اتىراۋ وبلىسىندا «تەڭىز» كەن ورنىنان الىنعان گازدى ءتۇرلى قوسپادان ايىراتىن كەشەننىڭ قۇرىلىسى باستالدى. جاڭا نىساندى ىسكە قوسۋ 2028 جىلدىڭ سوڭىنا پايدالانۋعا بەرۋ 2029 جىلعا جوسپارلانىپ وتىر.
جوبانى «KMG PetroChem» جشس ىسكە اسىرادى. كومپانيانىڭ باسقارما توراعاسى دياز ديانوۆتىڭ دەرەگىنە قاراعاندا, قۇرىلىس جۇمىسى حالىقارالىق كونسورتسيۋممەن بىرلەسە اتقارىلادى. كونسورتسيۋمعا يتاليانىڭ Tecnimont S.p.A. (Maire توبى) جەتەكشىلىك ەتەدى. ونىڭ قۇرامىندا CCIC (ليۆان) كومپانياسى دا بار.
«گاز وڭدەيتىن كەشەننىڭ قۋاتى جىلىنا – 9,1 ملرد تەكشە مەتر. ەلىمىزدىڭ مۇناي-گاز حيمياسى ونەركاسىبىن دامىتۋعا سەرپىن بەرەتىن نىسان قۇرىلىسىنىڭ الاڭىندا 22 مىڭعا جۋىق قادا قاعىلادى. قادانىڭ ءبارى قازاقستاندىق وندىرۋشىلەردەن ساتىپ الىنادى. بۇل جوبا «سيللەنو» كومپانياسىنىڭ پوليەتيلەن شىعاراتىن زاۋىتىن جىلىنا 1,6 ملن توننا ەتانمەن قامتاماسىز ەتۋگە باعىتتالىپ وتىر. كەشەن ىسكە قوسىلعان سوڭ جىلىنا 360 مىڭ تونناعا دەيىن پروپان وندىرەدى. بۇل فراكتسيالار «تەڭىزشەۆرويل» جشس جەتكىزەتىن قۇرعاق تازارتىلعان گازدان ءبولىنىپ الىنادى», دەيدى د.ديانوۆ.
ونىڭ دەرەگىنە سۇيەنسەك, نىسان قۇرىلىسى كەزىندە وتاندىق قامتۋ ۇلەسىن ارتتىرۋعا باسىمدىق بەرىلەدى. قۇرىلىسقا وتاندىق كاسىپورىندار, وندىرىستىك سەرۆيستەر جانە بىلىكتى ماماندار تارتۋ كوزدەلىپتى.
«قازاقستان كاسىپورىندارى شىعاراتىن ونىمدەردى اۋقىمدى كولەمدە پايدالانۋ جوسپارلانىپ وتىر. ماسەلەن, 1 ملن 193 مىڭ تەكشە مەتر ينەرتتى ماتەريال, 27 مىڭ توننادان استام مەتالل كونسترۋكتسيالار, 7 مودۋلدىك قوسالقى ستانسا, 62 ترانسفورماتور, 220 كۆ اشىق تاراتۋ قۇرىلعىسى نەگىزگى ەلەكتر-تەحنيكالىق جابدىقتار, پروپان ساقتاۋعا ارنالعان كولدەنەڭ بۋلليتتەر مەن 4 ءىرى كولوننا تۇرىندەگى ءىرى تەحنولوگيالىق قۇرىلعىلار ساتىپ الىنادى. قۇرىلىس جۇمىسى قارقىن العان كەزدە اتىراۋ جانە ماڭعىستاۋ وبلىسىنىڭ تۇرعىندارى ءۇشىن 3 500-گە دەيىن ۋاقىتشا, 400 تۇراقتى جۇمىس ورنى اشىلادى», دەيدى د.ديانوۆ.
اتىراۋ وبلىسى