24 جەلتوقسانداعى Reuters مالىمەتىنشە, قىمبات مەتالدار نارىعىندا ناعىز رەكوردتار شەرۋى بولدى. التىننىڭ باعاسى ءبىر ساتتە 4 525 دوللارعا دەيىن كوتەرىلىپ, تاريح بەتىندەگى ەڭ جوعارى كورسەتكىشتى تىركەدى. كۇمىس 72,7 دوللارعا, ال پلاتينا 2 377,5 دوللارعا جەتىپ, ينۆەستورلاردىڭ تاڭدانىسىن تۋدىردى. پاللادي دە سوڭعى ءۇش جىلدىق رەكوردىن جاڭارتىپ, 1900 دوللارعا جۋىقتادى.
ساراپشىلار بۇل جاعدايدى الەمدەگى گەوساياسي تۇراقسىزدىقپەن تىكەلەي بايلانىستىرادى. ەكونوميكالىق بەلگىسىزدىك كۇشەيگەن سايىن, ءىرى كاپيتال يەلەرى اقشانى سەنىمدى اكتيۆتەردە – باعالى مەتالداردا ساقتاۋدى ءجون كورەدى. بۇعان قوسا, اقش-تىڭ پايىزدىق مولشەرلەمەلەردى تومەندەتۋ تۋرالى جوسپارى مەتالداردىڭ قۇنىن ودان ءارى اسپانداتىپ جىبەردى.
ستاتيستيكا تاڭعالدىرارلىق: جىل باسىنان بەرى التىن 70%-دان استام قىمباتتاسا, كۇمىس پەن پلاتينا باعاسى 150-160%-عا ءبىر-اق سەكىرگەن. بۇل 1970 جىلداردان بەرگى ەڭ ۇلكەن قارجىلىق ءدۇمپۋ. ماماندار باعالى مەتالداردىڭ «امبەباپ قورعانىس اكتيۆىنە» اينالعانىن جانە الداعى ۋاقىتتا دا سۇرانىس جوعارى بولاتىنىن بولجايدى.