استانا. 23 ناۋرىز. ۇستىمىزدەگى جىلعى قاڭتار ايىنىڭ سوڭىنان بەرى كوپشىلىككە كورىنبەي كەتكەن وزبەكستان پرەزيدەنتى يسلام كاريموۆ تاياۋ كۇندەردەن بەرى قايتادان حالىق الدىنا شىعا باستادى. بۇل تۋرالى ۋزا حابارلادى.
اگەنتتىكتىڭ حابارلاۋىنشا, وزبەك ەلىنىڭ باسشىسى 21 ناۋرىز كۇنى تاشكەنتتەگى اليشەر ناۆوي اتىنداعى ۇلتتىق ساياباقتا ناۋرىز مەيرامىنا ارنالىپ وتكىزىلگەن سالتاناتقا قاتىسىپ, جاماعاتىنىڭ الدىندا جارقىلداپ ءسوز سويلەگەن.
«تابيعات تۇگەل ۇيقىدان وياناتىن وسىناۋ كۇندەردە كوكتەممەن بىرگە ءبىزدىڭ عاجايىپ ولكەمىز - تۋعان وزبەكستانىمىزعا كوپتەن كوپتەن كۇتكەن, ءبارىمىز ءۇشىن سۇيىكتى ناۋرىز جەتەدى, - دەدى يسلام كاريموۆ. – مەنىڭ قىمباتتىلارىم, سىزدەردى - مەنىڭ حالقىمدى كوكتەمنىڭ, جاڭارۋ مەن قۋانىشتىڭ نىشانى بولىپ تابىلاتىن وسىناۋ كونە زامانداردان كەلە جاتقان تاماشا مەرەكەمەن قۇتتىقتاۋ جۇرەگىمدى ەرەكشە شاتتىققا كەنەلتەدى».
بۇدان كەيىن وزبەكستان پرەزيدەنتى ەجەلگى داۋىرلەردەگى تاريحىنا توقتالىپ, ونىڭ بۇگىنگى كۇندە حالىق ءۇشىن بەرەتىن ىزگىلىكتەرىن ءسوز ەتتى.
ال ءسوزىنىڭ سوڭىن يسلام كاريموۆ: «قىمباتتى وتانداستار! سىزدەردىڭ بارشاڭىزدى ويشا قۇشا وتىرىپ, بۇگىنگى ەشبىر قايتالانباس عالامات مەرەكەمەن شىن جۇرەكتەن قۇتتىقتايمىن, وزدەرىڭىزگە ءوزىمنىڭ ەڭ ىزگى تىلەكتەرىمدى بىلدىرەمىن. ناۋرىز ءبىزدىڭ ەلىمىزدىڭ ءاربىر وتباسىنا بەيبىتشىلىك, باقىت جانە مولشىلىق اكەلسىن», - دەگەن جۇرەكجاردى تىلەگىمەن اياقتادى.
ءبىر ايتا كەتەتىن جايت, بۇل وزبەكستان پرەزيدەنتىنىڭ ءبىراز ۋاقىتقا سوزىلعان ۇنسىزدىكتەن كەيىن جۇرت الدىنا العاش رەت شىعۋى ەمەس. ول 16 ناۋرىز كۇنى تاشكەنتتە ءوز سايلاۋشىلارىمەن ءبىرىنشى كەزدەسۋىن وتكىزىپ, الداعى ماقساتتارى تۋرالى ايتىپ بەرگەن ەدى.
وزبەكستاندا پرەزيدەنت سايلاۋى 29 ناۋرىز كۇنى وتەدى. وعان 4 ۇمىتكەردىڭ قاتىسقالى تۇرعانى دا بەلگىلى. كانديداتتار اراسىندا ءىس باسىنداعى پرەزيدەنتتەن باسقا, حاتومجان كەتمونوۆ, ناريمون ۋماروۆ جانە اكمال سايدوۆ بار. ولاردىڭ بارلىعى دا سايلاۋعا ءبىر-ءبىر پارتيانىڭ تاڭداۋلىسى رەتىندە ءتۇسىپ جاتىر. الايدا, بۇل پارتيالاردىڭ قالاي اتالاتىنىن بىلۋدەن قازاق وقىرماندارىنا كەلىپ-كەتەر ەشتەڭە جوق.
مۇرات ايتقوجا.
مانبە, سۋرەت: ۋزا.