اۋا رايىنىڭ كۇرت ناشارلاۋىنا بايلانىستى قاراعاندى وبلىسىنداعى رەسپۋبليكالىق جانە وبلىستىق ماڭىزى بار اۆتوجولداردا بارلىق باعىتتا قوزعالىس ۋاقىتشا شەكتەلدى, دەپ حابارلايدى Egemen.kz.
جول قوزعالىسى قاۋىپسىزدىگىن قامتاماسىز ەتۋ ماقساتىندا پاترۋلدىك پوليتسيا باتالونىنىڭ جەكە قۇرامى كۇشەيتىلگەن قىزمەت رەجيمىنە اۋىستىرىلدى. قازىرگى ۋاقىتتا وبلىس تراسسالارىندا 80 ەكيپاج جانە 160 پوليتسيا قىزمەتكەرى جۇمىلدىرىلىپ, جول جاعدايىن تاۋلىك بويى باقىلاۋدا ۇستاپ وتىر. پوليتسيا قىزمەتكەرلەرى جول قوزعالىسىنا قاتىسۋشىلارعا كومەك كورسەتىپ, كولىك قۇرالدارىن قاۋىپسىز الىپ ءجۇرۋدى قامتاماسىز ەتىپ جاتىر.
بۇل تۋرالى قاراعاندى وبلىسى پوليتسيا دەپارتامەنتىنىڭ ءباسپاسوز قىزمەتى حابارلادى.
بۇگىن تاڭەرتەڭنەن باستاپ پوليتسيانىڭ ىلەسىپ جۇرۋىمەن:
قاراعاندى – تەمىرتاۋ باعىتى بويىنشا – 500 اۆتوكولىك, تەمىرتاۋ – قاراعاندى باعىتى بويىنشا – 300 اۆتوكولىك, اقمولا وبلىسىنىڭ شەكاراسىنا دەيىن – 1200 اۆتوكولىك قاۋىپسىز وتكىزىلدى.ء«بىزدىڭ باستى ماقساتىمىز - ازاماتتاردىڭ ءومىرى مەن دەنساۋلىعىن ساقتاۋ. وسى ورايدا ءوڭىر اۆتوجولدارىنداعى قاۋىپسىزدىكتى قامتاماسىز ەتۋ ءۇشىن بارلىق قاجەتتى شارالار قابىلدانىپ جاتىر», دەدى قاراعاندى وبلىسى پوليتسيا دەپارتامەنتى پاترۋلدىك پوليتسيا باتالونىنىڭ كومانديرى مەدەت نۇرمۇحانوۆ.
سونىمەن قاتار ول وبلىس تۇرعىندارى مەن قوناقتارىن قوزعالىسقا ەنگىزىلگەن ۋاقىتشا شەكتەۋلەرگە تۇسىنىستىكپەن قاراۋعا جانە پوليتسيا قىزمەتكەرلەرىنىڭ زاڭدى تالاپتارىن ورىنداۋعا شاقىردى.
پوليتسيا قولايسىز اۋا رايى جاعدايىندا جۇرگىزۋشىلەرگە الىس ساپاردان باس تارتۋعا, جول بەلگىلەرى مەن بەلگىلەنگەن جىلدامدىق رەجيمىن قاتاڭ ساقتاۋعا, قاۋىپسىز اراقاشىقتىقتى ۇستانۋعا, سونداي-اق مارشرۋتتى جوسپارلاۋ بارىسىندا كۇردەلى مەتەورولوگيالىق جاعدايدى ەسكەرۋگە كەڭەس بەرەدى. توتەنشە جاعداي تۋىنداعان جاعدايدا پوليتسيا قىزمەتكەرلەرىنەن جەدەل كومەك سۇراۋ قاجەت.
ايتا كەتەيىك, استاناداعى اۋا رايىنىڭ قولايسىزدىعىنا بايلانىستى ەلوردانىڭ كوممۋنالدىق قىزمەتتەرى كۇشەيتىلگەن رەجيمدە جۇمىس ىستەپ جاتىر.