ء«بىر ولكە – ءبىر كىتاپ» وبلىستىق اكتسياسى اياسىندا بەلگىلى قالامگەر, جازۋشىلار وداعىنىڭ مۇشەسى, اقىن سايلاۋحان ناكەنوۆتىڭ 85 جىلدىعىنا ارنالعان «اقىن. پاراسات. ۇلىلىق» اتتى جىر كەشى ءوتتى. ءىس-شارا بارىسىندا وقىرماندار «پاراسات بيىگىندەگى اقىن» دەگەن تاقىرىپتاعى كىتاپ كورمەسىمەن تانىستى.
ء«بىر ولكە – ءبىر كىتاپ» وبلىستىق اكتسياسى 2012 جىلدان باستاۋ الىپ, « ۇلىتاۋ كىتاپحاناسى» سەرياسىمەن جارىق كورگەن ادەبي ەڭبەكتەردى كەڭىنەن ناسيحاتتايدى. بيىل سايلاۋحان ناكەنوۆتىڭ شىعارماشىلىعىنا ارنالعان 12 ءتۇرلى مادەني ءىس-شارا ۇيىمداستىرىلدى», دەدى ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ماعجان تابىلدين.
ولەڭ – جۇرەكتىڭ ءۇنى, جۋرناليستيكا – ازاماتتىق ءۇن. قالامىن شىندىق جولىنا ارناعان سايلاۋحان ناكەنوۆ وسى ەكى ونەردى قاتار ۇستاپ, حالقىنىڭ رۋحانياتىنا ادال قىزمەت ەتكەن. ونىڭ شىعارماسىنىڭ نەگىزگى ارقاۋى – تۋعان جەر تاريحى. تۋعان توپىراعىنا تابان تىرەپ, اسقاق تاۋىنا ارقا سۇيەگەن اقىننىڭ «تۋعان جەر», «قازاقستان», «جەز داڭقى» ولەڭدەرىن جاستار تەبىرەنىپ جاتقا وقىدى.
«سايلاۋحان ناكەنوۆ – پوەزيادا مويىندالعان اقىن. وبلىستىق «جەزقازعان تۋى» گازەتىنىڭ العاشقى كۇنىنەن سوڭعى ساتىنە دەيىن ەڭبەك ەتتى, تەر توكتى. «جەزقازعان تۋى» باسىلىمىندا جيىرما جىل سول كىسىمەن بىرگە جۇمىس ىستەدىم. جازا بىلەتىن, ءسوز تۇسىنەتىن ادامعا ويىن اشىق ايتاتىن. جەزقازعان قالاسىندا جاس اقىندارعا ارنالعان «قۇرىش» اتتى ادەبي بىرلەستىك اشتى» دەپ ەسكە الدى جازۋشىلار وداعىنىڭ جەزقازعان وبلىسىنداعى وكىلى باتىربەك مىرزابەكوۆ.
اقىن, جازۋشىلار وداعىنىڭ مۇشەسى عازيز ەشتاناەۆ س.ناكەنوۆتىڭ « ۇلىتاۋ ءۇنى» دەپ فەستيۆال اتاۋىن قويىپ, ونى العاش ۇيىمداستىرۋشىنىڭ ءبىرى بولعانىن, قوعام قايراتكەرى قايىربەك سادۋاقاسوۆ ەكەۋى جاس دارىندى اقىنداردى جەزقازعان پەداگوگيكالىق ينستيتۋتىنا ەمتيحانسىز اڭگىمەلەسۋ ارقىلى قابىلداۋعا ىقپال ەتكەنىن تىلگە تيەك ەتتى.
سايلاۋحان ناكەنوۆتىڭ «سارىارقا» ولەڭىنە قازاقستاننىڭ ەڭبەك سىڭىرگەن ءارتىسى عالىم مۇحامەدين ءان شىعارعان. وسى ءبىر رۋحتى ءاندى ءانشىنىڭ ءوز ورىنداۋىندا تىڭداپ, كورەرمەن ءبىر جەلپىنىپ قالدى.
جەرگىلىكتى اقىن مۇسا تىلەۋوۆ: « ۇلىتاۋ اۋدانىندا رامىزدەر الاڭى بار. الاڭنىڭ اينالاسىن اباتتاندىرىپ, ۇلىتاۋعا قاتىستى تۇلعالارعا ءمۇسىن قويىلسا, سولاردىڭ قاتارىندا « ۇلىتاۋ» ولەڭىن جازعان سايلاۋحان ناكەنوۆ پەن ءانىن جازعان جاقسىكەلدى سەيىلوۆتىڭ دە ءمۇسىنى ورناتىلسا دەگەن ۇسىنىسىم بار», دەدى.
ايتىس اقىنى مۇقاش سەيىتقازينوۆ اقىننىڭ كوزى تىرىسىندە «قۇدىرەتتى قولدار», «جۇماقتىڭ جولى» اتتى ەكى كىتابىنىڭ شىققانىن, ولاردى وزىنە قولتاڭباسىمەن ۇسىنعانىن ەسكە الدى.
ۇلىتاۋ وبلىسى