فيلادەلفيا ماڭىنداعى قارتتار ۇيىندە گاز جارىلىپ, ءبىرىنشى قابات جەرتولەگە وپىرىلىپ ءتۇستى, دەپ حابارلايدى Egemen.kz.
اقش-تىڭ بريستول مۋنيتسيپاليتەتىندە (پەنسيلۆانيا شتاتى) ورنالاسقان Silver Lake قارتتار ۇيىندە جويقىن جارىلىس پەن ءورت بولدى. Reuters اگەنتتىگىنىڭ حابارلاۋىنشا, اپات سالدارىنان كەم دەگەندە ەكى ادام قازا تاۋىپ, بىرنەشە تۇرعىن اۋىر جاراقات العان. جويقىن ەكى جارىلىستان كەيىن عيماراتتىڭ تەرەزەلەرى ۇشىپ كەتىپ, قاسبەتى قاتتى زاقىمدالعان. نەگىزگى كونسترۋكتسيا امان قالعانىمەن, ىشكى قاباتتار ورتاسىنا تۇسكەن.
ءورت ءسوندىرۋ دەپوسى نىساننىڭ تۋرا قارسىسىندا ورنالاسقاندىقتان, ماماندار سول ساتتە جەتكەن. الايدا ولار كەلگەندە ءبىرىنشى قاباتتىڭ ءبىر بولىگى جەرتولەگە قۇلاپ ۇلگەرگەن. ءورت ينسپەكتورى كەۆين ديپپوليتونىڭ ايتۋىنشا, قۇتقارۋشىلارعا ادامداردى ۇيىندىلەر اراسىنان, بۇعاتتالعان باسپالداقتار مەن تۇرىپ قالعان ليفتىلەردەن شىعارۋعا تۋرا كەلدى. بىرنەشە ادام جەرتولەدەن امان شىعارىلعان.
قۇتقارۋ جۇمىستارى قىزۋ ءجۇرىپ جاتقاندا, عيمارات ىشىندە گازدىڭ ءيىسى بايقالىپ, ماماندار قاۋىپسىزدىك ءۇشىن نىساننان شىعۋعا ءماجبۇر بولعان. الدىن الا بولجام بويىنشا, اپاتقا گازدىڭ جىلىستاۋى سەبەپ بولعان.
قازىرگى ۋاقىتتا زارداپ شەككەندەر مەن قازا تاپقانداردىڭ ناقتى سانى انىقتالىپ جاتىر.