م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە جاساندى ينتەللەكتتى (جي) وقۋ ۇدەرىسى مەن عىلىمعا ەنگىزۋگە باعىتتالعان جاڭا جوبالار باستاۋ الدى. وسى جۇمىستار اياسىندا «باسقارىلاتىن تسيفرلاندىرۋ جانە وزگەرىستەرگە جۇيەلى كوزقاراس» تاقىرىبىندا ەكى كۇندىك ستراتەگيالىق سەسسيا وتۋدە, دەپ جازادى Egemen.kz.
ءىس-شاراعا ۋنيۆەرسيتەتتىڭ باسشىلىق قۇرامى, فاكۋلتەت جانە جوعارى مەكتەپ دەكاندارى, قۇرىلىمدىق ءبولىم باسشىلارى قاتىسىپ, AI-first قاعيداتى مەن تسيفرلىق داۋىردەگى ۋنيۆەرسيتەتتىڭ رولىنە قاتىستى بىلىكتىلىكتەرىن ارتتىرۋدا.
سپيكەر – قازاقستانداعى جاساندى ينتەللەكت جانە تسيفرلىق ترانسفورماتسيا سالاسىنىڭ بىلىكتى مامانى, PhD, innoforce.kz كومپانياسىنىڭ يننوۆاتسيا جونىندەگى ديرەكتورى سانجار اۋباكىروۆ.
ۋنيۆەرسيتەت رەكتورى دارحان احمەد-زاكي ءىس-شارادا بۇل باستاما پرەزيدەنت ق.توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىنداعى تاپسىرماسى اياسىندا جۇزەگە اسىرىلىپ جاتقانىن اتاپ ءوتتى.
– پرەزيدەنت ءوز جولداۋىندا جوعارى وقۋ ورىندارىنداعى وقۋ ۇدەرسىنە جي ەنگىزۋ تۋرالى ءبىرشاما ۇسىنىستارىن ايتىپ, ناقتى تاپسىرمالارىن بەردى. وسى باعىتتا ۋنيۆەرسيتەتىمىزدە جي ۇتىمدى تۇستارىن قولعا الۋدا اقش, قىتايعا جۇمىس ساپارى اياسىندا جەتەكشى جوعارى وقۋ ورىندارىنىڭ AI ۋنيۆەرسيتەتى باعىتىنداعى وزىق تاجىريبەلەرىمەن تانىستىق. اتاپ ايتقاندا, جوعارى وقۋ ورىندارى مەن Open AI, Anthropic, Google سەكىلدى كومپانيالارى اراسىنداعى ءوزارا ءىس-قيمىل تەتىكتەرى, Arizona State University (ASU), Northwestern, Peking, Fudan, Tsinghua ۋنيۆەرسيتەتتەرىنىڭ ۋنيۆەرسيتەت جۇمىسىن ۇيىمداستىرۋدىڭ ىشكى ۇدەرىستەرىندە الدىڭعى قاتارلى AI-first جانە Human-centric تاسىلدەردى قولدانۋداعى جۇمىستارىن ءوز كوزىمىزبەن كوردىك.
ەندىگى كەزەكتە اۋەزوۆ ۋنيۆەرسيتەتىن جاساندى ينتەللەكت نەگىزىندە ترانسفورماتسيالاۋ بويىنشا ناقتى قادامدار جۇزەگە اسىرىلادى. بۇگىنگى ستراتەگيالىق سەسسيا – وسى باعىتتاعى جۇمىستىڭ العاشقى باستاماسى, – دەدى دارحان جۇماقان ۇلى.
سەسسيانىڭ ءبىرىنشى كۇنى سپيكەر سانجار اۋباكىروۆ تسيفرلاندىرۋ, اۆتوماتتاندىرۋ جانە ترانسفورماتسيا ۇعىمدارىنىڭ ايىرماشىلىعىن ءتۇسىندىرىپ, باسقارۋشىلىق شەشىمدەردەگى وزەكتى ماسەلەلەر مەن ولاردى شەشۋ جولدارىن ۇسىندى.
سونداي-اق ەكىنشى كۇنى ۋنيۆەرسيتەتتىڭ تسيفرلىق داۋىردەگى رولىنە قاتىستى كوزقاراستاردى انىقتاپ, سارالاپ ترانسفورماتسيا نەگىزدەرى, دامۋ باستامالارىنا قويىلاتىن كريتەريلەر جانە باسشىلىقتىڭ ءرولى مەن تاجىريبەسى بويىنشا ماڭىزدى ماسەلەلەردى تالقىلادى. سەسسيادا قاتىسۋشىلار توپتىق جۇمىستار, اشىق پىكىرلەسۋ ارقىلى تسيفرلىق داۋىردەگى ۋنيۆەرسيتەتتىڭ رولىنە قاتىستى كوپتەگەن اقپاراتقا قول جەتكىزدى.
م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە جاساندى ينتەلەكتى كەڭىنەن ەنگىزۋ ماقساتىندا ء«بىلىم بەرۋدەگى جاساندى ينتەللەكتتى دامىتۋ قوعامى» رقب دە بىرلەسە بىرنەشە جوبالار قولعا الىندى. نەگىزگى ماقسات – قازاقستان حالقىنىڭ جاساندى ينتەللەكتكە قاتىستى ساۋاتتىلىعىن ارتتىرۋ جانە جي تەحنولوگيالارى ارقىلى ءبىلىم مەن عىلىمدى دامىتۋ.
جوبا اياسىندا وقۋ ورداسىنا جاساندى ينتەللەكت جۇيەلەرىن بەيىمدەۋ جانە ەنگىزۋ بويىنشا قولداۋ كورسەتىلە وتىرىپ, ءبىلىم الۋشىلار مەن وقىتۋشى-پروفەسسورلار قۇرامىنىڭ بىلىكتىلىگىن ارتتىرۋ كوزدەلگەن. سونداي-اق ءبىلىم بەرۋدى بارلىق دەڭگەيدە دامىتۋ, ونى عىلىممەن ىقپالداستىرۋ تەتىكتەرى قاراستىرىلادى.