندارىنىڭ باعدارلاماسىندا 41 سپورت ءتۇرى ەنگىزىلدى. قاتىسۋشى سپورتشىلار 460 مەدال جيىنتىعى ءۇشىن تارتىسقا تۇسەدى.
ەلىمىزدىڭ سپورتشىلارى 2023 جىلى قىتايدىڭ حانچجوۋ قالاسىندا وتكەن جازعى ازيا ويىندارىنان 10 التىن, 22 كۇمىس, 48 قولا مەدال ەنشىلەپ, جالپى ەسەپتە 11-ساتىعا تۇراقتاعان ەدى. ازيا قۇرلىعىندا وندىققا ەنە الماعانىمىز ەل سپورتىنىڭ دەڭگەيىن بەزبەندەپ بەرگەن ەدى. 10 التىن مەدالدى ءبىز ستەند اتۋدان, نىساناعا وق اتۋدان, كانوەدە ەسكەك ەسۋدەن, ۆەلوسپورتتان, دجيۋ-دجيتسۋ, كاراتە سايىسىنان ولجالادىق. بالۋاندىق ونەر بابامىزدان دارىعان دەپ كۇپىنگەندە الى قارىس ايىل باۋىمىزدى ءۇزىپ جىبەرەردەي شىرەنەمىز. كۇرەس تۇرلەرىنەن سوڭعى ازيا ويىندارىندا التىن مەدال بۇيىرعان جوق. بوكسشىلارىمىز دا قىتايدان التىنسىز قايتتى. ەندەشە, سپورتشىلاردى قامشىلايتىن مەزەت كەلدى. جازعى ازيا ويىندارىنا 1994 جىلدان بەرى تۇراقتى قاتىسىپ كەلە جاتقان سپورتشىلارىمىز بۇعان دەيىن جالپى ناتيجەدە بەستىككە ەنەتىن. سول مەجەگە جەتۋ سپورتشىلارىمىزعا سەرت بولماق.
بيىل جازدا الەمدىك فۋتبول مەرەكەسى وتەدى. اقش, كانادا, مەكسيكا ەلدەرى ۇيىمداستىراتىن الەم كۋبوگىنىڭ اۋقىمى كەڭەيىپ, العاش رەت 48 قۇراما قاتىسادى. 11 ماۋسىمدا باستالىپ, 19 شىلدەدە مارەسىنە جەتەتىن الاماندا ورتالىق ازيا ەلدەرىنەن العاش بولىپ وزبەكستان ۇلتتىق قۇراماسى باق سىنايدى.
جىلدىڭ باستى دودالارى وسى. بۇدان سىرت, جەكەلەگەن سپورت تۇرلەرىنەن ازيا چەمپيوناتى, الەم كۋبوگىنىڭ كەزەڭدەرى دە وتەدى.