جۋىردا وبلىس ورتالىعىندا پوليتسەيلەر سينتەتيكالىق ەسىرتكى تاراتتى دەگەن كۇدىكپەن 19 جاستاعى قالا تۇرعىنىن ۇستادى. قۇقىق قورعاۋ ورگاندارىنىڭ قىزمەتكەرلەرى پروكۋراتۋرامەن بىرلەسىپ جۇرگىزگەن ءىس-شارا بارىسىندا ونىڭ جالدامالى پاتەرىنەن «ەفەدرون» دەپ اتالاتىن پسيحوتروپتىق زاتتىڭ 123 گرامى تاركىلەندى.
كۇدىكتى پەتروپاۆلدىڭ شەت جاعىندا جاسىرىلعان ەسىرتكى قويماسى بار ەكەنىن ايتقان. تەكسەرۋ بارىسىندا ول جەردەن اسا ءىرى كولەمدەگى پسيحوتروپتىق زاتتار تابىلدى. تاركىلەنگەن ەسىرتكىنىڭ جالپى سالماعى 276 گرامنان استى. قىلمىستىق كودەكستىڭ 279-بابى 3-بولىگى بويىنشا مۇنداي قىلمىسقا 12 جىلعا دەيىن باس بوستاندىعىنان ايىرۋ جازاسى قاراستىرىلعان.
وسىنداي جازا پەتروپاۆلدىڭ تاعى ءبىر تۇرعىنىنا دا بەرىلۋى مۇمكىن. ول ءوزىنىڭ «Kia Cerato» اۆتوموبيلىمەن استانادان پەتروپاۆلعا ەسىرتكىنىڭ اسا ۇلكەن كولەمىن جەتكىزگەن دەگەن كۇدىككە ىلىنگەن. ونىڭ ماشيناسىنىڭ جۇكسالعىشىنان جالپى سالماعى 608 گرامم «مەفەدرون» (α-PvP) ەسىرتكىسىنىڭ 4 وراماسى تابىلعان.
استانادان كەلگەن ءبىرى 18, ەكىنشىسى 17 جاستاعى ەكى ورىمدەي جاستىڭ بويىنان ءتارتىپ ساقشىلارى يزولەنتامەن ورالعان, ۇنتاق ءتارىزدى زات سالىنعان 3 تۇيىنشەكتى تاۋىپ الدى. بۇل جالپى سالماعى 84 گرامنان اساتىن «α-PvP» اتاۋىمەن بەلگىلى سينتەتيكالىق پسيحوتروپتىق زاتتار ەكەنىن ساراپتاما انىقتادى. كۇدىكتىلەرگە دە 7 جىلدان 12 جىلعا دەيىن باس بوستاندىعىنان ايىرۋ جازاسى كوزدەلگەن. قازىر اتالعان فاكتى بويىنشا تەرگەۋ جۇرگىزىلىپ جاتىر. جىگىت قاماۋعا الىندى, ال ونىڭ سەرىكتەسى, 17 جاستاعى قىزعا «كەلۋ تۋرالى مىندەتتەمە» تۇرىندەگى بۇلتارتپاۋ شاراسى قولدانىلدى.
سونداي-اق ەسىرتكى قىلمىسىنا قارسى ءىس-قيمىل باسقارماسى كەيىنگى كەزدە تۇرعىندار اراسىنان «جاسىرۋشى» بويىنشا قىلمىستىق ىستەر سيرەك كەزدەسە باستاعانىن ايتادى. بۇل جىل باسىنان بەرى وبلىستا جۇرگىزگەن الدىن الۋ شارالارىنىڭ ناتيجەسى بولسا كەرەك. ءتارتىپ ساقشىلارى جىل باسىنان بەرى 56 «جاسىرۋشىنى» ۇستاپ, ىستەرىن سوتقا جەتكىزگەن. الايدا 48 جاستاعى ءبىر ايەلدىڭ «جاسىرۋشىلار» قاتارىنان تابىلعانى وكىنىش ۇيالاتادى. ءتارتىپ ساقشىلارى ونىڭ سومكەسىنەن قىزعىلت ءتۇستى كريستالل ءتارىزدى زات سالىنعان 15 تۇيىنشەك تاركىلەدى. ۇستالعان ايەلدىڭ كورسەتۋى بويىنشا بۇعان دەيىن جاسىرىپ كەتكەن «قالتالار» دا انىقتالدى. تاركىلەنگەن سينتەتيكالىق پسيحوتروپتىق زاتتىڭ (α-PvP) جالپى سالماعى 40 گرامعا جۋىق بولدى. بۇل شامامەن 300 ءبىر رەتتىك دوزاعا تەڭ. اتالعان دەرەك بويىنشا قىلمىستىق ءىس قوزعالىپ, كۇدىكتى قاماۋعا الىندى. جەدەل اقپاراتقا سايكەس, ايەل ەسىرتكى تاراتۋمەن تامىز ايىنان بەرى اينالىسقان. ادەتتە «قالتالاۋشىلاردىڭ» كوبى مۇنداي زاڭسىز ارەكەتپەن ءۇش ايدان ارتىق اينالىسا المايدى.
جالپى ەسەپ بويىنشا, جىل باسىنان بەرى وبلىس اۋماعىندا ەسىرتكى ساتۋ كۇدىگىمەن 132 ادام, سونىڭ ىشىندە 13 ايەل ۇستالدى. قازىر پوليتسيا الدىن الۋ جۇمىسىنىڭ جاڭا فورماتىن ەنگىزىپ جاتىر. ەندى پوليتسيا ەسىرتكى قىلمىستارىنىڭ الدىن الۋ كەڭەسىنىڭ مۇشەلەرىمەن بىرگە اتا-انالار كوميتەتتەرىنىڭ توراعالارىن دا كەزدەسۋلەرگە شاقىراتىن بولدى.
سولتۇستىك قازاقستان وبلىسى