ەلىمىزدە زەينەتاقى اننۋيتەتىنە قاتىستى جاڭا وزگەرىستەر دايىندالىپ جاتىر. ەگەر ولار قابىلدانسا, زەينەتاقىنى الۋ جانە مۇراگەرگە بەرۋ ءتارتىبى بۇرىنعىدان ىڭعايلى بولماق, دەپ جازادى Egemen.kz.
قازىر وتانداستارىمىزدىڭ زەينەتاقى الۋدىڭ 2 جولى بار. ءبىرىنشىسى – ۇيرەنشىكتى ءتاسىل, ياعني, تولەمدەر بجزق-دان اقشا تاۋسىلعانشا بەرىلەدى. ەكىنشىسى – زەينەتاقى اننۋيتەتى. بۇل جاعدايدا ادام ءوز جيناعىن ساقتاندىرۋ كومپانياسىنا اۋدارادى دا, ءومىر بويى اي سايىن تولەم الىپ وتىرادى.
اننۋيتەتتىڭ باستى ايىرماشىلىعى تولەم ءومىر بويى جالعاسادى. ءتىپتى زەينەتاقى جيناعى تاۋسىلسا دا, اقشا تولەنە بەرەدى. اي سايىنعى تولەم مولشەرى كەلىسىمشارتتا الدىن الا بەكىتىلەدى جانە ول ەڭ كەمى كۇنكورىس مينيمۋمىنىڭ 70%-ىنان تومەن بولماۋى كەرەك.
ەگەر اننۋيتەت كەلىسىمشارتىندا كەپىلدەندىرىلگەن تولەمدەر قاراستىرىلسا, زەينەتكەر قايتىس بولعاننان كەيىن قالعان اقشا جويىلىپ كەتپەيدى. ول كەلىسىمدە كورسەتىلگەن ادامعا بەرىلەدى. بۇل جۇبايى, بالاسى نەمەسە باسقا جاقىن تۋىسى بولۋى مۇمكىن.
2026 جىلدان باستاپ وسى ءتارتىپ وزگەرۋى مۇمكىن. ۇسىنىلىپ وتىرعان تۇزەتۋلەرگە سايكەس, كەپىلدەندىرىلگەن تولەمدى الۋشى ادام اقشانى قالاي الاتىنىن ءوزى تاڭداي الادى. ياعني, بىردەن تولىق سومامەن نەمەسە اي سايىن ءبولىپ الۋ مۇمكىندىگى بولادى.
سونىمەن قاتار زەينەتاقى اننۋيتەتىن راسىمدەگەن ادام كەلىسىمشارتتى بۇزباي-اق, تولەم الۋشىنى وزگەرتە الادى. بۇل, مىسالى, باستاپقى الۋشى قايتىس بولعاندا نەمەسە زەينەتكەر اقشانى باسقا بالالارىنا نە نەمەرەلەرىنە بولگىسى كەلگەن جاعدايدا ماڭىزدى.
تاعى ءبىر ناقتىلاۋ بار. ەگەر اننۋيتەت كەلىسىمىن جاساۋعا زەينەتاقى جيناعى ءسال جەتپەي تۇرسا, جەتپەيتىن سومانى ءبىر رەتتە جانە تولىق تولەۋ قاجەت بولادى. ءبولىپ تولەۋگە رۇقسات بەرىلمەيدى.
قازىر بۇل وزگەرىستەر كۇشىنە ەنگەن جوق. زاڭ جوباسى ماجىلىستە قارالىپ جاتىر.