قوستاناي. 11 تامىز. قوستاناي وبلىسىندا ات سپورتى تۇرلەرىنەن وبلىستىق چەمپيونات ءوتتى. وندا قوستاناي اۋدانىنىڭ سپورتشىلارى بارلىق قارسىلاستارىنان باسىم ءتۇستى. بۇل تۋرالى egemen.kz ءتىلشىسى حابارلادى.
ات سپورتى تۇرلەرىنەن قوستاناي اۋدانىنىڭ زارەچنىي سەلوسىنداعى «ارعىماق» اتشابارىندا وتكەن وبلىستىق چەمپيوناتقا 12 اۋداننان شاباندوزدار مەن سپورتشىلار قاتىستى. چەمپيونات باعدارلاماسى ات سپورتىنىڭ قىز قۋ, اۋدارىسپاق, كوكپار, تەڭگە الۋ, سونىمەن قاتار 2 400, 3 200, 12 000, 24 000 مەتر قاشىقتىققا شاپقان بايگە تۇرلەرىن قامتىدى. وسى جارىستاردىڭ بارلىعىندا دا كوماندالىق ەسەپ بويىنشا قوستاناي اۋدانىنىڭ سپورتشىلارى باسىمدىق تانىتتى. مىسالى, قىز قۋعا قوستاناي اۋدانى مەن سارىكول اۋدانىنان ەكى جۇپ شىقتى. قوستانايلىق ايسارا اسان سارىكولدىك داۋلەت بالكەنوۆ مەن گۇلميرا جاقىپوۆادان باسىم ءتۇستى.
اۋدارىسپاقتا سپورتشىلار 60 كگ., 70 كگ., 80 كگ. جانە 90 كگ. سالماقتا باسەكەگە ءتۇستى. وندا دەنيسوۆ اۋدانىنان كەلگەن ديدار مۇستافين (60 كگ.), قوستاناي اۋدانىنىڭ مىقتىسى باۋىرجان كويانباەۆ (70 كگ.), تاعى قوستاناي اۋدانىنىڭ وكىلى دارحان سالمانوۆ (80 كگ.) جانە دەنيسوۆ اۋدانىنىڭ تۋماسى ايدوس جۇماعۇلوۆ (90 كگ.) جەڭىمپاز اتاندى.
كوكپاردان قوستاناي اۋدانىنىڭ كوكپارشىلارىنا ەشكىم شاق كەلمەدى. الامان بايگەدە ناۋرىزىمدىق اتبەگى ساكەن قارمانوۆتىڭ ارعىماعى ءبىرىنشى بولىپ مارەنى قيدى. سونىمەن جالپى ەسەپتە قوستاناي اۋدانىنىڭ كومانداسى 64 ۇپاي جيناپ, توپ جاردى. ەكىنشى ورىندى قاراسۋ اۋدانى السا, ءۇشىنشى ورىن سارىكولدىكتەرگە بۇيىردى.
ءنازيرا جارىمبەتوۆا.
دەرەك: egemen.kz.
سۋرەت: ng.kz.