استانا. 23 ناۋرىز. كاسىپقوي بوكستان ورتا سالماقتا IBO, WBA (Super) جانە WBC (Interim) تۇجىرىمدارى بويىنشا الەم چەمپيونى گەننادي گولوۆكين كەلەسى جەكپە-جەگىن 16 مامىر كۇنى امەريكالىق ۆيللي مونروعا قارسى وتكىزەتىنى بەلگىلى. تاياۋدا قارسىلاستاردىڭ قاتىسۋىمەن اقش-تا العاشقى ءباسپاسوز ءماسليحاتى ءوتتى. اتالعان شارادا وتانداسىمىز مونرو تۋرالى پىكىرىن ءبىلدىردى. بۇل تۋرالى egemen.kz حابارلادى.
«مونرومەن بولاتىن ايقاس اسا تارتىستى بولادى دەپ سەنەمىن. جانكۇيەرلەرىم دە وسى جەكپە-جەكتى اسىعا كۇتىپ وتىر. بۇل كەزدەسۋدىڭ ەكى-ءۇش راۋندقا عانا سوزىلمايتىنى بەلگىلى. سەبەبى, قارسىلاسىم اشىق ايقاسقا تۇسپەيتىن, جابىق بوكسشى. ونىڭ بوكستاسۋ مانەرىن كۋبالىق ءتاسىل دەسە دە بولادى. ويتكەنى, ونىڭ شارشى الاڭداعى ءادىسى بەلگىلى كۋبالىقتار گيلەرمو ريگوندو مەن ەريسلاندي لاراعا ۇقسايدى. سوندىقتان ۆيللي ماعان دا, كانەلو الۆارەسكە دە وڭاي قارسىلاس بولمايدى», – دەدى گولوۆكين.
ايتا كەتەيىك, قوس بوكسشى اراسىنداعى ايقاس 16 مامىردا ينگلۆۋد (اقش) قالاسىنداعى 17 مىڭ ورىندىق The Forum ارەناسىندا وتەدى. 28 جاستاعى ۆيللي مونرو بۇگىنگە دەيىن كاسىپقوي بوكستا 20 كەزدەسۋ وتكىزىپ, سونىڭ بىرەۋىندە عانا جەڭىلگەن. سولاقاي بوكسشى ورتا سالماقتا Boxcino-2014 ءتۋرنيرىنىڭ جەڭىمپازى.
ال گولوۆكين سوڭعى كەزدەسۋىن 22 اقپان كۇنى موناكودا مارتين ميۋررەيگە قارسى وتكىزدى. بۇگىنگە دەيىن 32 جەكپە-جەك وتكىزىپ, بارىندە جەڭىسكە جەتكەن قازاقستاندىق بوكسشى 16 مامىردا ءوزىنىڭ چەمپيوندىق اتاعىن 14-رەت قورعاۋ ءۇشىن جۇدىرىقتاسادى.
ەلامان قوڭىر.
دەرەك: egemen.kz.
سۋرەت: boxingplanet.ru.