ءماجىلىس دەپۋتاتى ەرلان سايروۆ «بايتەرەك» ۇلتتىق باسقارۋشى حولدينگى» اكتسيونەرلىك قوعامىنىڭ باسقارما توراعاسى رۋستام قاراعويشيننەن شەتەلدىك ءىرى كورپوراتسيانى قولداۋعا نەلىكتەن قوماقتى قاراجات بولىنگەنىن سۇرادى, دەپ حابارلايدى Egemen.kz.
دەپۋتات ەرلان سايروۆ «بايتەرەك» حولدينگى مەن «قازتسينكتىڭ» 70% اكتسياسىنا يەلىك ەتەتىن شۆەيتساريالىق «Glencore» كومپانياسىن قاتاڭ سىنعا الدى.
«ەكسپورتتاۋشىلاردى قارجىلاندىرۋ باعدارلاماسى اياسىندا بولىنگەن شامامەن 1 ترلن تەڭگە قاراجاتتىڭ 35%-ىن «قازتسينك» اق العان. ەكسپورتتى قولداۋدىڭ ماقساتى − وتاندىق جوعارى تەحنولوگيالىق ءونىمنىڭ حالىقارالىق نارىقتارعا شىعۋىن قامتاماسىز ەتۋ. بۇل جەردە «قازتسينكتىڭ» قانداي قاتىسى بار؟ «قازتسينك» جارتىلاي فابريكاتتاردى ەكسپورتتايدى. ەڭ قىزىعى, كومپانيا بيرجادا ساۋدا جاسايتىندىقتان, الدىن الا تولەممەن جۇمىس ىستەيدى. سوندا ترانسۇلتتىق «Glencore» كورپوراتسياسىن نە ءۇشىن نەسيەلەندىرۋمىز كەرەك؟», دەدى ە.سايروۆ.
ونىڭ ايتۋىنشا, «Glencore» قازاقستاندا بولعان 20 جىل ىشىندە جوعارى تەحنولوگيالى وتاندىق ءونىمنىڭ بىردە-ءبىر كىرپىشىن قالاپ كورمەگەن. ءماجىلىس دەپۋتاتى مەملەكەتتىك قاراجاتتىڭ قازاقستانداعى شەتەلدىك كومپانيالاردى قولداۋعا نە سەبەپتى جۇمسالىپ وتىرعانىن سۇرادى. دەپۋتات بۇل سۇراعىن «بايتەرەك» ۇلتتىق حولدينگىنىڭ باسشىسى رۋستام قاراعويشينگە قويدى.
رۋستام قاراعويشين «قازتسينكتىڭ» قازاقستان رەسپۋبليكاسىنىڭ يۋريسديكتسياسىندا تىركەلگەن وتاندىق كومپانيا ەكەنىن جانە «بايتەرەك» حولدينگى ءۇشىن قارجىلاندىرۋعا ءوتىنىم بەرگەن كەز كەلگەن وتاندىق كاسىپورىن كليەنت بولىپ ەسەپتەلەتىنىن ايتتى.
ء«بىز ءوتىنىمدى قاراپ, ونىڭ نەگىزدىلىگى مەن ءبىزدىڭ تالاپتارعا سايكەستىگى بولعان جاعدايدا قاناعاتتاندىرۋىمىز كەرەك. ەكسپورتتىق باعىت – كۇردەلى سالا. ءبىز قازاقستان ەكسپورتىنىڭ نەدەن تۇراتىنىن جاقسى بىلەمىز. بۇل سىرتقى نارىقتارعا شىعارىلاتىن 10 نەگىزگى ءونىم. قازىر جوعارى تەحنولوگيالىق باعىتتارعا كوبىرەك كوڭىل ءبولىنىپ وتىرعانى تۇسىنىكتى. الايدا ولار جۇمىس ىستەپ تۇرعان سالالارمەن سالىستىرعاندا باياۋ دامىپ جاتىر. كەز كەلگەن ەكسپورت ەلگە ۆاليۋتا ءتۇسىمىن اكەلەدى, بيۋدجەتكە قوسىمشا كىرىس بەرەدى. سوندىقتان ءبىز وتاندىق ەكسپورتتاۋشىلاردى قولداۋعا تىرىسامىز», دەدى قاراعويشين.
ول سونداي-اق قازىرگى كەزدە مەتاللۋرگيا سالاسىنىڭ دا سىرتقى نارىقتاردا قيىندىقتارعا تاپ بولىپ وتىرعانىن, سول سەبەپتى حولدينگ قازاقستان ەكسپورتىن قولداۋعا تىرىساتىنىن ايتتى.