اكتسيا – كاسىپكەرلەردى قولداۋ جانە بۋحگالتەرلىك پەن سالىقتىق ەسەپتى جۇرگىزۋ ساپاسىن ارتتىرۋدى كوزدەيدى. 2026 جىلعى 5 قاڭتاردا باستالىپ, 2026 جىلعى 30 ماۋسىمدا اياقتالادى. اكتسيانى قارجى مينيسترلىگى ىسكە قوسادى, دەپ جازادى Egemen.kz.
كاسىپكەرلەر پراكتيكالىق تۇسىندىرمەلەر الادى
«حالىق بۋحگالتەرى» — جەكە كاسىپكەرلەر مەن شاعىن بيزنەس سۋبەكتىلەرىنە ارنالعان تەگىن كونسۋلتاتسيالىق كومەك.
كاسىپكەرلەر بۋحگالتەرلىك ەسەپ, سالىقتىق ەسەپتىلىك جانە اقپاراتتىق جۇيەلەرمەن جۇمىس ىستەۋ ماسەلەلەرى بويىنشا تۇسىنىكتى ءارى پراكتيكالىق تۇسىندىرمەلەر الا الادى.
نەگىزگى فورمات – وفلاين
نەگىزگى فورمات قالالار مەن وبلىس ورتالىقتارىنداعى مەملەكەتتىك كىرىستەر باسقارمالارى بازاسىندا وفلاين قابىلداۋ تۇرىندە بولادى.
2026 جىلعى قاڭتار-اقپان ايلارىندا كونسۋلتاتسيالار اپتاسىنا 3 رەت (دۇيسەنبى, سارسەنبى, جۇما) ساعات 10:00-دەن 13:00-گە دەيىن وتكىزىلەدى.
2026 جىلعى ناۋرىزدان باستاپ كونسۋلتاتسيالار اپتاسىنا 2 رەت جۇرگىزىلەدى.
كونسۋلتاتسيالاردى ەڭ تاجىريبەلى ماماندار جۇرگىزەدى
قابىلداۋ ورىندارى جۇمىس كەستەسى مەن مەكەنجايى كورسەتىلگەن «حالىق بۋحگالتەرى» اتتى ارنايى ماڭدايشالارمەن بەلگىلەنەتىن بولادى.
اكتسيا شەڭبەرىندە كونسۋلتاتسيالاردى كاسىبي بۋحگالتەرلەر مەن اۋديتورلار, كاسىبي بۋحگالتەرلىك بىرلەستىكتەردىڭ وكىلدەرى, سونداي-اق زاڭناما نورمالارىن ءتۇسىندىرۋ ءۇشىن مەملەكەتتىك كىرىستەر ورگاندارىنىڭ ەڭ تاجىريبەلى قىزمەتكەرلەرى جۇرگىزەدى.
كاسىپكەرلەر ءۇشىن تاعى قانداي مۇمكىندىكتەر قولجەتىمدى؟
استانا, الماتى, شىمكەنت قالالارىندا كونسۋلتاتسيالار وتكىزۋ ءۇشىن جەكە ورىندار بەلگىلەۋ جوسپارلانىپ وتىر. وڭىرلەردە كونسۋلتاتسيالار اۋداندىق دەڭگەيدە, قاجەت بولعان جاعدايدا مامانداردىڭ بارۋىمەن ۇيىمداستىرىلادى.
سونداي-اق قابىلداۋ ۋاقىتىندا اۋداندىق جانە قالالىق باسقارمالار اراسىندا بەينەبايلانىس پەن تەلەفون ارقىلى كەڭەس بەرۋ مۇمكىندىگى كوزدەلگەن.
بەتپە-بەت كونسۋلتاتسيالاردان بولەك, كاسىپكەرلەر ءۇشىن كەلەسى مۇمكىندىكتەر قولجەتىمدى بولادى:
- رەسمي رەسۋرستار ارقىلى ونلاين-كونسۋلتاتسيالار;
- ۆەبينارلار (ونلاين جانە وفلاين فورماتتا);
- ەسەپتى كەزەڭدەردە تاقىرىپتىق كونسۋلتاتسيالىق سەسسيالار.
اقپاراتتار جاڭارتىلىپ, تولىقتىرىلادى
مەملەكەتتىك كىرىستەر كوميتەتى زاڭناما نورمالارىن قاراپايىم تىلمەن تۇسىندىرەتىن جانە اقپاراتتىق جۇيەلەردە جۇمىس ىستەۋ بويىنشا قادامدىق نۇسقاۋلىقتارى بار نەگىزگى تاقىرىپتار بويىنشا بۋكلەتتەر دايىندايدى.
سونىمەن قاتار Call-ورتالىققا ارنالعان ماتەريالدار جاڭارتىلىپ, SalykBot Telegram-ارناسى اقپاراتپەن تولىقتىرىلادى.
«حالىق بۋحگالتەرى» اكتسياسى سالىق تولەۋشىلەرمەن جۇمىس ىستەۋدە باقىلاۋ مودەلىنەن سەرۆيستىك سۇيەمەلدەۋگە كوشۋ جولىنداعى العاشقى قادام بولماق. الداعى ۋاقىتتا قۇقىق بۇزۋشىلىقتاردىڭ الدىن الۋعا جانە كونسۋلتاتسيالىق قولداۋدىڭ ساپاسىن ارتتىرۋعا باعىتتالعان قوسىمشا شارالاردى ىسكە اسىرۋ جوسپارلانىپ جاتىر.
اكتسيانىڭ باستالاتىنى تۋرالى 23 جەلتوقساندا ۇكىمەت وتىرىسىندا مالىمدەلگەن ەدى.