مەملەكەت باسشىسى قاسىم-جومارت توقاەۆ ينكليۋزيۆتى سپورت ورتالىعىنىڭ قىزمەتىمەن تانىستى, دەپ جازادى اقوردا.
بۇل ەلىمىزدەگى مۇگەدەكتىگى بار ادامدارعا ارنالعان سپورتتىق, مەديتسينالىق, وڭالتۋ جانە ءبىلىم بەرۋ ينفراقۇرىلىمىن بىرىكتىرگەن العاشقى كەشەن.
استانادا مۇمكىندىگى شەكتەۋلى 42 مىڭعا جۋىق ازامات تۇرادى. ولاردىڭ باسىم كوپشىلىگى – بالالار, جاستار مەن ەڭبەككە قابىلەتتى جاستاعى ادامدار. ولار ورتالىقتا سپورتپەن تۇراقتى تۇردە شۇعىلدانىپ, وڭالتۋ كۋرسىنان وتە الادى. وسىلايشا, الەۋمەتتىك ورتاعا بوي ۇيرەتەدى.
مەكەمەدە كوپ فۋنكتسيونالدى سپورت زالى, رەابيليتاتسيا بلوگى, 15 مەديتسينالىق كابينەت, كونفەرەنتس-زال, سونداي-اق التى بولمەلى قوناق ءۇي سەكتورى قاراستىرىلعان. مۇندا وقۋ-جاتتىعۋ جيىنى, جارىستار مەن ءبىلىم بەرۋ باعدارلامالارى كەزىندە پاراسپورتشىلار جايعاسادى.
ورتالىقتا سپورتتىڭ 12 بەيىمدەلگەن تۇرىنەن جاتتىعۋ جۇرگىزىلەدى.
سپورت جانە ءبىلىم سالالارىندا مۇمكىندىگى شەكتەۋلى بالالارمەن جۇمىس ىستەيتىن مامان دايارلاۋعا ايرىقشا ءمان بەرىلەدى.