شىمكەنتتەگى «Marvik Partners» جشس «وڭتۇستىك» ارنايى ەكونوميكالىق ايماعىندا جەڭىل ونەركاسىپ, مەديتسينا, قۇرىلىس جانە باسقا سالادا قولدانىسقا يە سپانبوند ءونىمىن شىعاراتىن فابريكانى ىسكە قوستى, دەپ حابارلايدى Egemen.kz.
جوبانىڭ ينۆەستيتسيالىق قۇنى 4,7 ملرد تەڭگە تۇرادى. كاسىپورىندا 136 ادام تۇراقتى ەڭبەك ەتىپ, جىلىنا 4.8 مىڭ توننا ماتەريال وندىرىلەدى. فابريكا قۇرىلىسىنا ارنايى ەكونوميكالىق ايماقتان 3 گەكتار جەر بەرىلگەن. كاسىپورىن زاماناۋي قۇرىلعىلارمەن جابدىقتالعان. كەلەشەكتە وتاندىق سپانبوند يمپورتتىق ءونىمدى الماستىرادى.
سونداي-اق قالادا «Alliance Buildings» جشس-ءنىڭ مەتالل ەسىكتەر شىعاراتىن زاۋىتى اشىلدى. بۇل ەسىكتەر ورتكە قاۋىپسىز. كاسىپورىن ەلىمىزدىڭ وڭتۇستىك وڭىرلەرىن ساپالى قۇرىلىس ونىمدەرىمەن قامتاماسىز ەتۋگە قاۋقارلى جانە ەكسپورت اياسىن كەڭەيتۋ جوسپارى بار.
كومپانيا كەلەسى جىلدان باستاپ وزبەكستان, قىرعىزستان, تاجىكستان ەلدەرىنە ونىمدەرىن ەكسپورتتاماق. جوباعا 3.7 ملرد تەڭگە ينۆەستيتسيا تارتىلعان. تولىق قۋاتتىلىعىنا كوشسە زاۋىتتا 120 ادام تۇراقتى جۇمىسپەن قامتىلىپ, جىلىنا 150 مىڭ دانا ەسىك شىعارىلاتىن بولادى.
قالا اكىمى ع.سىزدىقبەكوۆ جاڭا كاسىپورىنداردىڭ ىسكە قوسىلۋى – شىمكەنتتەگى ونەركاسىپتىڭ دامۋىنداعى ماڭىزدى قادام ەكەنىن ايتتى. سول ارقىلى جۇمىس ورىندارى اشىلىپ, ەكونوميكالىق الەۋەت نىعايىپ, ىشكى نارىق سۇرانىسى قاناعاتتاندىرىلادى.
شىمكەنت