پرەزيدەنت تاپسىرماسى بويىنشا بالاباقشالاردى ۆاۋچەرلىك قارجىلاندىرۋ اۋقىمى كەڭەيتىلدى. بۇل تۋرالى ۇكىمەتتىڭ قورىتىندى ءباسپاسوز-كونفەرەنتسياسىندا وقۋ-اعارتۋ ءبىرىنشى ۆيتسە-ءمينيسترى مايرا مەلدەبەكوۆا ءمالىم قىلدى, دەپ حابارلايدى Egemen.kz.
«اقشا بالاعا بەرىلەدى» قاعيداتى نەگىزىندە مەكتەپكە دەيىنگى ۇيىمداردا ورىندار ءبولۋدىڭ جاڭا مەحانيزمى ەنگىزىلگەنى ءمالىم. مەملەكەت باسشىسىنىڭ تاپسىرماسىنا سايكەس پيلوتتىق جوبا 20 قالا, 16 اۋداندا جۇزەگە اسىرىلىپ جاتىر. «بيىل «اقشا بالاعا بەرىلەدى» قاعيداتى نەگىزىندە ۆاۋچەرلىك قارجىلاندىرۋ مەحانيزمىن وڭىرلەردە كەڭىنەن تاراتۋ ارقىلى بالاباقشالارعا كەزەك سانى 2 ەسەگە دەيىن ازايدى. پيلوتتىق جوباعا 5,6 مىڭ مەكتەپكە دەيىنگى ۇيىم قاتىسىپ, 788 مىڭ بالاعا ۆاۋچەر بەرىلدى. ۆاۋچەرلىك قارجىلاندىرۋ 21,8 ميلليارد تەڭگە بيۋدجەت قاراجاتىن ۇنەمدەپ, ول بالالارعا جاڭا ۆاۋچەرلەر بەرۋگە قايتا جۇمسالدى», دەدى م.مەلدەبەكوۆا.