بۇگىن استانا قالاسى توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باسشىسىنىڭ ورىنباسارى عابيت باباەۆ جاڭا جىل مەرەكەسى قارساڭىندا ءۇي-جايدا شىرشا ورناتۋ مەن وتشاشۋ ۇيىمداستىرۋ تارتىبىن وڭىرلىك كوممۋنيكاتسيالار قىزمەتىندە وتكەن بريفينگتە تۇسىندىرىپ بەردى, دەپ جازادى Egemen.kz.
مەرەكە قارساڭىندا توتەنشە جاعدايدىڭ الدىن الۋ ماڭىزدى. سوندىقتان شىرشالاردى قاۋىپسىزدىك تالابىنا ساي ورناتىپ, وتشاشۋعا ارنالعان پيروتەحنيكالىق قۇرالداردى رۇقسات ەتىلگەن ايماقتا قولدانۋ قاجەت.
«شىرشالاردى قۇلامايتىنداي ەتىپ, دۇرىستاپ بەكىتۋ كەرەك. سونىمەن قاتار ەۆاكۋاتسيا كەزىندە قولدانىلاتىن شىعۋ جولدارىنا ورناتۋعا بولمايدى. شىرشا بەزەندىرۋگە ارنالعان ەلەكترلى اشەكەي شامدار زاقىمدالماعان, زاۋىتتان شىققان بولۋ كەرەك», دەدى عابيت باباەۆ.
سونداي-اق پيروتەحنيكالىق قۇرالداردى اشىق اۋماقتا ءارى اۆتوكولىك پەن عيماراتتاردان 50 مەتر قاشىقتىقتا قولدانۋ قاجەت ەكەنىنە نازار اۋداردى.
«ساۋدا ورىندارىنان پيروتەحنيكالىق قۇرالداردى ساتىپ الاردا مۇقيات بولىپ, سىرتىنداعى نۇسقاۋلىق بويىنشا قولدانعان دۇرىس. تۇرعىن ۇيلەردەن الىس اشىق الاڭدا پايدالانۋ كەرەك. بالالارعا بەرۋگە, جەلدى كۇنى قولدانۋعا, شاتىر استى مەن اعاشتاردىڭ قاسىندا قولدانۋعا تىيىم سالىنادى», دەدى استانا قالاسى توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باسشىسىنىڭ ورىنباسارى.
ايتا كەتەيىك, بۇگىن ۇكىمەت باسشىسى ولجاس بەكتەنوۆ مەرەكە كۇندەرىندەگى قاۋىپسىزدىك شارالارىن پىسىقتاپ, قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيا وتىرىسىن وتكىزدى.