سۋردليمپيادا جۇلدەگەرلەرى ماراپاتتالدى

ولجاس بەكتەنوۆ سپورتشىلاردى قولداۋ ۇكىمەت جۇمىسىنىڭ باسىم باعىتتارىنىڭ ءبىرى ەكەنىن اتاپ ءوتىپ, ۇلتتىق قۇراماعا, ونىڭ ماماندارى مەن باپكەرلەر قۇرامىنا جەڭىسكە جەتۋ جولىندا تاباندىلىق پەن ەرىك-جىگەردىڭ ۇلگىسىن كورسەتكەن ۇيلەسىمدى ءارى ناتيجەلى جۇمىستارىنا العىس ايتتى.

بيىلعى سۋردليمپيادا ويىندارىنا 81 مەملەكەتتەن 3 مىڭعا جۋىق سپورتشى قاتىستى. وتاندىق سپورتشىلار سەگىز سپورت تۇرىنەن ەل نامىسىن قورعاپ, 8 التىن, 4 كۇمىس پەن 13 قولا – بارلىعى 25 مەدال جەڭىپ الدى. ناتيجەسىندە, ەلىمىزدىڭ ۇلتتىق قۇراماسى جالپى كوماندالىق ەسەپتە 9-ورىندى يەلەندى.

«مەملەكەت باسشىسى حالىققا جول­داۋىن­دا بۇقارالىق سپورتتى دامىتۋ­عا, ەرەكشە قاجەتتىلىكتەرى بار ازاماتتارعا سپورت عيماراتتارىن سالۋعا باسا نازار اۋدارۋ قاجەتتىگىن ايتتى. سۋردليمپيادا ويىندارى ەلىمىزدەگى سۋردليمپيادا قوزعا­لىسىنىڭ تۇراقتى دامىپ كەلە جاتقانىن ايعاقتايدى. بۇل – سپورتتىق ۇيىمداردىڭ, جاتتىقتىرۋشىلاردىڭ سون­داي-اق, ءوز ەڭبەگىمەن بولاشاق جەڭىس­تەرگە بەرىك نەگىز قالايتىن سپورتشىلاردىڭ ۇيلەسىمدى ءارى تىنىمسىز جۇمىسىنىڭ ناتيجەسى. پرەزيدەنتتىڭ تاپسىرمالارىن جۇزەگە اسىرۋ شەڭبەرىندە ۇكىمەت كاسىبي جانە بۇقارالىق سپورتتى دامىتۋ, سپورتشىلاردى قولداۋعا قاتىستى جۇمىس جۇرگىزۋدە, جاڭا ينفراقۇرىلىم نىساندارى سالىنىپ جاتىر. جۇيەلى ءارى ۋاقتىلى شارالار جالپى جەتىستىكتى ارتتىرۋعا, بۇكىل سپورت سالاسىن ودان ءارى دامىتۋعا مۇمكىندىك بەرەدى», دەدى و.بەكتەنوۆ.

ماراپاتتاۋ بارىسىندا سۋردو دزيۋدو سپورتشىلارىنىڭ جەتىستىكتەرى اتاپ ءوتىلدى. ولاردىڭ جوعارى دەڭگەيدە ونەر كورسەتۋى ەلىمىزگە 11 مەدال (5 التىن, 2 كۇ­مىس جانە 4 قولا) الىپ كەلدى ءارى سۋردليم­­پ­يادا ويىندارىنىڭ جارقىن جەتىس­­تىك­­تەرىنىڭ ءبىرى بولدى. كوماندا كوش­باس­­­شى­لارىنىڭ قاتارىندا ءۇش دۇركىن جانە ەكى دۇركىن چەمپيون اتانعان ەركەبۇلان قانافين مەن شاديار قۋاندىق بار.

ال بيىكتىككە سەكىرۋدەن ۇلتتىق قۇراما قورجىنىنا التىن مەدال سالعان جەڭىل اتلەت­شى فاينا مەيرمانوۆا 1,79 مەتردى باعىن­دىرىپ, ويىنىڭ رەكوردىن ورنات­تى. ەركىن جانە گرەك-ريم كۇرەسىندە چەمپيون اتانعان بالۋاندار اندرەي سامارين مەن شاديار پەرنەش تە جالپى ناتيجەگە ايتارلىقتاي ۇلەس قوستى. ۇستەل تەننيسىندە قانات كونكۋباەۆ, دانيار ەسكەندىروۆ, بيجان تولەباەۆ پەن ابىلاي بۇركىتباي قولا جۇلدەگە يە بولدى. تاەكۆوندودا ايان ابدراش, ايجامول ابديكاتوۆا مەن ايدا ماكاتوۆا قولا جۇلدەگەر اتاندى.

پرەمەر-مينيستر قول جەتكىزىلگەن بارلىق ناتيجەلەر ەلدەگى سپورتشىلاردى دايار­­لاۋدىڭ جوعارى دەڭگەيى ءارى ولار­دىڭ اسا ماڭىزدى سپورتتىق سىن-قاتەر­لەر­مەن وي­داعىداي كۇرەسۋگە قابىلەتتى­لىگىن كور­سە­تەتىنىن ايتتى. ماراپات­تالعان­دار­دىڭ اتىنان جاتتىقتىرۋشىلار سەرىك دانياروۆ پەن ماكسيم روجكوۆ ءسوز سويلەدى.

«بارلىق سپورتشى مەن جاتتىقتىرۋ­شىنىڭ اتىنان ەل پرەزيدەنتىنە سۋردليمپيادا سپورتشىلارىنا كورسەتكەن ۇلكەن قولداۋىنا العىس ايتقىم كەلەدى. ءبىز سۋردليمپيادا ويىندارىندا 1997 جىلدان بەرى ونەر كورسەتىپ كەلەمىز. ەلىمىزگە التىن مەدالدى ءبىرىنشى بولىپ جەڭىپ العانىم ەسىمدە. وسى جىلداردا وتە ۇلكەن جۇمىس اتقارىلدى. جاپونيا­داعى ويىندار ءبىزدىڭ ەلىمىز ءۇشىن جەتىستىك­كە تولى بولدى. ءبىز العاش رەت كوپ مەدال يەلەندىك. وسى ءداستۇرىمىزدى ءارى قاراي جالعاستىرامىز», دەدى ۇلتتىق سۋردليمپيادا قۇراماسىنىڭ جەڭىل اتلەتيكادان جاتتىقتىرۋشى م.روجكوۆ.

«بۇگىندە اۋقىمدى جۇمىستار اتقارىل­­دى. ءبىز وسى سۋردليمپيادا ويىن­د­ارىندا جوعارى دەڭگەيدە ونەر كورسەت­تىك, ناتيجەسىندە وسىنداي ماراپاتتار مەن جەڭىستەرگە قول جەتكىزدىك. ەلىمىزگە, پرەزيدەنتكە ۇلكەن راحمەت. مەن ءوزىم­نىڭ قولا مەدالىمدى مەملەكەت باسشىسىنا ارناعىم كەلەدى», دەدى ۇستەل تەننيسىنەن ۇلتتىق قۇراما كومانداسىنىڭ اعا جاتتىقتىرۋشىسى س.دانياروۆ.