ەلىمىزدە «پەداگوگ مارتەبەسى تۋرالى» زاڭ قابىلدانعاننان بەرى ۇستازداردىڭ قۇقىعىن بۇزۋ فاكتىلەرى ءۇش ەسە ازايىپ وتىر. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى سەرىك ءاشىروۆ مالىمدەدى, دەپ جازادى Egemen.kz.
پەداگوگتەردىڭ قۇقىن بۇزۋ فاكتىلەرىنىڭ باسىم بولىگى زاڭ قابىلدانعان العاشقى جىلدارى تىركەلگەن. مىسالى 2020–2022 جىلدارى 111 بۇزۋشىلىق دەرەگى رەسمي تۇردە تىركەلسە, سوڭعى ءۇش جىلدا بۇل كورسەتكىش 38-گە دەيىن ازايعان.
«بۇل كورسەتكىش «پەداگوگ مارتەبەسى تۋرالى» زاڭ تالاپتارىنىڭ ناقتى ىسكە اسىرىلىپ جاتقانىن ايقىندايدى. وسى باعىتتاعى جۇمىستاردى كۇشەيتۋ ماقساتىندا كوميتەت جانە ونىڭ اۋماقتىق دەپارتامەنتتەرى پروكۋراتۋرا ورگاندارىمەن بىرلەسە وتىرىپ ناقتى فاكتىلەرگە جەدەل ارەكەت ەتەتىن بولادى», دەدى سەرىك ءاشىروۆ.
مينيسترلىكتىڭ مالىمەتىنشە, سالاداعى زاڭ بۇزۋشىلىقتاردىڭ باسىم بولىگى پەداگوگتەردى كاسىبي مىندەتىنە جاتپايتىن جۇمىستارعا تارتۋ, ولاردىڭ ار-نامىسىنا تيۋ, كونتسەرت بيلەتتەرىن ساتىپ الۋعا نەمەسە ءتۇرلى ءىس-شارالارعا قاتىسۋعا ماجبۇرلەۋ سيپاتىندا ءوربيدى.
سونداي-اق پەداگوگكە قۇرمەتسىزدىك تانىتۋ, ونىڭ ىشىندە الەۋمەتتىك جەلىلەر مەن باق ارقىلى ار-نامىسىنا نۇقسان كەلتىرۋ دەرەكتەرى بويىنشا وقۋشىلاردىڭ اتا-انالارىنا قاتىستى 12 اكىمشىلىك ءىس قوزعالعان.
ەسكە سالايىق, «پەداگوگ مارتەبەسى تۋرالى» زاڭعا 2019 جىلدىڭ 27 جەلتوقسانىندا پرەزيدەنت قاسىم-جومارت توقاەۆ قول قويعان بولاتىن.
وقۋ-اعارتۋ ءمينيسترى جۇلدىز سۇلەيمەنوۆا «Egemen Qazaqstan» گازەتىنىڭ 4 قازانىندا جاريالانعان سانىنداعى «جاڭا ءداۋىر پەداگوگى – قوعامنىڭ باستى ايناسى» ماقالاسىندا ەلىمىزدە مۇعالىمدەردىڭ قۇقىن قورعاۋ ماسەلەسى نازاردان تىس قالمايتىنىن اتاپ وتكەن بولاتىن.